សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទឹកឃ្មុំ ជាសារធាតុរាវម្យ៉ាងដែលបង្កើតចេញពីសត្វឃ្មុំ មិនថាទោះជាឃ្មុំធម្មជាតិ ឬឃ្មុំចិញ្ចឹមនោះទេ វាមានរសជាតិផ្អែម អាចទទួលទាន ឬធ្វើជាឱសថក៏បាន និងមានផ្ទុកនូវសារធាតុចិញ្ចឹមល្អៗជាច្រើនដែលអនុគ្រោះដល់ការថែបំប៉នសុខភាព និងសម្រស់ផងដែរ។ ដោយសារតែមានប្រយោជន៍ច្រើនបែបនេះហើយ ទើបធ្វើឱ្យតម្រូវការទឹកឃ្មុំមានការកើនឡើងជាបន្តបន្ទាប់ រហូតមានការបង្កើត និងពង្រីកវិសាលភាពទីតាំងចិញ្ចឹមយកទឹកជាបន្តបន្ទាប់ ដើម្បីបំពេញតាមតម្រូវការទីផ្សារ។
បារាយណ៍ហាន់នី ជាឈ្មោះកសិដ្ឋានចិញ្ចឹមឃ្មុំមួយកន្លែងដែលត្រូវបានបង្កើតឡើងដោយនិស្សិតរៀនជំនាញវិទ្យាសាស្ត្រព្រៃឈើ នៅសាកលវិទ្យាល័យកសិកម្មព្រែកលៀប ដែលបានចាប់អារម្មណ៍ ក៏ដូចជាប្រើប្រាស់ជំនាញរបស់ខ្លួនមកចិញ្ចឹមឃ្មុំតាមបែបធម្មជាតិ និងអាចប្រមូលផលបានប្រមាណ ១តោនក្នុងមួយរដូវ។
លោក ហេង ប៊ុនណាល់ ម្ចាស់កសិដ្ឋាន បារាយណ៍ហាន់នី បានមានប្រសាសន៍ប្រាប់ AMS Economy ថា ៖
«ខ្ញុំបានរៀនជំនាញផ្នែកវិទ្យាសាស្ត្រព្រៃឈើ លុះពេលចុះកម្មសិក្សានៅឆ្នាំទី៣ ជាមួយសិស្សច្បងដែលគាត់ចិញ្ចឹមឃ្មុំ ខ្ញុំក៏ចាប់អារម្មណ៍នឹងសត្វឃ្មុំ ដែលជាសត្វជួយដំណើរលំអងរបស់រុក្ខជាតិ ហើយក៏បានសុំសិស្សច្បងដើរតាម ហាត់រៀន និងចាប់ផ្ដើមចិញ្ចឹមត្រឹមពូជឃ្មុំ ២ធុង រហូតដល់បច្ចុប្បន្នមានប្រមាណ ១០០ធុង និងអាចប្រមូលផលបានប្រមាណ ៨០០គីឡូក្រាម ទៅ ១តោន តាមរដូវកាល»។
លោកបន្ថែមថា ៖
«សម្រាប់កសិដ្ឋានរបស់យើងមានផ្គត់ផ្គង់ស្ទើរតែគ្រប់យ៉ាងពីឃ្មុំ រួមមាន ទឹកឃ្មុំ លំអងឃ្មុំ ក្រមួនឃ្មុំ ពូជឃ្មុំ សម្ភារវេចខ្ចប់ទឹកឃ្មុំ និងសម្ភារចិញ្ចឹមឃ្មុំផ្សេងៗទៀត។ ចំណែកតម្លៃវិញ ទឹកឃ្មុំរបស់កសិដ្ឋាន បារាយណ៍ហាន់នី អាចលក់បាន ២០ដុល្លារក្នុងមួយលីត្រ ដែលលក់ឱ្យអតិថិជននៅគ្រប់បណ្ដាខេត្ត និងឈ្មួញយកលក់បន្តនៅរាជធានីភ្នំពេញផងដែរ»។
ចំណែកការផ្គត់ផ្គង់ទឹកឃ្មុំវិញ ម្ចាស់កសិដ្ឋានខាងលើបានបញ្ជាក់ថា ជាទូទៅ ការចិញ្ចឹមឃ្មុំនេះ អាចផលិត ស្តុកទុក និងផ្គត់ផ្គង់ទឹកឃ្មុំវិលជុំបានពេញមួយឆ្នាំ ដោយសារការចិញ្ចឹមឃ្មុំតាមបែបធម្មជាតិនេះគេចល័តតាមរដូវកាល និងទីតាំងណាដែលមានប្រភពលំអងផ្កា តួយ៉ាងរដូវផ្កាគ និងផ្កាកៅសូ គឺដឹកឃ្មុំទៅដាក់នៅខេត្តកំពង់ចាម លុះដល់រដូវមៀនចេញផ្កា គេដឹកមកតំបន់កោះក្របីវិញ។
លោកបញ្ជាក់ដែរថា យ៉ាងណាមិញ អាជីវកម្មទឹកឃ្មុំក្នុងស្រុកក៏ជួបប្រទះនូវបញ្ហាប្រឈមខ្លះដែរ ដោយសារទឹកឃ្មុំនាំចូលមានតម្លៃទាបជាង ហើយប្រជាជនភាគច្រើននៅមិនទាន់យល់ច្បាស់ពីភាពខុសគ្នារវាងគុណភាពទឹកឃ្មុំនៅឡើយ។ នៅពេលអនាគត លោក ហេង ប៊ុនណាល់ ចង់ពង្រីកការចិញ្ចឹមឃ្មុំតាមបែបធម្មជាតិនេះបន្ថែមទៀត ដើម្បីអាចផ្គត់ផ្គង់តម្រូវការទឹកឃ្មុំឱ្យបានកាន់តែច្រើន ក៏ដូចជាបង្កើនបរិមាណទឹកឃ្មុំ ដែលអាចសម្រួលដល់អ្នកប្រើប្រាស់ទទួលបាននូវផលិតផលដែលមានគុណភាព និងតម្លៃកាន់តែសមរម្យ៕
Account
Security
Favourite Content