សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា សហភាពអឺរ៉ុបបានអនុម័តទណ្ឌកម្មជុំទី ១៥ ប្រឆាំងនឹងរុស្សី រួមមាន ការរឹតបន្តឹងកងនាវាស្រមោលរបស់ទីក្រុងម៉ូស្គូ និងវិធានការតឹងរ៉ឹងប្រឆាំងនឹងអង្គភាពរបស់ចិន។
កាលពីថ្ងៃចន្ទកន្លងទៅនេះ សហភាពអឺរ៉ុបបានបង្ហាញនៅក្នុងសេចក្តីថ្លែងការណ៍ថា ទណ្ឌកម្មជុំទី ១៥ នេះនឹងរឹតបន្តឹងលើកប៉ាល់បន្ថែមចំនួន ៥២ របស់កងនាវាស្រមោលដែលព្យាយាមគេចពីការរឹតបន្តឹងរបស់លោកខាងលិច ដើម្បីដឹកជញ្ជូនប្រេង អាវុធ និងគ្រាប់ធញ្ញជាតិជាដើម។ ជាសរុប កប៉ាល់ដែលនឹងត្រូវបានរឹតបន្តឹងមានចំនួន ៧៩ នៅក្នុងបញ្ជី ដោយក្នុងនោះមាននាវាដែលដឹកជញ្ជូនគ្រាប់រំសេវរបស់កូរ៉េខាងជើងទៅកាន់រុស្ស៊ីផងដែរ។ សហភាពអឺរ៉ុបបានចាប់ផ្តើមរឹតបន្តឹងកប៉ាល់បន្ថែមនៅឆ្នាំក្រោយនេះ ដើម្បីឆ្លើយតបទៅនឹងការកើនឡើងនៃចំនួនកប៉ាល់ដឹកជញ្ជូនទំនិញដែលមិនត្រូវបានគ្រប់គ្រង ឬធានាដោយអ្នកផ្តល់សេវាលោកខាងលិច។ ក្នុងចំណោមកប៉ាល់ទាំង ៥២ ដែលត្រូវបានដាក់ទណ្ឌកម្មនោះ មានកប៉ាល់រហូតទៅដល់ ៣៣ គ្រឿងបានដឹកជញ្ជូនប្រេងឆៅនាំចេញពីប្រទេសរុស្ស៊ី ខណៈដែលកប៉ាល់ដឹកប្រេងមានជាសរុប ៤៣ គ្រឿង។
មិនត្រឹមតែប៉ុណ្ណោះ ទណ្ឌកម្មថ្មីនេះនឹងរឹតបន្តឹងលើបុគ្គល និងអង្គភាពថ្មីចំនួន ៨៤ បន្ថែមទៀត ដោយក្នុងនោះមានបុគ្គល និងអង្គភាពរបស់ចិនចំនួន ៧។ សេចក្តីថ្លែងការណ៍បានបន្ថែមថា មានបុគ្គលមួយ និងអង្គភាពចិនពីរបានជៀសពីទណ្ឌកម្មរបស់សហភាពអឺរ៉ុប ខណៈដែលអង្ភភាពចំនួនបួនដែលផ្គត់ផ្គង់គ្រឿងបន្លាស់ដ្រូន និងសមាសធាតុមីក្រូអេឡិចត្រូនិចដល់យោធារុស្ស៊ី។ ការរឹតបន្តឹងបន្ថែមលើអង្គភាពចិន ការហាមឃាត់លើការធ្វើដំណើរ និងការបង្កកទ្រព្យសម្បត្តិនឹងក្លាយជាការដាក់ទណ្ឌកម្មពេញលេញលើរុស្ស៊ីជាលើកដំបូង។
លោក David O’Sullivan ប្រធានខាងផ្នែកទណ្ឌកម្មរបស់សហភាពអឺរ៉ុប ចង្អុលថា ចិន គឺជាផ្លូវសំខាន់សម្រាប់ការលក់បច្ចេកវិទ្យាបរទេសទៅឲ្យរុស្ស៊ី។
លើសពីនេះ បញ្ជីនេះរួមបញ្ចូល អ្នកគ្រប់គ្រងជាន់ខ្ពស់ក្នុងវិស័យថាមពលរបស់រុស្ស៊ី មន្ត្រីជាន់ខ្ពស់កូរ៉េខាងជើងពីរនាក់ ព្រមទាំងក្រុមហ៊ុន និងអង្គភាពរុស្ស៊ីចំនួន ២០ នៅក្នុងប្រទេសឥណ្ឌា អ៊ីរ៉ង់ ស៊ែប៊ី និងអារ៉ាប់រួមផងដែរ។ ទន្ទឹមនឹងនេះ បណ្តាប្រទេសសហភាពអឺរ៉ុបបានបន្ថែមវិធានការហិរញ្ញវត្ថុដើម្បីបន្ធូរបន្ថយបន្ទុកលើកន្លែងដាក់ទ្រព្យសម្បត្តិរបស់សហភាពអឺរ៉ុប ដូចជា Euroclear ជាដើម នៅពេលដែលពួកគេគ្រប់គ្រងទ្រព្យសម្បត្តិបង្កករបស់ធនាគារកណ្តាលរបស់រុស្ស៊ីជាង ៣០០ ពាន់លានដុល្លារអាម៉េរិក។ ជាក់ស្តែង ក្រុមប្រទេស G7 បានព្រមព្រៀងគ្នាក្នុងការប្រើប្រាស់ទ្រព្យសម្បត្តិបង្កករបស់រុស្ស៊ី ដោយផ្តល់ប្រាក់កម្ចីចំនួន ៥០ ពាន់លានដុល្លារសម្រាប់ជួយអ៊ុយក្រែន។ បន្ថែមពីនេះ គណៈកម្មការសហភាពអឹរ៉ុបកំពុងរៀបចំទណ្ឌកម្មជុំទី ១៦ សម្រាប់ខែមករា ដែលអាចរួមបញ្ចូល ការរឹតបន្តឹងឧស្ម័នធម្មជាតិរាវរបស់រុស្ស៊ី និងការកំណត់ការនាំចេញលើក្រុមហ៊ុនបុត្រសម្ព័ន្ធរបស់សហភាពអឺរ៉ុបនៅក្នុងប្រទេសទីបី។
គួរឲ្យបញ្ជាក់ដែរថា កងនាវាស្រមោល ឬ Shadow Fleet សំដៅលើ កប៉ាល់ដឹកប្រេង ឬ ទំនិញដែលជាប់ទណ្ឌកម្ម ជាពិសេសប្រទេសស្ថិតនៅក្រោមការដាក់ទណ្ឌកម្មបានអនុវត្តវិធីសាស្ត្រនេះនៅក្នុងដែនសមុទ្រ តាមរយៈការប្រើប្រាស់នាវាដែលមិនបានចុះបញ្ជី ឬក្លែងបន្លំ ដើម្បីបញ្ចៀសពីការរឹតបន្តឹង។ ទំនិញដែលត្រូវដឹកជញ្ជូនតាមកប៉ាល់នេះភាគច្រើនមានដូចជា ប្រេង ដែក ទំនិញប្រណីត អាវុធ និងបច្ចេកវិទ្យាការពារជាតិជាដើម៕
Account
Security
Favourite Content