ភ្នំពេញ ៖ បម្រែបម្រួលអាកាសធាតុ គឺជាបញ្ហាចម្បង ដែល​កំពុង​តែ​កើត​មាន​ឡើង​នៅ​ទូ​ទាំង​ពិភពលោក​ ហើយ​វា​ត្រូវ​បាន​ហៅ​ថា​ “​ការ​ប្រែប្រួល​អាកាសធាតុ​”​ ដែល​ជា​លទ្ធផល​កើត​ចេញពី​សកម្មភាព​របស់​មនុស្សទាក់ទង​ទៅ​នឹង​ការ​ធ្វើ​ឧស្សាហូបនីយកម្ម​ ការ​កាប់​បំផ្លាញ​ព្រៃឈើ​ និង​បម្រែបម្រួល​នៃ​ការ​ប្រើប្រាស់​ដី​នៅលើពិភពលោក ហើយកម្ពុជាក៏ទទួលរងនូវឥទ្ធិពលមួយចំនួនផងដែរ។

លោក ទួត សេងហ័ង អ្នកគ្រប់គ្រងបញ្ហាបម្រែបម្រួលអាកាសធាតុនៃអង្គការ IDE កម្ពុជា នៃគម្រោងស៊ីស្មាត បានចែករំលែកថា ​ការទប់ទល់ទៅហ្នឹងបញ្ហាបម្រែបម្រួលអាកាសធាតុ គឺមានជម្រើសជាច្រើន ដែលអាចណែនាំដល់ប្រជាកសិករក្នុងការបង្ករបង្កើនផលលើដំណាំដាំដុះ ហើយ​វិធីសាស្ត្រទាំងនោះ​មិនមែនជាការទប់ទល់ ឬប្រឆាំងនោះទេ ប៉ុន្តែជាការសម្របទៅនឹងកត្តាជាក់ស្ដែងអាកាសធាតុ។

អ្នកជំនាញបច្ចេកទេសកសិកម្ម រូបនេះបានបញ្ជាក់ថា ៖

«យើងមានចំណុច ២ សំខាន់  ៖ ទី១-គឺការជ្រើសរើសពូជ គឺពូជដែលសមស្របសម្រាប់ដំណាំខែប្រាំង និងពូជសមស្រប សម្រាប់ដំណាំខែវស្សា ព្រោះថា បើកសិករអាចរើសពូជដែលត្រឹមត្រូវ បានន័យថាកសិករបានសម្របខ្លួនទៅនឹងលក្ខខណ្ឌដែលមានការប្រែប្រួលអាកាសធាតុរួចហើយ​។ ទី២ -ទាក់ទងអាកាសធាតុនេះ នៅក្នុងវិស័យកសិកម្ម គឺទាក់ទងដល់ផល​ដំណាំកសិកម្ម គឺយើងគិតទៅដល់ ៣ ចំណុច គឺទី១ ភ្លៀងខ្លាំង ឬជោគជន់ ទី២ ក្ដៅខ្លាំង និងទី៣ ខ្យល់ ដែលកត្តាធំៗទាំង៣នេះបានពាក់ព័ន្ធនឹងបញ្ហាកសិផលរបស់កសិករ»។

លោក សេងហ័ង បានលើកឡើងថា ឧទាហរណ៍ផលដំណាំដែលកសិករជួបប្រទះនៅពេលអាកាសធាតុក្តៅខ្លាំងកន្លងមក គឺខ្វះខាតទឹក ម៉្យាងទៀតសត្វល្អិតកើតច្រើន កសិករពិបាកក្នុងការទប់​ទល់រហូតផលដំណាំត្រូវបំផ្លាញខូចអស់។

ដូច្នេះតើកសិករ អាចមានវិធានការទប់ទល់ ឬរកដំណោះស្រាយលើបញ្ហានេះបានដោយរបៀបណា ?

លោក ទួត សេងហ័ង បាន​លើកឡើងពីការស្វែងរកដំណោះស្រាយងាយៗ ដែលកសិករអាចធ្វើបាន។ ប្រសិនបើកសិករត្រូវការទឹកប្រើប្រាសឱ្យបានគ្រប់គ្រាន់ ត្រូវស្តារប្រភពទឹកប្រឡាយ (ក្នុងករណីកសិករមានស្រះ) ហើយប្រសិនបើអ្នកដែលមិនទាន់មានស្រះ គឺត្រូវជីកស្រះ ជីកប្រឡាយ និងប្រព័ន្ធទឹកផ្សេងទៀតសម្រាប់ទប់ទឹកទុកប្រើទម្រាំដល់រដូវភ្លៀងមកវិញ។

អ្នកជំនាញបច្ចេកទេសកសិកម្ម រូបនេះបានគូសបញ្ជាក់បន្ថែមថា ជាទូទៅ កសិករច្រើនប្រើវិធីសាស្ត្របូមទឹកស្រោចស្រពទៅលើដំណាំរបស់ខ្លួន ដែលវិធីនេះគឺជាការប្រើប្រាស់ទឹកច្រើន និងខ្ជះខ្ជាត ប៉ុន្តែកសិករអាចកាត់បន្ថយការប្រើប្រាស់ទឹកបានតាមរយៈការប្រើប្រាស់ប្រព័ន្ធស្រោចស្រពតាមបច្ចេកទេសកសិកម្មបែបទំនើបបាន ខណៈដែលការប្រើប្រាស់បច្ចេកទេសនៃប្រព័ន្ធស្រោចស្រពទឹកអាចកាត់បន្ថយ និងជួយសន្សំសំចៃបរិមាណទឹកបានរហូតទៅដល់ប្រមាណ ៣០ទៅ៤០ភាគរយ។

ដោយឡែក ក្នុងករណីមានភ្លៀងធ្លាក់ច្រើនដែលអាចជន់លិច កសិករអាចលើករងដំណាំឱ្យបានខ្ពស់ ហើយម៉្យាងទៀតគឺអាចធ្វើផ្លូវរំដោះទឹក។ មានន័យថា កាលណាកសិករបានលើករងខ្ពស់ ពេលភ្លៀងល្មមៗមិនលិចទឹក និងមិនមានផលប៉ះពាល់នោះទេ ហើយ​ផ្លូវរំដោះទឹកដូចគ្នា វាក៏អាចរំដោះទឹកបានលឿន ដែលទាំង២ចំណុចនេះជាដំណោះស្រាយខែភ្លៀង។

លោក ទួត សេងហ័ង បានគូសបញ្ជាក់ថា សម្រាប់ដំណោះស្រាយក្នុងពេលរដូវភ្លៀងធ្លាក់ ភាគច្រើន កសិករជ្រើសរើសយកការប្រើផ្ទះសំណាញ់ ដែលជាជម្រើសដ៏ល្អមួយ ប៉ុន្តែល្អសម្រាប់តែប្រភេទដំណាំស្លឹកតែប៉ុណ្ណោះ ខណៈដែលការប្រើផ្ទះសំណាញ់ប្រឈមនឹងការចំណាយខ្ពស់ក្នុងការសាងសង់ឱ្យស្របតាមស្តង់ដារ។