បរទេស៖ សហភាពអឺរ៉ុប បានបង្ហាញពីគោលបំណងរបស់ខ្លួនក្នុងការរកដំណោះស្រាយបែបការទូតជាមួយសហរដ្ឋអាម៉េរិក ប្រសើរជាងប្រើវិធានការសងសឹកគ្នាទៅវិញទៅមក បន្ទាប់ពីប្រធានាធិបតី អាម៉េរិក លោក Donald Trump គំរាមដំឡើងពន្ធលើប្រទេសមួយចំនួនដែលប្រឆាំងនឹងលោកក្នុងការកាន់កាប់កោះ Greenland នេះបើយោងតាមសេចក្ដីរាយការណ៍ពី Euronews ។

កាលពីថ្ងៃអាទិត្យ កន្លងទៅនេះ គណៈកម្មការសហភាពអ៊ឺរ៉ុប បានគាំទ្រឱ្យប្រើប្រាស់ bazooka ដើម្បីសងសឹកទៅកាន់អាម៉េរិកវិញភ្លាមៗ ក្នុងអំឡុងពេលកិច្ចប្រជុំបន្ទាន់មួយនៅទីក្រុងប្រ៊ូសែល។ យ៉ាងណាមិញ បណ្តារដ្ឋជាសមាជិកចង់ផ្តល់អាទិភាពដល់កិច្ចសន្ទនាការទូតជាមួយអាម៉េរិកជាមុនសិន និងរារាំងមិនឲ្យមានវិធានការសងសឹកភ្លាមៗនោះទេ។ Bazooka ត្រូវបានបង្កើតឡើងនៅឆ្នាំ២០២៣ ដែលជាវិធានការណ៍ពិសេសរបស់សហភាពអឹរ៉ុបសម្រាប់វាយបកប្រឆាំងទៅនឹងការបង្ខិតបង្ខំ ឬ ការដាក់សម្ពាធពីប្រទេសណាមួយ ដោយកំណត់អាជ្ញាប័ណ្ណពាណិជ្ជកម្ម និងបិទប្រទេសនោះមិនឲ្យចូលទីផ្សាររបស់ខ្លួន។ ឥឡូវនេះ សហភាពអឺរ៉ុបមិនទាន់ប្រើប្រាស់វិធានការ ‘Bazooka’ ដើម្បីឆ្លើយតបទៅនឹងការគំរាមកំហែងពន្ធគយរបស់លោក Trump នៅឡើយទេ។  

សូមបញ្ជាក់ថា កាលពីពេលថ្មីៗនេះ ប្រធានាធិបតីសហរដ្ឋអាម៉េរិក លោក Donald Trump បានគំរាមដំឡើងពន្ធបន្ថែម ១០% លើប្រទេសចំនួន ៨ ក្នុងទ្វីបអឺរ៉ុប រួមមាន ដាណឺម៉ាក អាល្លឺម៉ង់ បារាំង ស៊ុយអែត ហូឡង់ ហ្វាំងឡង់ ន័រវេស និង ចក្រភពអង់គ្លេស ដែលនឹងចូលជាធរមានចាប់ពីថ្ងៃទី ១ ខែកុម្ភៈ ខាងមុខនេះ ក្នុងគោលបំណងដាក់សម្ពាធឲ្យដាណឺម៉ាកប្រគល់កោះ Greenland មកឲ្យខ្លួន។ ប្រសិនបើសហភាពអឺរ៉ុបប្រើប្រាស់វិធានការណ៍សងសឹកពិតមែន នោះនឹងប៉ះពាល់ដល់ការនាំចេញរបស់អាម៉េរិកមកកាន់តំបន់នេះដែលមានតម្លៃសរុបប្រមាណ ៩៣ ពាន់លានអឺរ៉ូ (១០៨ ពាន់លានដុល្លារ)។ តាមការប៉ាន់ស្មានតម្លៃ ៩៣ ពាន់លានអឺរ៉ូ ឬ ១០៨ ពាន់លានដុល្លារអាម៉េរិកនេះ បានកើតឡើងតាំងពីឆ្នាំមុនមកម្ល៉េះ ដោយសារសហភាពអឺរ៉ុបត្រៀមនឹងដំឡើងពន្ធសងសឹកតបតទៅវិញ ៣០% លើការនាំចូលពីអាម៉េរិក បន្ទាប់ពីបានរងសម្ពាធនៃគោលនយោបាយពន្ធគយរបស់លោក Trump។ ក្រោយមក ភាគីទាំងពីរបានចរចាលើកិច្ចព្រមព្រៀងពាណិជ្ជកម្មជាមួយគ្នាសាជាថ្មី ដោយអាម៉េរិកយល់ព្រមកាត់បន្ថយពន្ធមកត្រឹមអត្រា ១៥% លើការនាំចូលពីសហភាពអឺរ៉ុប៕