ភ្នំពេញ៖ អភិបាលខេត្តព្រះសីហនុបានឱ្យដឹងថា ក្នុងរយៈពេល ៥ឆ្នាំកន្លងមកនេះ ខេត្តព្រះសីហនុមានការរីកចម្រើនយ៉ាងខ្លាំង ជាពិសេសគឺការរីកដុះដាលនៃវិស័យសំណង់អគារខ្ពស់ៗ ដោយក្នុងនោះមានគម្រោងវិនិយោគទូទាំងខេត្តចំនួន ១ ១៨៦គម្រោង, ការបង្កើតឱ្យមានកំពង់ផែសមុទ្រទឹកជ្រៅ, ការអភិវឌ្ឍនៅតាមបណ្ដាកោះនានាទូទាំងខេត្ត និងមានតំបន់សេដ្ឋកិច្ចពិសេសសរុបចំនួន១១តំបន់ ។

​ក្នុងសន្នីសីទសារព័ត៌មាននៅទីស្តីការគណៈរដ្ឋមន្ត្រីកាលពីពេលកន្លងទៅនេះ ឯកឧត្តម គួច ចំរើន ​​​​​​​​អភិបាលខេត្តព្រះសីហនុ បានលើកឡើងថា ខេត្តព្រះសីហនុមានតំបន់សេដ្ឋកិច្ចពិសេសសរុបចំនួន១១តំបន់ (៣កំពុងដំណើរការ និង៨ត្រៀមដំណើរការ) មានអាកាសយានដ្ឋានអន្តរជាតិ ជាពិសេសឆ្នេរសមុទ្រដ៏ស្រស់ស្អាតដែលត្រូវបានប្រសិទ្ធនាមជា «តារារៈនាទិសនិរតី»។

ឯកឧត្តម គួច ចំរើន បានបញ្ជាក់ថា ៖

“រោងចក្រក្នុងតំបន់សេដ្ឋកិច្ចពិសេសមានចំនួនសរុប១៦៨រោងចក្រ និងក្រៅតំបន់សេដ្ឋកិច្ចពិសេសមានចំនួនសរុប៧១រោងចក្រ ដែលចំនួនសរុបមាន ២៣៩រោងចក្រ​។​ ចំពោះរោងចក្រកំពុងដំណើរការមានកម្លាំងពលកម្មសរុបចំនួន ៣៤ ​៤៧៩នាក់ មានទុនវិនិយោគសរុបចំនួន ២ ២១១ ​៦៧១ ០០០ដុល្លារ”

ដោយឡែក សម្រាប់វិស័យឧស្សាហកម្មធុនតូច (សហគ្រាស ធុនតូច និងមធ្យម និងសិប្បកម្ម) មានសហគ្រាស និងសិប្បកម្មសរុបចំនួន១ ២១៣មូលដ្ឋាន ក្នុងនោះមានកម្លាំងពលកម្ម ៦ ២៣១នាក់ មានទុនវិនិយោគ ២៦ ៦៩៩ ៦១៩ដុល្លារ។ អត្រាប្រាក់ចំណូលប្រចាំឆ្នាំរបស់ប្រជាពលរដ្ឋមា្នក់ៗ នៅខេត្តព្រះសីហនុ មានចំនួន ៤ ១៨០ដុល្លារ និងមានអត្រាកំណើនសេដ្ឋកិច្ច ៦.៨ភាគរយ ដែលធ្វើឲ្យអត្រាភាពក្រីក្ររបស់ប្រជាពលរដ្ឋក្នុងខេត្តថយចុះមកត្រឹម ១.៨៦ភាគរយ នៅឆ្នាំ២០២២។

ឯកឧត្តម បានបញ្ជាក់បន្ថែមថា ខេត្តព្រះសីហនុ ជាខេត្តដែលមានវិស័យសេដ្ឋកិច្ចសំខាន់ៗ រួមមាន វិស័យឧស្សាហកម្ម ពាណិជ្ជកម្ម ទេសចរណ៍ និងកសិកម្ម ដែលជាវិស័យអាទិភាពសម្រាប់ការអភិវឌ្ឍខឿនសេដ្ឋកិច្ចជាតិរបស់រាជរដ្ឋាភិបាល ដែលសក្តានុពលរបស់ខេត្ត​ដូចជា  កំពង់ផែសមុទ្រទឹកជ្រៅ តំបន់សេដ្ឋកិច្ចពិសេស និងមានសំណង់អគារសរុបក្នុងខេត្តព្រះសីហនុ មានចំនួន ១ ០០៦អគារ និងមានកោះ ចំនួន៣០ ថ្មប៉ប្រះទឹកចំនួន២។ ការអនុវត្តគម្រោងវិនិយោគទូទាំងខេត្តមានចំនួន ១ ១៨៦គម្រោង ក្នុងនោះបានបញ្ចប់ ៥៩៥គម្រោង។ 

ឯកឧត្តម គួច ចំរើន ក៏បានលើកឡើងថា ក្នុងនោះផងដែរ រាជរដ្ឋាភិបាល បានផ្ដល់ការវិនិយោគ ទៅលើកោះ និងឆ្នេរ ដល់ក្រុមហ៊ុនចំនួន២៧ ដែលមានទុនវិនិយោគសរុប ៨ ៩០០ ៥៧០ ២៥១ដុល្លារអាមេរិក និងមានគម្រោងវិនិយោគ​ទៅលើវិស័យឧស្សាហកម្ម នៃការកែច្នៃម្ហូបអាហារ មានទុនវិនិយោគសរុប ១ ៧៥៣ ៩០០ដុល្លារអាមេរិក៕