ភ្នំពេញ ៖ របាយការណ៍របស់សហព័ន្ធស្រូវអង្ករកម្ពុជា (CRF) បានបង្ហាញថា ក្នុងរយៈពេល ៥ខែ នៃឆ្នាំ២០២៤ កម្ពុជាបាននាំចេញអង្ករទទួលបានប្រាក់ចំណូលចំនួន ២១៩លានដុល្លារអាមេរិក កើនឡើង១៤ ភាគរយពីចំនួន១៩១ លានដុល្លារអាមេរិក ដែលបានកត់ត្រាក្នុងរយៈពេលដូចគ្នាកាលពីឆ្នាំមុន ។

ប្រទេសកម្ពុជាបាននាំចេញអង្ករបានចំនួន ៣០២ ៥៩២ តោន តោនក្នុងរយៈពេលប្រាំខែដំបូងនៃឆ្នាំ២០២៤នេះ កើនឡើង ៨.៧ ភាគរយពីចំនួន ២៧៨,១៨៤តោន ដោយអង្ករត្រូវបានដឹកជញ្ជូនទៅកាន់គោលដៅចំនួន៦៣ តាមរយៈអ្នកនាំចេញចំនួន៤៩ ក្រុមហ៊ុន ដោយក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន២៦ ក្នុងបរិមា​ណអង្ករចំនួន ១៣៦ ៥២៨ តោន គិតជាទឹកប្រាក់ចំនួន ១០៤.៤០ លានដុល្លារសហរដ្ឋអាមេរិក។

បើតាមសហព័ន្ធស្រូវអង្ករកម្ពុជា ការនាំអង្ករទៅកាន់ប្រទេសចិន រួមទាំងហុងកុង និងម៉ាកាវ មានចំនួន ៧៣ ៣២០ តោន គិតជាទឹកប្រាក់ចំនួន ៤៦.២០ លានដុល្លារសហរដ្ឋអាមេរិក ។ ទៅកាន់ប្រទេសក្នុងអាស៊ាន រួមទាំងទីម័រខាងកើត ចំនួន៧ប្រទេសបានបរិមាណ ចំនួន ៦៥ ៤១២ តោន គិតជាទឹកប្រាក់ចំនួន ៤៦.៣៤ លានដុល្លារសហរដ្ឋអាមេរិក និងទៅកាន់គោលដៅ២៧ ផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន ២៧ ៣៣០ តោន គិតជាទឹកប្រាក់ចំនួន ២២.៩៦ លានដុល្លារសហរដ្ឋអាមេរិក។

ចំពោះពូជអង្ករដែលបាននាំចេញរួមមាន អង្ករក្រអូប អង្ករសគ្រាប់វែង អង្ករស និងអង្ករសរីរាង្គ ខណៈដែលអង្ករក្រអូបមានចំនួន៧១ ភាគរយនៃការនាំចេញអង្ករសរុប។ ជាមួយគ្នានេះដែរ ប្រទេសកម្ពុជាក៏បាននាំចេញស្រូវចំនួន ២,៤៧៣,២១២តោនស្រូវសើម ដែលគិតជាទឹកប្រាក់បានប៉ាន់ប្រមាណជាង ៧១០.២៣ លានដុល្លារសហរដ្ឋអាមេរិក ដែលក្នុងនោះ ៧២% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។

ដោយឡែក កាលពីពេលថ្មីៗនេះគណៈប្រតិភូ​សហ​ព័ន្ធ​ស្រូវ​អង្ករ​កម្ពុជា​ CR​F​ ​​មាន​សុទិដ្ឋិនិយម​ក្នុង​ការពង្រីក​ទី​ផ្សារ​អង្ករ​​បន្ទាប់ពី​បាន​ចូលរួម​ប្រកបដោយ​ផ្លែផ្កា​​ដោយ​​បានទាក់ទាញ ចំណាប់អារម្មណ៍​យ៉ាង​ខ្លាំង​ពី​អ្នកចូលរួម​នៅ​ទូទាំង​ម​ជ្ឈឹ​ម​បូព៌ា​ ​និង​អាហ្វ្រិកនៅ​ក្នុង​ពិព័រ​ណ៍​អាហារ​អន្តរជាតិ The Saudi Food Show ​ដែល​ប្រារព្ធ​ឡើង​នៅ​ទីក្រុង​រី​យ៉ាដ​ ​ប្រទេស​អា​រ៉ា​ប៊ី​សា​អូ​ឌីត​។​

