សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេល ១១ខែ ឆ្នាំ២០២៥ គិតចាប់ពីខែមករា ដល់ខែវិច្ឆិកា ឆ្នាំ២០២៥ កម្ពុជាទទួលបានភ្ញៀវទេសចរអន្តរជាតិសរុបជាង ៥លាននាក់ (៥ ១៧២ ៨៤១នាក់) ធ្លាក់ចុះ ១៣,៨% ធៀបនឹងរយៈពេលដូចគ្នានៅឆ្នាំ២០២៤ ដែលមានជាង ៦លាននាក់(៦ ៧០០ ១២៥នាក់ ) ។ នេះបើយោងតាមស្ថិតិរបស់ក្រសួងទេសចរណ៍ចេញផ្សាយកាលពីថ្ងៃទី២៥ ខែធ្នូ ឆ្នាំ២០២៥។
ក្នុងចំណោមភ្ញៀវទេសចរអន្តរជាតិជាង ៥ លាននាក់ ទេសចរវៀតណាម ឈរនៅលំដាប់លេខរៀងទី១ មានចំនួន ១ ១១៥ ៤១៦ នាក់ ធ្លាក់ចុះ ៧,៣% , ចិនចំនួន ១ ១០៤ ៩៥២ នាក់ កើនឡើង ៤៣,៥% , ថៃ ១ ០១៣ ១៧៣ នាក់ ធ្លាក់ចុះ ៤៧% , អាម៉េរិកជាង ១៨៥ ៦៨៨ នាក់ ធ្លាក់ចុះ ២,៧% , កូរ៉េខាងត្បូងជាង ១៤៥ ៤៩៧ នាក់ ធ្លាក់ចុះ ១៦% ខណៈ ឥណ្ឌូនេស៊ី ជិត១៤ម៉ឺននាក់ , ឡាវ ជិត១៣ម៉ឺននាក់ , បារាំងជាង១២ម៉ឺននាក់ , អង់គ្លេសជាង ១១ម៉ឺននាក់ និងជប៉ុន ជាង៩ម៉ឺននាក់។
លោកជំទាវ ឆាយ ស៊ីវលីន ប្រធានទីភ្នាក់ងារទេសចរណ៍កម្ពុជា បានលើកឡើងថា៖ ចាប់តាំងពីមានការវាយប្រហារលើកទី១របស់យោធាថៃមកលើកម្ពុជា ភ្ញៀវទេសចរបានផ្លាស់ប្តូរផ្លូវ ដែលកន្លងមកភ្ញៀវបានធ្វើដំណើរកាត់ប្រទេសថៃ និងបណ្តាប្រទេសផ្សេងៗទៀត។ ភ្ញៀវភាគច្រើនធ្វើដំណើរតាមផ្លូវគោក ដោយសារមានបញ្ហាលើក្ដីបារម្ភពីសុវត្ថិភាពតាមផ្លូវអាកាសរវាងកម្ពុជា-ថៃ ដូច្នេះ ភ្ញៀវបានផ្លាស់ប្តូរផ្លូវធ្វើដំណើរ ខ្លះលុបចោលការធ្វើដំណើរ ហើយខ្លះទៀតបានផ្អាកតែម្ដង ។
លោកជំទាវបានបញ្ជាក់ថា៖
«ការវាយប្រហាររបស់ភាគីថៃមកលើកម្ពុជាដោយយន្តហោះចម្បាំង កាំភ្លើងធំ និងអាវុធទំនើបៗ ពិតជាទទួលរងផលប៉ះពាល់យ៉ាងខ្លាំង ធ្វើឱ្យភ្ញាក់ផ្អើលពិភពលោក និងធ្វើឱ្យទេសចរបារម្ភ ។ តែក៏មានទេសចរខ្លះមិនខ្លាច ហើយបានធ្វើដំណើរមកកម្ពុជា។ អ្នកដែលបានមកដល់ហើយ គឺពួកគាត់លែងបារម្ភ លែងខ្លាច ដោយសារទីភ្នាក់ងារទេសចរណ៍កម្ពុជា បានឃុំគ្រង ថែរក្សា ពួកគាត់បានល្អ និងណែនាំទៅកន្លែងណា ឬតំបន់ណា ដែលមានសុវត្ថិភាព»។
លោកជំទាវ ឆាយ ស៊ីវលីន បានលើកឡើងទៀតថា៖
« យើងមើលឃើញថា ដោយសារក្នុងរដូវ High Season ភ្ញៀវទេសចរកំពុងសម្រុកមកលេងកម្ពុជា ហើយភាគីថៃ ចង់បំផ្លាញយើង បំផ្លាញតំបន់ទេសចរណ៍យើង ។ ភាគីថៃ ហាក់ច្រណែនកម្ពុជាយើង ចង់ឱ្យយើងរងផលប៉ះពាល់ខ្លាំង»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក កម្ពុជា (PATA) បានប្រាប់ AMS Economy នាព្រឹកថ្ងៃទី២៦ ខែធ្នូ ថា ៖ ការធ្លាក់ចុះជាង ១០% នេះ មិនអាក្រក់ពេកទេ ។ ការរក្សាបានតួលេខជាង ៥លាននាក់ វាជាការណ៍ល្អហើយ ព្រោះជម្លោះពិភពលោក បញ្ហាភូមិសាស្ត្រនយោបាយអន្តរជាតិ ការគំរាមកំហែងផ្សេងៗ បាន និងកំពុងកើតឡើង ធ្វើឱ្យប៉ះពាល់ដល់កម្ពុជា ជាពិសេស ការឈ្លានពានដ៏ឃោរឃៅ និងដ៏កម្រោលរបស់យោធាថៃមកលើកម្ពុជា ជាមូលហេតុធំនៃការធ្លាក់ចុះសេដ្ឋកិច្ច និងទេសចរណ៍។
អ្នកជំនាញទេសចរណ៍រូបនេះបានបញ្ជាក់ថា ៖
«អ្វីដែលយើងអាចធ្វើបាន គឺខិតខំប្រឹងប្រែងទាំងអស់គ្នា និងបង្កើនការជំរុញផ្សព្វផ្សាយគោលដៅទេសចរណ៍ឲ្យបានកាន់តែទូលំទូលាយទៅកាន់ពិភពលោក»។
Account
Security
Favourite Content