ភ្នំពេញ ៖ កម្ពុជា បានចូលរួមយ៉ាងសកម្មក្នុងដំណើរការរៀបចំ និងគំនិតផ្តួចផ្តើមនៃការជំរុញហិរញ្ញវត្ថុប្រកបដោយចីរភាព ហើយនឹងត្រៀមអនុវត្តគំនិតផ្តួចផ្តើមសំខាន់ៗបន្ថែមទៀតក្នុងគោលដៅបង្កើតឱ្យមានយន្តការគាំទ្រ និងប្រព័ន្ធអេកូឡូស៊ីចាំបាច់ ដើម្បីជំរុញហិរញ្ញវត្ថុប្រកបដោយចីរភាព និងសកម្មភាពជាសារវន្តក្នុងការពារហានិភ័យបណ្តាលមកពីបម្រែបម្រួលអាកាសធាតុ។

កាលពីថ្មីៗនេះ ដើម្បីចូលរួម​ចំណែក​ក្នុងការឆ្លើយតបទៅនឹង​​ផលប៉ះពាល់​ដែលបណ្តាល​មកពីការប្រែប្រួល​អាកាសធាតុ​ និង​បង្កើតបរិយាកាសអំណោយផល​សម្រាប់ទាក់ទាញហិរញ្ញប្បទានបៃតង ធនាគារជាតិនៃកម្ពុជា (NBC) និងសាជីវកម្មហិរញ្ញវត្ថុអន្តរជាតិ​ (IFC) បានចុះហត្ថលេខាលើកិច្ចព្រមព្រៀង​សហប្រតិបត្តិការ ​ដើម្បី​ជំរុញការផ្តល់ហិរញ្ញប្បទានសម្រាប់​គម្រោងបៃតងក្នុងគោលដៅ​គាំទ្រការផ្លាស់ប្តូរសេដ្ឋកិច្ច​កម្ពុជា​ទៅជាសេដ្ឋកិច្ចបៃតង​។

បច្ចុប្បន្ន ប្រទេស​កម្ពុជាជាប់ចំណាត់ថ្នាក់លេខ ៦២ ក្នុងចំណោមប្រទេស​ចំនួន​ ១៩១ ផ្អែក​លើ​សន្ទស្សន៍​នៃ​ការវាយតម្លៃហានិភ័យជាសកលពីប្រភពចំហលើកត្តាមនុស្សធម៌ និងគ្រោះមហន្តរាយ។ ប្រទេស​កម្ពុជា​ប្រឈម​ខ្លាំង​​ទៅ​នឹង​គ្រោះ​ទឹក​ជំនន់ និង​គ្រោះ​រាំង​ស្ងួត​ ដែល​​កាន់​តែ​មាន​ការ​​វិវិត្ត​មិន​ល្អ​​​ក្នុង​រយៈ​ពេល​ប៉ុន្មាន​ឆ្នាំ​នេះ។ ប្រសិនបើគ្មានវិធានការបន្សាំ និងការកាត់បន្ថយឱ្យបានត្រឹមត្រូវទេ​ ការប្រែប្រួលអាកាសធាតុអាចបណ្តាលឱ្យ​សេដ្ឋកិច្ច​កម្ពុជា​ថយ​ចុះ​ប្រមាណ​ ៩% នៃផលិតផលក្នុងស្រុកសរុប (GDP) ត្រឹម​ឆ្នាំ២០៥០ ខណៈដែល​អត្រា​ភាពក្រីក្រ​អាច​កើន​រហូតដល់  ៦%​ ត្រឹម​ឆ្នាំ​២០៤០។ នេះបើយោងតាមរបាយការណ៍របស់ធនាគារពិភពលោក និងសាជីកម្ម​ហិរញ្ញវត្ថុអន្តរជាតិ​ (IFC) ស្តីពីស្ថានភាពអាកាសធាតុនិងការអភិវឌ្ឍរបស់ប្រទេសកម្ពុជា/ Country Climate and Development Report (CCDR) ដែលទើបចេញផ្សាយកាលពីពេលថ្មីៗកន្លងទៅនេះ។​

របាយការណ៍នេះបានប៉ាន់ប្រមាណថា ប្រទេសកម្ពុជាត្រូវការការវិនិយោគបន្ថែមប្រមាណ​ ៣៦ពាន់លានដុល្លារ​អាមេរិក​ ពីវិស័យសាធារណៈ និងវិស័យឯកជន​ សម្រាប់រយៈពេល ៣ទសវត្សរ៍ខាងមុខ ដើម្បីសម្រេចបានតាម​គោលដៅអាកាសធាតុអព្យាក្រឹតកាបូននៅមុន​ឆ្នាំ២០៥០។

លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា ធ្លាប់មានប្រសាសន៍ថា ធនាគារជាតិនៃកម្ពុជា បានចូលរួមយ៉ាងសកម្មក្នុងដំណើរការរៀបចំ និងគំនិតផ្តួចផ្តើមនៃការជំរុញហិរញ្ញវត្ថុប្រកបដោយចីរភាព។ កិច្ចការក្នុងនោះរួមមាន៖ ១/-ការគាំទ្រការដាក់ចេញគោលការណ៍ហិរញ្ញវត្ថុប្រកបដោយចីរភាពរបស់សមាគមធនាគារនៅកម្ពុជា ដើម្បីឱ្យគ្រឹះស្ថានធនាគារ និងហិរញ្ញវត្ថុទាំងអស់ចូលរួមអនុវត្ត ២-ការរៀបចំក្របខ័ណ្ឌ សហប្រតិបត្តិការរវាងធនាគារជាតិនៃកម្ពុជា ក្រសួងបរិស្ថាន និងសមាគមធនាគារនៅកម្ពុជា ដើម្បីចែករំលែកព័ត៌មាន និងបង្កើតឲ្យមានគំនិតផ្ដួចផ្ដើមនានាសម្រាប់សកម្មភាពទប់ទល់បម្រែបម្រួលអាកាសធាតុ និង ៣/-ការបណ្តុះបណ្តាលនិងកសាងសមត្ថភាពទៅលើហិរញ្ញវត្ថុប្រកបដោយចីរភាព និងការការពារហានិភ័យបណ្ដាលមកពីបម្រែបម្រួលអាកាសធាតុសម្រាប់គ្រឹះស្ថានធនាគារនិងហិរញ្ញវត្ថុ និងភាគីពាក់ព័ន្ធ។

លោកជំទាវបណ្ឌិត ជា សិរី បានបន្តថា ក្រៅពីនេះ ធនាគារជាតិនៃកម្ពុជាក៏បានចូលរួមក្នុងក្របខ័ណ្ឌអន្តរជាតិតាមរយៈគំនិតផ្តួចផ្តើម និងកិច្ចពិភាក្សាជាមួយស្ថាប័នមួយចំនួនដូចជា បណ្តាញធនាគារកណ្តាល និងអាជ្ញាធរត្រួតពិនិត្យសម្រាប់ប្រព័ន្ធហិរញ្ញវត្ថុបៃតង (Network of Central Banks and Supervisors for Greening the Financial System-NFGS) ក្រុមការងារបរិយាបន្នហិរញ្ញវត្ថុបៃតង (Inclusive Green Finance Working Group-IGFWG) គម្រោងភាពជាដៃគូសម្រាប់សកម្មភាពសេដ្ឋកិច្ចបៃតងរបស់អង្គការសហប្រជាជាតិ (UN Partnership for Action on Green Economy – PAGE) និងក្រុមការងារអាស៊ានលើកិច្ចការបណ្តាញធនាគារនិងហិរញ្ញវត្ថុប្រកបដោយចីរភាព (ASEAN Taskforce on Sustainable Finance and Sustainable Banking Network)។

ធនាគារជាតិនៃកម្ពុជាក៏បានសហការជាមួយ អង្គការជាច្រើនដូចជា UNESCAP, សម្ព័ន្ធសម្រាប់បរិយាបន្នហិរញ្ញវត្ថុ (AFI) សាជីវកម្មហិរញ្ញវត្ថុ អន្តរជាតិ (IFC) ក្នុងកិច្ចការពង្រឹងការចូលរួមផ្ដល់ហិរញ្ញប្បទានបៃតង ព្រមទាំងបានវិនិយោគទុនបម្រុងអន្តរជាតិមួយផ្នែកលើសញ្ញាបណ្ណបៃតង និងបានក្លាយជាសមាជិកនៃគណៈកម្មការពិគ្រោះយោបល់ សម្រាប់មូលនិធិបៃតងក្នុងតំបន់អាស៊ីអាគ្នេយ៍ក្នុងឆ្នាំ២០២២ ផងដែរ។

លោកជំទាវបណ្ឌិត បានថ្លែងលើកឡើងដូច្នេះថា ៖«ទិសដៅបន្ត ធនាគារជាតិនៃកម្ពុជា នឹងអនុវត្តគំនិតផ្តួចផ្តើមសំខាន់ៗបន្ថែមទៀតក្នុងគោលដៅបង្កើតឱ្យមានយន្តការគាំទ្រ និងប្រព័ន្ធអេកូឡូស៊ីចាំបាច់ ដើម្បីជំរុញហិរញ្ញវត្ថុប្រកបដោយចីរភាព និងសកម្មភាពជាសារវន្តក្នុងការពារហានិភ័យបណ្តាលមកពីបម្រែបម្រួលអាកាសធាតុ»។