តំណាង​រោង​ម៉ាស៊ីនកិនស្រូវ​ ​និង​អ្នកនាំ​ចេញអង្ករ​ឈាន​មុខ​គេ​ចំនួន​ ៤ បានចូលរួមក្នុងពិព័រណ៍អាហារអន្តរជាតិនេះស្របតាមគំនិតផ្តួចផ្តើមរបស់រដ្ឋាភិបាលក្នុងការធ្វើពិពិធកម្មទីផ្សារនាំចេញអង្ករ ហើយ​គុណភាព​ខ្ពស់​ ​និង​រសជាតិ​ប្លែក​នៃ​អង្ករ​កម្ពុជា​បាន​ធ្វើ​ឱ្យ​អ្នកចូលរួម​ចាប់អារម្មណ៍​ ​អ្នកទិញ​បរទេស​ជាច្រើន​បង្ហាញ​ចំណាប់អារម្មណ៍​ក្នុង​ការ​បង្កើត​ភាពជា​ដៃគូ​​នឹង​ជួយ​ឱ្យ​អង្ករ​កម្ពុជាមាន​សក្តានុពល​ក្នុង​ការពង្រីក​ទី​ផ្សារ​នាំចេញ​អង្ករ​របស់​ខ្លួន​។​

សូមជម្រាបថា អា​រ៉ា​ប៊ី​សា​អូ​ឌីត​ ​ដែល​ជា​ប្រទេស​ធំ​ជាងគេ​នៅ​មជ្ឈិមបូព៌ា​កំពុង​មាន​កំណើន​សេដ្ឋកិច្ច​គួរ​ឱ្យ​កត់​សម្គាល់​ ​និង​ជាទី​ផ្សារ​ដ៏​មាន​សក្តានុពល​សម្រាប់​អង្ករ​កម្ពុជា​ ​ហើយ​វា​អាច​ដើរ​តួនាទី​យ៉ាងសំខាន់​ក្នុង​ការពង្រីក​ទី​ផ្សារ​ថ្មីនេះផងដែរ​ ព្រោះជា​ប្រពៃណី​ ​ការនាំចេញ​អង្ករ​របស់​កម្ពុជា​ត្រូវ​បាន​ប្រមូលផ្តុំ​យ៉ាង​ខ្លាំង​នៅ​ក្នុង​បណ្តា​ប្រ​ទេស​ដូចជា​វៀតណាម​ ​ចិន​ ​និង​សហភាព​អឺរ៉ុប​។​ ​យ៉ាងណាក៏ដោយ​ រាជ​រដ្ឋាភិបាល​ ​និង​CR​F​ ​បាន​និង​កំពុង​ជំរុញ​ការនាំចេញ​អង្ករ​កម្ពុជា​ទៅ​តំបន់​ថ្មីៗ​។​

យោង​តាម​ សហព័ន្ធស្រូវអង្ករកម្ពុជា ទីផ្សារអង្ករនៅក្នុងតំបន់ទាំងពីរនេះ បានការកើនឡើងគួរឱ្យកត់សម្គាល់ ក្នុងនោះតំបន់មជ្ឈឹមបូព៌ា បានកើនពី១ ៣៩៨ តោន នៅឆ្នាំ២០១៥ ដល់៧ ៥២១ តោននៅឆ្នាំ២០២៣។ ទីផ្សារក្នុងតំបន់អាហ្វ្រិកបានកើនពី៤ ២៨៤ តោន នៅក្នុងឆ្នាំ២០១៥ ដល់ ៥២ ៨២៨ តោននៅឆ្នាំ២០២៣ ៕