ភ្នំពេញ ៖ របាយការណ៍របស់ក្រសួងពាណិជ្ជកម្មបានបង្ហាញថា រយៈពេល៩ខែ ឆ្នាំ២០២៣នេះ កម្ពុជាបាននាំចេញទំនិញទៅកាន់បណ្ដាប្រទេសសមាជិក​កិច្ចព្រមព្រៀងភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​តំបន់​ RCEP (Regional Comprehensive Economic Partnership) មានទឹកប្រាក់ ៥,៨១លានដុល្លារ កើនឡើង២៣%។

របាយការណ៍​ក្រសួងពាណិជ្ជកម្ម​បានបញ្ជាក់ថា ចន្លោះ​ពី​ខែមករា ដល់​ខែកញ្ញា ឆ្នាំ២០២៣ កម្ពុជា​បាន​នាំចេញ​ទំនិញ​មានតម្លៃប្រមាណ ៥ ៨១៣លានដុល្លារ កើនឡើង២៣,៥៩​ ភាគរយ​ពី​ចំនួន ៤,៧ ​ពាន់​លាន​ដុល្លារ​នា​រយៈពេល​ដូចគ្នា​ឆ្នាំ​ ២០២២​។ ចំណែកបណ្តាប្រទេសសមាជិក RCEP នាំចូលមកកាន់កម្ពុជាវិញមានទឹកប្រាក់ ១៦ ០០០លានដុល្លារ ថយចុះចំនួន១៧,៣៦ ​ភាគរយ ពី​ចំនួន ១៩,៣៦​ ពាន់​លាន​ដុល្លារ។

ដោយឡែកសម្រាប់​ទំហំពាណិជ្ជកម្មរបស់កម្ពុជាជាមួយ RCEP ក្នុងរយៈពេល៩ខែ ឆ្នាំ២០២៣នេះ មានទឹកប្រាក់ចំនួន ២១ ៨១៣លានដុល្លារ ថយចុះ ៩,៣៦ ​ភាគ​​រយ​ពី ២៤,០៧​ ពាន់​លាន​ដុល្លារ​។

កិច្ចព្រមព្រៀង RCEP បានចូលជាធរមាន នៅថ្ងៃទី១ ខែមករា ឆ្នាំ២០២១ ដោយនឹងក្លាយជាកម្លាំងចលករដ៏សំខាន់ក្នុងការជំរុញកំណើនពាណិជ្ជកម្ម ទំនិញ សេវាកម្ម និងវិនិយោគ កាន់តែធំជាងមុន ជាពិសេសផ្តល់ទីផ្សារបន្ថែមលើមុខទំនិញថ្មីរាប់រយមុខបន្ថែមទៀតសម្រាប់ការនាំចេញពីកម្ពុជា។

RCEP ជា​កិច្ចព្រមព្រៀង​ពា​ណិ​ជ្ជ​កម្ម​សេរី​ដ៏​ធំ​លើ​ពិភពលោក ​ដែលមាន​សមាជិកចូលរួមចំនួន១៥ ប្រទេសរួមមាន៖ ប្រទេសជាសមាជិកអាស៊ានទាំង១០ និងដៃគូពាណិជ្ជកម្មសេរី ចំនួន៥ទៀត មានអូស្ត្រាលី ចិន ជប៉ុន កូរ៉េខាងត្បូង និងណូវែលហ្សេឡង់ ដែលមានប្រជាជនសរុបប្រមាណ ២ ២០០លាននាក់ ឬ ៣០ភាគរយនៃប្រជាជនពិភពលោក។

លោកបណ្ឌិត ហុង វណ្ណៈ​ ប្រធាននាយកដ្ឋានសេដ្ឋកិច្ចអន្តរជាតិ នៃវិទ្យាស្ថានទំនាក់ទំនងអន្តរជាតិ-កម្ពុជា​នៃ​រាជ​បណ្ឌិត្យ​សភា​កម្ពុជា ​បាន​ប្រាប់ AMS​ ថា ជាការកត់សម្គាល់ ចំពោះ​ទំហំពាណិជ្ជកម្ម និងការនាំ​ចេញពី​កម្ពុជា​ទៅ​​ទីផ្សារ​អន្តរជាតិ ពិសេស​ទៅ​បណ្តា​ប្រទេស​នៃ​កិច្ចព្រមព្រៀង ​RCEP គឺមានការកើនឡើង​។

