សៀមរាប៖ក្រុមប្រឹក្សាអភិវឌ្ឍន៍កម្ពុជា(CDC)និងកម្មវិធីភាពប្រកួតប្រជែងសហគ្រាសជាតិកាន់តែប្រសើរ(ICONE)របស់ទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ) បានរៀបចំសន្និសីទជំរុញវិនិយោគឆ្នាំ ២០២៣ ក្រោមមូលបទ”ភាពជាដៃគូសម្រាប់ការអភិវឌ្ឍសង្គម-សេដ្ឋកិច្ចប្រកបដោយចីរភាព” នៅមជ្ឈមណ្ឌលសន្និបាតសុខាខេត្តសៀមរាប កាលពីថ្ងៃទី៣ ខែតុលា ឆ្នាំ២០២៣។
សន្និសីទនេះ មានគោលបំណងផ្តល់ជាថ្នាលសម្រាប់ផ្លាស់ប្តូរទស្សនទាន និងឧត្តមានុវត្តន៍ក្នុងការជំរុញទាក់ទាញវិនិយោគសម្រាប់ការអភិវឌ្ឍសង្គម-សេដ្ឋកិច្ច។
ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា បានថ្លែងសុន្ទរកថាបើកដោយគូសរំលេចអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការធ្វើឱ្យប្រសើរឡើងនូវបរិស្ថានវិនិយោគនិងបរិយាកាសធុរកិច្ចនៅកម្ពុជារួមមានការធ្វើពិពិធកម្មសេដ្ឋកិច្ច, ការលើកកម្ពស់ភាពប្រកួតប្រជែង និងការអភិវឌ្ឍវិស័យឯកជននិងការងារ។
ជាមួយគ្នានេះឯកឧត្តមបានគូសបញ្ជាក់អំពីការត្រៀមខ្លួនរបស់កម្ពុជាក្នុងការចាកចេញពីប្រទេសមានការអភិវឌ្ឍតិចតួចនិងការចូលរួមចំណែកពីភាគីពាក់ព័ន្ធដើម្បីអភិវឌ្ឍវិស័យគន្លឹះនិងប្រភពកំណើនថ្មីសម្រាប់ស្តារសេដ្ឋកិច្ចជាតិក្រោយវិបត្តិជំងឺកូវីដ១៩ប្រកបដោយការប្តេជ្ញាចិត្តខ្ពស់ក្នុងការឈានឆ្ពោះសម្រេចបាននូវការកសាងសង្គមកម្ពុជាដែលមានកំណើន, ការងារ, សមធម៌, ប្រសិទ្ធភាព និងចីរភាព និងការកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ ២០៥០ដោយស្របតាមត្រីវិស័យនៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧។
បន្ថែមពីលើនេះទៀតឯកឧត្តមក៏បានជម្រាបជូនអង្គសន្និសីទអំពីវឌ្ឍនភាពការងាររបស់ក្រុមប្រឹក្សាអភិវឌ្ឍន៍កម្ពុជាក្នុងការកែលម្អនូវរបបវិនិយោគរបស់កម្ពុជា តាមរយៈការប្រកាសឱ្យប្រើច្បាប់ស្តីពីវិនិយោគកាលពីថ្ងៃទី១៥ ខែតុលា ឆ្នាំ ២០២១និងការដាក់ចេញនូវអនុក្រឹត្យស្តីពីការអនុវត្តច្បាប់ស្តីពីវិនិយោគថ្ងៃទី២៦ ខែមិថុនា ឆ្នាំ ២០២៣ដែលវត្តមាននៃលិខិតបទដ្ឋានគតិយុត្តទាំងពីរនេះនឹងចូលរួមចំណែកក្នុងការទាក់ទាញ និងជំរុញវិនិយោគក្នុងព្រះរាជាណាចក្រកម្ពុជា ក៏ដូចជាការវិនិយោគផ្ទាល់ពីបរទេសមកបន្ថែមទៀតតាមរយៈការផ្តល់នូវបរិស្ថានវិនិយោគ និងការបង្កើតនូវក្របខ័ណ្ឌគតិយុត្តដែលបើកចំហ, មានតម្លាភាព,អាចប៉ាន់ប្រមាណទុកជាមុនបានប្រកបដោយភាពអំណោយផលសម្រាប់ការវិនិយោគ ក្នុងគោលដៅអភិវឌ្ឍសង្គម-សេដ្ឋកិច្ចប្រកបដោយចីរភាព និងបរិយាបន្ន។
ក្នុងវេទិកានោះ វាគ្មិនមកពីក្រុមប្រឹក្សាអភិវឌ្ឍន៍កម្ពុជា, ដៃគូអភិវឌ្ឍន៍ និងវិស័យឯកជនក៏បានធ្វើបទបង្ហាញដោយគ្របដណ្តប់លើប្រធានបទ (១) គោលនយោបាយជាតិនិងផែនទីបង្ហាញផ្លូវសម្រាប់ទាក់ទាញនិងជំរុញវិនិយោគ (២)នីតិវិធីចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ (៣) ការវិនិយោគ និងគោលដៅអភិវឌ្ឍន៍ប្រកបដោយចីរភាព(៤)ទស្សនវិស័យនិងតម្រូវការនៃការវិនិយោគផ្ទាល់ពីបរទេស និង (៥) អានុភាពនៃបច្ចេកវិទ្យាក្នុងការជំរុញវិនិយោគ៕ ដោយៈ ញ៉ែម សុផល