សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កំពង់ធំ គឹជាខេត្តដែលស្ថិតនៅចំណុចកណ្ដាលនៃប្រទេសកម្ពុជា និងមានវិសាលភាពធំទូលាយ ប៉ុន្តែហាក់ត្រូវបានបណ្តាអ្នកវិនិយោគពីចំងាយមើលរំលង ខណៈដែលសក្ដានុពលរបស់ខេត្តមួយនេះមានមិនចាញ់ខេត្តដទៃនោះឡើយ។ ជាក់ស្ដែង កាលពីពេលថ្មីៗនេះ បន្ទាប់ពីមានគម្រោងវិនិយោគ និងអភិវឌ្ឍន៍ចំនួន៣ ដែលមានតម្លៃជិត១ពាន់លានដុល្លារប្រកាសដាក់មូលដ្ឋាននៅក្នុងខេត្តនេះភ្លាម គេសង្កេតឃើញមានគម្រោងតូចធំជាបន្តបន្ទាប់បង្ហាញវត្តមានផងដែរ។
យោងតាមឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ ទទួលបន្ទុកទីស្ដីការគណៈរដ្ឋមន្ត្រី កាលពីចុងសប្ដាហ៍មុននេះ បានថ្លែងថា ខេត្តកំពង់ធំ ដែលធ្លាប់តែជាខេត្តទេសចរទៅហួស-មកហួសកាលពីគ្រាមុននោះ បច្ចុប្បន្ន បាន និងកំពុងទទួលបានគម្រោងវិនិយោគថ្មីៗ និងធំៗ ជាបន្តបន្ទាប់ ដោយក្នុងនោះមានគម្រោង កសិដ្ឋានចិញ្ចឹមស្វាតម្លៃ ៥០០លានដុល្លារអាម៉េរិក គម្រោងចិញ្ចឹមខ្យងគជ់ តម្លៃជាង៣០០លានដុល្លារអាម៉េរិក និងគម្រោងវិនិយោគបង្កើតតំបន់សេដ្ឋកិច្ចពិសេស រ៉ូយ៉ាល់គ្រុប នៅលើផ្ទៃដីទំហំ៣០០ហិកតា ។
ឯកឧត្តមឧបនាយករដ្ឋមន្ត្រីបានលើកឡើងថា ក្រៅពីគម្រោងធំៗទាំង៣ ក៏មានគម្រោងជាច្រើនទៀតក្នុងខេត្តកំពង់ធំ ដែលជួយបង្កើតការងារដល់ប្រជាពលរដ្ឋក្នុងខេត្ត បង្កើនប្រាក់ចំណូលសម្រាប់ចិញ្ចឹមគ្រួសារបានផងដែរ ។ តាមរយៈគម្រោងទាំងនេះ បានបង្ហាញឱ្យឃើញថា ខេត្តកំពង់ធំ ស្ថិតនៅក្នុងចលនាវិជ្ជមានស្របតាមចក្ខុវិស័យរបស់សម្ដេចមហាបវរធិបតី ហ៊ុន ម៉ាណែត គឺលែងឱ្យខេត្តកំពង់ធំទៅហួសមកហួសទៀត ទាំងគម្រោងអភិវឌ្ឍន៍ ការវិនិយោគ ពាណិជ្ជកម្ម និងទេសចរណ៍ ។
ឯកឧត្តម វង្សី វិស្សុត បានបញ្ជាក់ថា តាមរយៈគម្រោងវិនិយោគធំៗនៅក្នុងខេត្តកំពង់ធំនាពេលនេះ គឺជាសារជូនទៅវិនិយោគិនអន្តរជាតិលើពិភពលោកថា កម្ពុជាស្វាគមន៍រាល់ការវិនិយោគល្អៗពីគ្រប់មជ្ឈដ្ឋានទាំងអស់ ព្រមទាំងផ្ដល់ប្រតិបត្តិការស្មើៗគ្នាដោយមិនរើសអើង ហើយដើម្បីជួយសម្រួលដល់វិស័យឯកជន ក៏ដូចជាជំរុញផលិតកម្មក្នុងស្រុក លើកកម្ពស់ជីវភាពប្រជាជន រាជរដ្ឋាភិបាល ក៏ដូចជារដ្ឋបាលខេត្តកំពង់ធំ បានរៀបចំ និងដាក់ចេញនូវយុទ្ធសាស្ត្រលើផែនការអភិវឌ្ឍមួយចំនួន ដោយនឹងវិនិយោគលើវិស័យហេដ្ឋារចនាសម្ព័ន្ធសាធារណៈក្នុងខេត្តចំនួន ៣៧០គម្រោង ក្នុងទំហំទឹកប្រាក់ប្រមាណជាង១៥០០លានដុល្លារអាម៉េរិក ។
ឯកឧត្តម នួន ផារ័ត្ន អភិបាលខេត្តកំពង់ធំ បានមានប្រសាសន៍ថា ក្នុងនាមជាអាជ្ញាធរ បានត្រៀមខ្លួនរួចរាល់ក្នុងការធ្វើកិច្ចសហប្រតិបត្តិការជាមួយវិនិយោគិនមកពីបរទេស និងក្នុងស្រុកដែលចូលមកបណ្ដាក់ទុននៅក្នុងខេត្តកំពង់ធំ ដើម្បីបង្កើតការងារ បង្កើនប្រាក់ចំណូលរបស់ពលរដ្ឋ ធ្វើយ៉ាងណាជួយឱ្យវិនិយោគិនកាន់តែមានភាពងាយស្រួល។
សូមជម្រាបថា តាមរយៈគម្រោងវិនិយោគ ទាំងវិស័យឯកជន និងវិស័យសាធារណៈរបស់រដ្ឋដែលមានទំហំរហូតដល់ប្រមាណ ១៥០០លានដុល្លារនេះ នឹងធ្វើឱ្យខេត្តកំពង់ធំកាន់តែមានភាពទាក់ទាញបានគម្រោងវិនិយោគផ្សេងៗទៀត ជាពិសេសលើវិស័យកសិកម្ម កសិ-ឧស្សាហកម្ម និងឧស្សាហកម្ម ខណៈខេត្តកំពង់ធំក៏ជាខេត្តដែលនឹងមានផ្លូវល្បឿនលឿនរត់កាត់ផងដែរ គឺគម្រោងផ្លូវល្បឿនលឿនភ្នំពេញ-សៀមរាប-ប៉ោយប៉ែត ។ ដូច្នេះ វានឹងកាន់តែងាយស្រួលសម្រាប់វិនិយោគិនក្នុងការចូលទៅកាន់ខេត្តកំពង់ធំ៕
Account
Security
Favourite Content