ភ្នំពេញ៖ ដើម្បីផ្តល់ការគាំទ្រដល់សហគ្រាសធុនតូច និងមធ្យមឲ្យបានទូលំទូលាយ ធនាគារ សហគ្រាសធុនតូច និងមធ្យម កម្ពុជា (SME Bank) បាន និងកំពុងចាប់ដៃគូសហការជាមួយសមាគម និងស្ថាប័នជាច្រើន ក្នុងគោលបំណងចូលរួមលើកកម្ពស់ និងអភិវឌ្ឍសហគ្រាសធុនតូច និងមធ្យមនៅកម្ពុជាឲ្យកាន់តែមានប្រសិទ្ធភាព។

ធនាគារសហគ្រាសធុនតូច និងមធ្យមកម្ពុជា នឹងបញ្ចុះអត្រាការប្រាក់ប្រចាំឆ្នាំ ០.២៥% សម្រាប់សហគ្រាសជាសមាជិកនៃសមាគម ឬស្ថាប័នដៃគូដែលមានដូចជា៖ សមាគមសហគ្រិនស្ត្រីកម្ពុជា សមាគមអ្នកផ្គត់ផ្គង់ទឹកស្អាតកម្ពុជា សមាគមសហគ្រិនវ័យក្មេងកម្ពុជា សមាគមស្វាយចន្ទីកម្ពុជា សមាគមអ្នកផលិតចំណីអាហារកម្ពុជាសម្ព័ន្ធសមាគមសហគ្រាសធុនតូច និងមធ្យមកម្ពុជា សហគ្រិនខ្មែរ ក្រុមហ៊ុនបញ្ជី ហ្វាញថេក ឯ.ក ក្រុមហ៊ុន អាហ្រ្គីប៊ី (ខេមបូឌា) ម.ក ស៊ីអ៊ី និងអូម៉ាស្ទឺក្លឹប។

សហគ្រាសធុនតូច និង​មធ្យម​ បានកំពុងដើរតួរជាឆ្អឹងខ្នងនៃសេដ្ឋកិច្ចជាតិ ដូច្នេះហើយដើម្បីគាំទ្រ និងជំរុញឱ្យមានកំណើនជាបន្តបន្ទាប់ ក៏ដូចជាពង្រីកអាជីវកម្មខ្នាតតូច និងមធ្យម​របស់ SME​ ការលើកទឹកចិត្ត​ផ្នែក​គោលនយោបាយត្រូវបានផ្តល់ជូនភាគច្រើនក្រោម​ទម្រង់ជា ការ​កាត់បន្ថយពន្ធ និងការលើកលែងពន្ធតែ​ក៏មាន​ទម្រង់​ជាកម្ចី​សម្បទានដែលមានរយៈ​ពេលអនុគ្រោះវែង​ និងកម្មវិធីគាំទ្រជាក់លាក់ដែលផ្តល់ហិរញ្ញប្បទានដោយក្រសួងពាក់ព័ន្ធ ឬអង្គការអន្តរជាតិផងដែរ​។

សូមជម្រាបថា គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម ជំហានទី២ (“SCFS-II”) ជាគម្រោងដែលមានលក្ខណៈ ប្រហាក់ប្រហែលទៅនឹង គម្រោង​សហហិរញ្ញប្បទាន ជំហានទី១ដែរ តែជំហានទី២ នេះត្រូវបានកែសម្រួលឲ្យមានលក្ខខណ្ឌប្រសើរជាងមុន ស្របតាមគោលដៅរបស់រាជរដ្ឋាភិបាល ដើម្បីជួយសម្រួល​ដល់​ការផ្តល់សេវាហិរញ្ញវត្ថុជូនដល់សហគ្រាសដែលចុះបញ្ជី និងមិនចុះបញ្ជី យ៉ាងមានប្រសិទ្ធភាព ក្នុងគោលបំណងគាំទ្រដល់សហគ្រាសធុនតូច និងមធ្យមក្នុងស្រុក សំដៅជំរុញការធ្វើពិពិធកម្មសេដ្ឋកិច្ច និងបង្កើនការនាំចេញ។

យ៉ាងណាមិញ គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម គាំទ្រអាជីកម្មទាំងឡាយដែលស្ថិតនៅក្នុងវិស័យអាទិភាពដូចជា៖ ផលិតកម្ម និងការកែច្នៃចំណីអាហារ សហគ្រាសដែលស្ថិតនៅក្នុងតំបន់ប្រមូលផ្តុំដោយសហគ្រាសធុនតូច និងមធ្យម និងសហគ្រាសដែលអភិវឌ្ឍតំបន់ កម្មន្តសាលដែលផលិតទំនិញប្រើប្រាស់ប្រចាំថ្ងៃ កម្មន្តសាលដែលផលិតគ្រឿងបង្គំ ឬ គ្រឿងបន្លាស់ដើម្បីផ្គត់ផ្គង់ឲ្យកម្មន្តសាលដទៃទៀត។

បន្ថែមពីនោះមានដូចជា កម្មន្តសាលដែលផលិតឧបករណ៍វេជ្ជសាស្ត្រ និងឱសថ កម្មន្តសាលដែលផលិតទំនិញបម្រើឲ្យវិស័យទេសចេរណ៍ អាជីវកម្មលើការស្រាវជ្រាវ និងអភិវឌ្ឍបច្ចេកវិទ្យាព័ត៌មានដែលមានលក្ខណៈនវានុវត្តន៍ អាជីវកម្មទាំងឡាយដែលគាំទ្រវិស័យអទិភាព និងគម្រោងសហហិរញ្ញប្បទាននេះក៏គាំទ្រផងដែរ ទៅកាន់វិស័យធម្មតាដូចជា ការលក់ដុំ លក់រាយ ព្រមទាំងសេវាកម្មផងដែរ៕