កិច្ចការទាំងនោះរួមមាន៖ ១/-ការបង្កើតផែនទីមគ្គុទ្ទេសក៍ហិរញ្ញវត្ថុប្រកបដោយចីរភាព (Sustainable Finance Roadmaps) ២/-ការបង្កើតប្រព័ន្ធវដ្តករសាស្ត្រសម្រាប់ហិញ្ញវត្ថុប្រកបដោយចីរភាព (Sustainable Finance Taxonomy) ៣/-ការរៀបចំយន្តការរាយការណ៍ ស្តីពីហិរញ្ញវត្ថុប្រកបដោយចីរភាព ដើម្បីតម្លាភាព និងការទទួលខុសត្រូវ (Reporting and Disclosure Framework) ៤/-ការកសាងសមត្ថភាព និងចំណេះដឹងដល់វិស័យធនាគារនិងហិរញ្ញវត្ថុ និងភាគីពាក់ព័ន្ធ (Capacity Building and Awareness Raising) និង៥/-ការពង្រឹង ក្របខ័ណ្ឌវាយតម្លៃ និងការពារហានិភ័យបណ្ដាលមកពីបម្រែបម្រួលអាកាសធាតុរបស់គ្រឹះស្ថានធនាគារនិងហិរញ្ញវត្ថុ (Climate Risks Analysis and Mitigation) ជាដើម។

ទាក់ទងនឹងកិច្ច​សហប្រតិបត្តិការ ដើម្បី​ជំរុញការផ្តល់ហិរញ្ញប្បទានសម្រាប់​គម្រោងបៃតងរវាងកម្ពុជា និង IFC វិញ កិច្ចប្រតិបត្តិការនេះ នឹងជួយពង្រឹងក្របខ័ណ្ឌបទប្បញ្ញត្តិ តាមរយៈការ​បង្កើត​ប្រព័ន្ធវត្តិករសាស្រ្តហិរញ្ញវត្ថុជាតិ (National Taxonomy)​ ស្របតាមឧត្តមានុវត្តន៍អន្តរជាតិ ដែលនឹងជួយកំណត់ទ្រព្យសកម្មដែលមានចារឹកលក្ខណៈជាការវិនិយោគបៃតង។

លើសពីនេះ កិច្ច​សហប្រតិបត្តិការ​នេះ​នឹងជួយបង្កើន​សមត្ថភាពស្ថាប័នហិរញ្ញវត្ថុ ព្រមទាំង​រៀបចំគោលការណ៍ណែនាំពាក់ព័ន្ធ ដូចជាការរាយការណ៍​និង​ស្តង់ដារនៃការបង្ហាញព័ត៌មាន​ទាក់ទងនឹង​ការផ្តល់ឥណទាន​បៃតង និងគម្រោងហិរញ្ញប្បទាននានាពាក់ព័ន្ធនឹង​ហានិភ័យបរិស្ថាន សង្គម និង​ អភិបាលកិច្ច (ESG)។

លោក ASAD YAQUB ប្រធានសាជីវកម្មហិរញ្ញវត្ថុអន្តរជាតិប្រចាំនៅកម្ពុជា បានលើកឡើងថា ក្នុងនាមជាអ្នកនាំមុខផ្នែកហិរញ្ញប្បទានបៃតងសកល ​សាជីវកម្មហិរញ្ញវត្ថុអន្តរជាតិមានជំហរពិសេសក្នុងការជួយប្រទេសកម្ពុជាកៀរគរហិរញ្ញប្បទាន​​សម្រាប់​សកម្មភាព​ទប់ទល់​បម្រែបម្រួល​អាកាសធាតុ​​ ដើម្បី​ចូលរួមចំណែកក្នុង​ផែនការពង្រីក​​កំណើន​បរិយាបន្ន​បៃតងដើម្បី​ពង្រឹក​ភាពធន់​សេដ្ឋកិច្ច​កម្ពុជានាពេល​អនាគត ។

ដោយមានការគាំទ្រពីគម្រោងសម្រាប់សេវាប្រឹក្សា​ការ​វិនិយោគ​បម្រែបម្រួល​បរិយាកាស (Facility for Investment Climate Advisory Services, FIAS) គម្រោងនេះមាន​រយៈពេល ៣ឆ្នាំ ហើយប្រព័ន្ធវត្តិករសាស្រ្តហិរញ្ញវត្ថុជាតិ ត្រូវបានរំពឹងថានឹងដាក់ឱ្យដំណើរការនៅឆ្នាំ២០២៥៕