ភ្នំពេញ៖ ក្នុងចំណោមទីផ្សារទេសចរណ៍សំខាន់ៗទាំង១០របស់កម្ពុជាប្រចាំឆ្នាំ២០២៥ គឺប្រទេសវៀតណាម ដោយទេសចរវៀតណាម បានមកទស្សនាកម្ពុជា មានចំនួនរហូតដល់ ១ ២២២ ១០១ នាក់ ស្មើនឹង ២១,៩%នៃចំនួនសរុប ថយចុះ ៨,៨% ធៀបនឹងឆ្នាំ២០២៤ ដែលមានចំនួន ១ ៣៤០ ៥៨៧។ នេះបើយោងតាមរបាយការណ៍របស់ក្រសួងទេសចរណ៍នៅក្នុងសន្និបាតបូកសរុបលទ្ធផលការងារវិស័យទេសចរណ៍ឆ្នាំ២០២៥ និងលើកទិសដៅការងារឆ្នាំ២០២៦នៅសណ្ឋាគារសុខា រាជធានីភ្នំពេញ។

នៅពីក្រោយទេសចរវៀតណាម, ចិន បានឈរនៅលំដាប់លេខ២ ដែលមានទេសចរ ១ ២០១ ៦៨១ នាក់ស្មើនឹង ២១,៦%នៃចំនួនសរុប និងកើនឡើង ៤១,៥% ធៀបនឹងឆ្នាំ២០២៤ ដែលមាន៨៤៨ ៩៥២ នាក់។ ទេសចរថៃឈរលំដាប់លេខ៣ ដែលមានទេសចរ ១ ០២២ ៧៤៣ នាក់ ធៀបនឹងឆ្នាំ២០២៤ ថយចុះ៥២,៤ភាគរយ ដែលមាន២ ១៤៦ ៦៧៤ នាក់។ អាម៉េរិកឈរលំដាប់លេខ៤ មានចំនួន ២០៦ ៧៩១នាក់ ថយចុះ៣,៦% ធៀបនឹងឆ្នាំ២០២៤ ដែលមាន២១៤ ៥២៦ នាក់។ ចំណែក កូរ៉េ លំដាប់លេខ៥ មានទេសចរ ១៥២ ៥៩៨ នាក់ ស្មើនឹង២,៧%នៃចំនួនទេសចរសរុប ធៀបនឹងឆ្នាំ២០២៤ ថយចុះ២០,៦%  ដែលមាន ១៩២ ៣០៥នាក់។ ឥណ្ឌូណេស៊ី ឈរលំដាប់ទី៦ ដែលមានទេសចរ១៤៩ ៨៤០ នាក់ ធៀបនឹងឆ្នាំ២០២៤ (១៦៦ ៧៩៥នាក់)ថយចុះ១០,២%។ ប្រទេសបារាំង លំដាប់ទី៧ មានទេសចរ ១៣៦ ២០១ នាក់ ធៀបនឹងឆ្នាំ២០២៤ (១៣១ ៧២៨នាក់)កើនឡើង ៣,៤%។ ប្រទេសឡាវ លំដាប់ទី៨ មានទេសចរ ១៣១ ៤៧២ នាក់ ធៀបនឹងឆ្នាំ២០២៤(៣៣៤ ៤៤៨ នាក់)ថយចុះ ៦០,៧%។ អង់គ្លេសឈរចំណាត់ថ្នាក់ទី៩ មានទេសចរ១២៧ ១៤១ នាក់ ធៀបនឹងឆ្នាំ២០២៤( ១១៥ ១៤៨នាក់)កើនឡើង ១០,៤% ។ រីឯប្រទេសជប៉ុន ជាទីផ្សារទេសចរណ៍ធំទី១០របស់កម្ពុជា ដោយមាន ទេសចរ១០៥ ៩៨៩ នាក់ស្មើនឹង ១,៩% នៃចំនួនសរុបនិងថយចុះ ៦,០% ធៀបនឹងឆ្នាំ២០២៤ ដែលមាន១១២ ២១៨នាក់ ។

របាយការណ៍ក្រសួងទេសចរណ៍បានឱ្យដឹងទៀតថា៖ ទេសចរមកពីតំបន់អាស៊ីប៉ាស៊ីហ្វិក  មានចំនួន ៤ ៥៨២ ៨៤១ នាក់ ស្មើនឹង ៨២,៣% នៃចំនួនសរុប ថយចុះ ២០,០% ក្នុងនោះតំបន់អាស៊ាន ២ ៧៧៣ ០៦០ នាក់ ស្មើនឹង ៤៩,៣% នៃចំនួនសរុប ថយចុះ ៣៤,៥%,តំបន់អឺរ៉ុប ៦៨៤ ៣៨៦ នាក់ ស្មើនឹង ១២,៣% នៃចំនួនសរុប កើនឡើង ៣,២%,តំបន់អាម៉េរិក ២៨៤ ២២៣ នាក់ ស្មើនឹង ៥,១% នៃចំនួនសរុប ថយចុះ ១,៩%។

គួរឱ្យដឹងផងដែរ នៅឆ្នាំ២០២៥ ទេសចរជាតិបានធ្វើដំណើរកម្សាន្តទូទាំងប្រទេសប្រមាណ ២៥ ១៦១ ៤៣០ នាក់ កើនឡើង ១១,៧% ហើយទេសចរបរទេសមានប្រមាណ ៣ ៧៤២ ៧៨៩ នាក់ ថយចុះ ៦,១% ធៀបនឹង ឆ្នាំ២០២៤ ។ ក្នុងនោះ តំបន់ភ្នំពេញ ទទួលបានទេសចរជាតិ ៩ ៩៨៤ ១៦២ នាក់ កើនឡើង ៩,៩% និងទេសចរបរទេស ១ ៨៨៥ ៧៥៦ នាក់ ថយចុះ ១៦,៩% ធៀបនឹងឆ្នាំ២០២៤។ ចំណែកសៀមរាបអង្គរ ទទួលបានទេសចរជាតិ ៣ ២៤៧ ៤៥៥ នាក់ កើនឡើង ៤៧,៥% និងទេសចរ បរទេស ៩៥៥ ១៣១ នាក់ ថយចុះ ៦,៧% ធៀបនឹងឆ្នាំ២០២៤។ ចំពោះតំបន់ឆ្នេរសមុទ្រ ទទួលបានទេសចរជាតិ ៩ ៤១៦ ៣០០ នាក់ កើនឡើង ៧,០% និង ទេសចរបរទេស ៦៣១ ៤៥៧ នាក់ កើនឡើង ៣៥,០% ធៀបនឹងឆ្នាំ២០២៤។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា(PATA) បានលើកឡើងថា ការរក្សាបានតួលេខទេសចរដូចបានបង្ហាញជូនខាងលើនេះ គឺជាការណ៍ល្អ ព្រោះជម្លោះពិភពលោក  បញ្ហាភូមិសាស្ត្រនយោបាយអន្តរជាតិ ការគំរាមកំហែងផ្សេងៗ បាន និងកំពុងកើតឡើង ធ្វើឱ្យប៉ះពាល់ដល់កម្ពុជា ជាពិសេសការឈ្លានពានរបស់យោធាថៃមកលើកម្ពុជាជាមូលហេតុធំនៃការធ្លាក់ចុះសេដ្ឋកិច្ច និងទេសចរ៕