សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី CNBC បានរាយការណ៍ថា សហភាពអឺរ៉ុបនឹងចាត់វិធានការតបតទៅអាម៉េរិកវិញចំពោះការដំឡើងពន្ធទ្វេដងលើការនាំចូលដែកថែប និងព្រមានថា ការធ្វើបែបនេះអាចបំផ្លាញដល់កិច្ចខិតខំប្រឹងប្រែងដើម្បីឈានដល់ដំណោះស្រាយចរចានៅក្នុងសង្គ្រាមពាណិជ្ជកម្ម។
អ្នកនាំពាក្យសហភាពអឺរ៉ុបបាននិយាយនៅក្នុងសេចក្តីថ្លែងការណ៍មួយទៅថា ៖
«យើងសោកស្តាយយ៉ាងខ្លាំងចំពោះការប្រកាសដំឡើងពន្ធរបស់សហរដ្ឋអាម៉េរិកលើការនាំចូលដែកថែប ៥០%។ ការសម្រេចចិត្តនេះបានបន្ថែមភាពមិនច្បាស់លាស់ដល់សេដ្ឋកិច្ចពិភពលោក និងបង្កើនការចំណាយសម្រាប់អ្នកប្រើប្រាស់ ក៏ដូចជាម្ចាស់អាជីវកម្មទាំងសងខាងនៃមហាសមុទ្រអាត្លង់ទិក។ សហភាពអឺរ៉ុបបានត្រៀមខ្លួនដើម្បីដាក់វិធានការតបត និងឆ្លើយតបទៅនឹងការដំឡើងពន្ធចុងក្រោយបង្អស់របស់សហរដ្ឋអាមេរិក។ ឥឡូវនេះ គណៈកម្មការអឺរ៉ុបកំពុងបញ្ចប់កិច្ចពិគ្រោះយោបល់លើការពង្រីកវិធានការសម្រាប់ប្រឆាំងទៅអាម៉េរិកវិញ។ ប្រសិនបើគ្មានដំណោះស្រាយដែលអាចទទួលយកបានទាំងសងខាងនោះទេ វិធានការដែលមានស្រាប់ និងបន្ថែមរបស់សហភាពអឺរ៉ុបនឹងចូលជាធរមាននៅថ្ងៃទី ១៤ ខែកក្កដា ឬមុននេះ ប្រសិនបើកាលៈទេសៈបង្ខំ»។
សហភាពអឺរ៉ុបបានលើកឡើងដែរថា ខ្លួនបានផ្អាកវិធានការប្រឆាំងនឹងសហរដ្ឋអាម៉េរិកតាំងពីថ្ងៃទី ១៤ ខែមេសា ដើម្បីទុកពេលចរចា ប៉ុន្តែខ្លួនក៏បានរៀបចំសម្រាប់ការដាក់ចេញនូវវិធានការទាំងនោះផងដែរប្រសិនបើគ្មានដំណោះស្រាយដែលអាចទទួលយកបានទៅវិញទៅមក។
ទន្ទឹមនឹងនេះ សហជីពតំណាងបុគ្គលិកដែកថែបនៅអាម៉េរិកខាងជើង (USW) ក៏បានរិះគន់ដែរថា ការប្រកាសពន្ធលើការនាំចូលដែកថែបរបស់ Trump គឺជាការវាយប្រហារដោយផ្ទាល់ទៅលើឧស្សាហកម្ម និងកម្មករកាណាដា។
Marty Warren នាយករបស់ USW ប្រចាំប្រទេសកាណាដាបានលើកឡើងថា ការងាររាប់ពាន់នាក់របស់កាណាដាកំពុងស្ថិតក្នុងហានិភ័យ ខណៈដែលសហគមន៍ជាច្រើនពឹងផ្អែកលើដែកថែប និងអាលុយមីញ៉ូម ហើយកាណាដាចាំបាច់ត្រូវឆ្លើយតបភ្លាមៗជាដាច់ខាត ដើម្បីការពារកម្មករ។
កាលពីថ្ងៃសុក្រ ប្រធានាធិបតីសហរដ្ឋអាម៉េរិក Donald Trump បានប្រកាសពីផែនការដំឡើងពន្ធទ្វេដងលើការនាំចូលដែកថែបពី ២៥% ទៅ ៥០% ដែលបានបង្កើនសម្ពាធដល់ក្រុមហ៊ុនផលិតដែលពឹងផ្អែកលើឧស្សាហកម្មលោហៈសម្រាប់ផលិតកម្ម។ ពន្ធនាំចូលថ្មីនេះនឹងចូលជាធរមាននៅថ្ងៃទី ៤ ខែមិថុនា ខាងមុខនេះ។ ការប្រកាសពន្ធថ្មីរបស់ Trump កើតឡើងនៅក្នុងកិច្ចជំនួបមួយនៅ US Steel ក្នុងរដ្ឋ Pennsylvania បន្ទាប់ពីមានសញ្ញាថា លោកនឹងអនុម័តកិច្ចព្រមព្រៀងដ៏ចម្រូងចម្រាសមួយរវាងក្រុមហ៊ុនផលិតដែកថែប Nippon Steel និង US Steel ។ Trump បានគូសបញ្ជាក់ពីកិច្ចព្រមព្រៀងរវាងក្រុមហ៊ុន Nippon និង US Steel ដោយមិនមានការបញ្ឈប់ការងារ និងមិនមានការប្រើប្រាស់សេវាពីប្រភពខាងក្រៅនោះទេ៕
Account
Security
Favourite Content