កម្ពុជាតាមរយៈក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងបង្កើតរោងចក្រក្នុងទុនសរុបចំនួន ៧៧.៤លានដុល្លារអាមេរិក នៅក្នុងខែកក្កដា ឆ្នាំ២០២៣ កន្លងទៅនេះ ខណៈដែលទុនទាំងជិត ៨០លានដុល្លារ​នេះ កើតចេញពីគម្រោងបង្កើតរោងចក្រចំនួន៩ ដែលអាចបង្កើតការងារជូនពលរដ្ឋ​បានប្រមាណជាង ១ម៉ឺននាក់។

គម្រោងវិនិយោគទាំង ៩ នោះរួមមាន ៖

១. គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន “TARAL INTERNATIONAL CO., LTD”  ដែលមានទីតាំង​វិនិយោគ​ស្ថិតនៅផ្លូវជាតិលេខ៣ ភូមិព្រៃតាមួច និងភូមិត្រពាំងមាន ឃុំស្នំក្រពើ ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ២៥,៧លាន​ដុល្លារ​អាម៉េរិក និងអាចបង្កើត​ការងារបានចំនួន ៦.៩៣៥កន្លែង។

២. គម្រោងបង្កើតរោងចក្រផលិតស្រោមជើង ស្រោមដៃ អាវចាក់ និងសម្លៀកបំពាក់ របស់ក្រុមហ៊ុន “SUPER KNITTING (CAMBODIA) CO., LTD” ដែលមានទីតាំងវិនិយោគស្ថិតនៅភូមិហនុមាន ឃុំក្រាំងធ្នង់ ស្រុកបាទី ខេត្តតាកែវ ក្នុងទុនវិនិយោគប្រមាណ ៨,៩លាន​ដុល្លារ​អាម៉េរិក និងអាច​បង្កើតការងារបានចំនួន ៣.៥៦៩កន្លែង។

៣. គម្រោងបង្កើតរោងចក្រផលិតវ៉ែនតា និងដងវ៉ែនតាគ្រប់ប្រភេទរបស់ក្រុមហ៊ុន “UNITED CREATION OPTICAL (CAMBODIA) COMPANY LIMITED”  ដែលមានទីតាំងវិនិយោគស្ថិតនៅ Block K (ទី១១) និង Block Q (ទី១២) ផ្លូវជាតិលេខ៤១ (ផ្លូវព្រះអង្គឌួង) ភូមិវាលវង់ ឃុំសែនដី ស្រុកសំរោង ទង ខេត្តកំពង់ស្ពឺ ក្នុងទុនវិនិយោគប្រមាណ ៥,៨លានដុល្លារអាម៉េរិក និងអាចបង្កើតការងារបាន ចំនួន ៦៩៦នាក់។

៤. គម្រោងបង្កើតរោងចក្រចាក់សម្លៀកបំពាក់របស់ក្រុមហ៊ុន “ SSCA GARMENT CO., LTD” ដែលមានទីតាំងវិនិយោគស្ថិតនៅភូមិព្រែកបិ ឃុំកោះធំ (ខ) ស្រុកកោះធំ ខេត្តកណ្តាល ក្នុងទុនវិនិយោគប្រមាណ ៥,២លានដុល្លារអាម៉េរិក និងអាចបង្កើតការងារបានចំនួន ១.១៩១កន្លែង។

៥. គម្រោងបង្កើតរោងចក្រផលិតកាបូប ថង់យួរ និងស្រោមសម្លៀកបំពាក់របស់ក្រុមហ៊ុន “FOTON PACKAGING PRODUCT CO., LTD”  ដែលមានទីតាំងវិនិយោគស្ថិតនៅភូមិតាបួរ ឃុំពេជសារ ស្រុកកោះអណ្តែត ខេត្តតាកែវ ក្នុងទុនវិនិយោគប្រមាណ ៥,១លានដុល្លារអាម៉េរិក និងអាចបង្កើត​ការងារបានចំនួន ១.៣៣១កន្លែង។

៦. គម្រោងបង្កើតរោងចក្រផលិតសម្ភារៈប្រើប្រាស់ក្នុងផ្ទះគ្រប់ប្រភេទរបស់ក្រុមហ៊ុន “RUNZHIMAO HEALTH CO., LTD”  ដែលមានទីតាំង​វិនិយោគស្ថិតនៅភូមិព្រែកក្រាញ់ ឃុំសាមគ្គី ស្រុកព្រៃនប់ ខេត្តព្រះសីហនុ ក្នុងទុនវិនិយោគប្រមាណ ៩លានដុល្លារអាម៉េរិក និងអាច​បង្កើត​ការងារ​បានចំនួន ៤៨៥កន្លែង។

៧. គម្រោងបង្កើតរោងចក្រផ្គុំដំឡើងអំពូលភ្លើងលម្អគ្រប់ប្រភេទរបស់ក្រុមហ៊ុន “LITESUN HOMEDECOR CO., LTD”  ដែលមានទីតាំង​វិនិយោគស្ថិត​នៅភូមិអូរតាពូង ឃុំរកាកោះ ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៧,២លានដុល្លារអាម៉េរិក និងអាចបង្កើត​ការងារ​បានចំនួន ៤៦៥កន្លែង។

៨. គម្រោងបង្កើតរោងចក្រផលិតសម្ភារៈសម្អាតផ្ទះគ្រប់ប្រភេទរបស់ក្រុមហ៊ុន “BRIGHT PLASTIC (CAMBODIA) CO., LTD”  ដែលមាន​ទីតាំង​វិនិយោគស្ថិតនៅភូមិទួលធ្នង់ ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៥,៤លានដុល្លារអាម៉េរិក និងអាច​បង្កើតការងារបានចំនួន ២១៦កន្លែង។

៩. គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន “HEN YANG (CAMBODIA) APPAREL MANUFACTURING CO., LTD”  ដែលមានទីតាំងវិនិយោគស្ថិតនៅក្បាលដីលេខ៣៨១ ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ក្នុងទុន​វិនិយោគប្រមាណ ៥,១លានដុល្លារអាម៉េរិក និងអាចបង្កើតការងារបានចំនួន ២.១៤១កន្លែង៕