ភ្នំពេញ ៖ ក្នុងត្រីមាសទី១ ឆ្នាំ២០២៤ ទំហំពាណិជ្ជកម្មកម្ពុជា ជាមួយបណ្តាប្រទេសដៃគូចំនួន១៤​ នៃ​កិច្ចព្រមព្រៀងសេដ្ឋកិច្ចគ្រប់ជ្រុងជ្រោយតំបន់អាសិប (RECP) សម្រេចបានទឹកប្រាក់ប្រមាណ ៨៣៦៤ លានដុល្លារ​លានដុល្លារអាមេរិក ដែលទំហំនេះបានកើនឡើងក្នុងអត្រា ២៥,៧ភាគរយ បើធៀបនឹងត្រីមាសទី១ ក្នុងឆ្នាំ២០២៣។​

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានមានប្រសាសន៍ថា ពាណិជ្ជកម្មរបស់កម្ពុជាជាមួយបណ្តាប្រទេស RCEP បានកើនឡើង ដោយសារការអនុគ្រោះពាណិជ្ជកម្មក្រោមកិច្ចព្រមព្រៀង​ពាណិជ្ជកម្មតំបន់។ ជាក់ស្ដែងនៅក្នុងត្រីមាសទី១ ឆ្នាំ២០២៤កន្លងទៅនេះ ការនាំចេញរបស់កម្ពុជាទៅកាន់បណ្តាប្រទេស RCEP មានប្រមាណ ២​ ៦៩៥,៦៥ លានដុល្លារ កើនជាង២៥,៧៦ភាគរយ។ ចំណែកការនាំចូលវិញពីប្រទេសដៃគូវិញមាន ៥ ៦៦៩​,១៤ លានដុល្លារ កើន១០,១៣ភាគរយ។

ឯកឧត្តម ប៉ែន សុវិជាតិ បានលើកឡើងថា ការនាំចេញរបស់កម្ពុជា ភាគច្រើនជាទំនិញចាំបាច់ និងសម្ភារប្រើប្រាស់ ប្រចាំថ្ងៃដូចជា៖ សម្លៀកបំពាក់ ស្បែកជើង កាបូប​ សម្ភារធ្វើដំណើរ គ្រឿងឧបភោគបរិភោគ(អង្គរ គ្រាប់ធញ្ញជាតិ ត្រី សាច់) គឺនៅតែរក្សាបានកំណើនយ៉ាងល្អប្រសើរ។

សូមជម្រាបថា ប្រទេសដែលជាសមាជិកនៃកិច្ចព្រមព្រៀង​ពាណិជ្ជកម្មអាសិប មាន១៥ ប្រទេសនៅអាស៊ីប៉ាស៊ីហ្វិក រួមទាំងរដ្ឋសមាជិកទាំង ១០ នៃសមាគមប្រជាជាតិអាស៊ីអាគ្នេយ៍ (អាស៊ាន) – ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបូរី ថៃ វៀតណាម និងដៃគូពាណិជ្ជកម្មចំនួន ៥ រួមមាប ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។

គួររំលឹកថា កិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលមានកម្ពុជាជាសមាជិកផងនោះ ត្រូវបានចូលជាធរមាននៅថ្ងៃទី១ ខែមករា ឆ្នាំ២០២២ បន្ទាប់ពីចរចាអស់ជិត១០ឆ្នាំ។ កិច្ចព្រមព្រៀងពាណិជ្ជកម្មនេះបានអនុញ្ញាតឱ្យកម្ពុជារួចពន្ធលើទំនិញជាច្រើន ជាពិសេសទំនិញកសិកម្ម ទំនិញកសិកម្មកែច្នៃ និងទំនិញឧស្សាហកម្មជាដើម។

ប្រជាជាតិ RCEP តំណាងឱ្យប្រជាជនប្រហែល ២,២ ពាន់លាននាក់ ឬ ៣០ ភាគរយ នៃចំនួនប្រជាជនពិភពលោកដែលរួមចំណែក ២៦.២ ទ្រីលានដុល្លារដល់ផលិតផលក្នុងស្រុកសរុប (GDP) ស្មើនឹងប្រមាណ ៣០ ភាគរយនៃផលិតផលក្នុងស្រុកសរុបទូទាំងពិភពលោក។ នេះបើយោងតាមក្រសួងពាណិជ្ជកម្ម។