បណ្ឌិត ហុង វណ្ណៈ​ បានមានប្រសាសន៍ថា​ ក្នុងក្របខ័ណ្ឌRCEP បាន​ចូលរួម​ចំណែក​យ៉ាងច្រើន​ក្នុង​ការបើក​ទីផ្សារ​នាំចេញ​ផលិតផល​កម្ពុជា​ទៅ​ទីផ្សារ​អន្តរជាតិ ដូចជាទីផ្សារបើកថ្មី គឺទីផ្សារប្រទេសហ្វីលីពីន និងឥណ្ឌូនេស៊ី ជាដើម ។​

សូមជម្រាបថា ប្រទេសដែលជា​ទិសដៅ​នាំចេញ​កំពូល​ទាំង ​៣ របស់​កម្ពុជា​នៅក្រោម RCEP រួមមាន វៀតណាម មានតម្លៃ ២,០៤​ ពាន់​លាន​ដុល្លារ កើន ៣០,៦៨​ភាគរយ​, ចិន ១,០៦ ​ពាន់​លាន​ដុល្លារ កើន ១៨,២៧ ​ភាគរយ​, និង​ប្រទេស​ជប៉ុន ៨៨៥,៧៤​ លាន​ដុល្លារ ធ្លាក់ចុះ ១,៣៣​ ភាគរយ​។ ចំណែក​ការនាំ​ចូល​ពី​ប្រទេស​សំខាន់ៗ​ចំនួន​ ៣ រួមមាន ប្រទេស​ចិន ៨,០៤ ​ពាន់​លាន​ដុល្លារ កើនឡើង ១,៧៧ ​ភាគរយ​, វៀតណាម ២,៧៣ ​ពាន់​លាន​ដុល្លារ ធ្លាក់ ១០,៩៩ ​ភាគរយ និង​ថៃ ២,១៧​ ពាន់​លាន​ដុ​​ល្លារ ធ្លាក់ចុះ ២៧,០៥ ​ភាគរយ​។

​លោកបណ្ឌិត បានបញ្ជាក់ថា តាមរយៈ RCEP កម្ពុជា​​នឹង​ទទួលបាន​អត្ថប្រយោជន៍​បន្ថែម​ពី​កិច្ចព្រមព្រៀង​នេះ​ ដូចជាការ​ផ្ទេរ​បច្ចេកវិទ្យា ចំណេះដឹង ចំណេះធ្វើ និង​ជំនាញ​ថ្មីៗ​ពី​ការវិនិយោគ​ផ្ទាល់​ពី​បរទេស និង​បង្កើត​ការងារ​ថ្មីៗ​ ជា​ពិសេស កម្ពុជា​ទទួលបាន​ភាព​អនុគ្រោះ​ពន្ធ​លើ​ទំនិញ​នាំចេញ​ជាច្រើន ដូចជា ទំនិញ​កសិកម្ម ក​សិ​កម្មកែច្នៃ និង​ទំនិញកសិ-​ឧស្សាហកម្ម​ ហើយ​ផលិតផលសំខាន់ជាងគេក្នុងក្របខ័ណ្ឌ RCEP មានតែកសិផលទេដែលមានលក្ខណៈសម្បត្តិប្រកួតប្រជែងបានច្រើន និងជាទំនិញប្រកបដោយគុណភាព មានអនាម័យនៅក្នុងថ្នាក់តំបន់។

បណ្ឌិត ហុង វណ្ណៈ​ ​បានមានប្រសាសន៍ថា​ ​កម្ពុជា​ពេលនេះ​បានរៀបចំ​ខ្លួន​យ៉ាង​ល្អ ពោលគឺ​នៅពេលណា​មាន​ការបញ្ជាទិញ​ពី​ទីផ្សារ​អន្តរជាតិ​កើនឡើង​ គឺ​កម្ពុ​ជាមាន​សមត្ថភាព​គ្រប់គ្រាន់​ ​ដើម្បី​ឆ្លើយតប​នឹង​ការបញ្ជាទិញ​ពី​គ្រប់​គោលដៅ ហើយឱ្យគេចងចាំថា កម្ពុជាជាប្រទេសមានកសិផលកែច្នៃបានល្អ ដើម្បីសម្គាល់អត្តសញ្ញាណប្រចាំកម្ពុជាយើង​​​។