សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលបានចាត់ទុកវិស័យទេសចរណ៍ ជាវិស័យដ៏សំខាន់មួយដែលបានផ្តល់នូវការងារជាច្រើនដល់ប្រជាពលរដ្ឋកម្ពុជា និងបានចូលរួមចំណែកយ៉ាងច្រើននៅក្នុងសេដ្ឋកិច្ចជាតិ។ ជាមួយគ្នានេះ ដើម្បីចូលរួមជំរុញការអនុវត្តស្មារតីនៃវេទិការាជរដ្ឋាភិបាល-ផ្នែកឯកជនលើកទី១៩ លើវិធានការគោលនយោបាយផ្តល់ហិរញ្ញប្បទានដល់ប្រតិបត្តិករទេសចរណ៍ក្នុងខេត្តសៀមរាបឱ្យបានជោគជ័យ និងឆាប់រហ័ស ធនាគារសហគ្រាសធុនតូច និងមធ្យមកម្ពុជា (SME Bank) បានដាក់ចេញនូវកម្មវិធីកម្ចីដោយផ្ទាល់ដល់ប្រតិបត្តិករទេសចរណ៍ក្នុងខេត្តសៀមរាប (Tourism Financing Scheme for Siem Reap – TFSS) ដើម្បីជួយស្តារ និងលើកស្ទួយស្ថានភាពទេសចរណ៍ក្នុងខេត្តសៀមរាប។
យោងតាម SME Bank បានឱ្យដឹងថា កម្មវិធីផ្តល់កម្ចីដោយផ្ទាល់ដល់ប្រតិបត្តិករទេសចរណ៍នៅខេត្តសៀមរាប (TFSS) មានអត្រាការប្រាក់ប្រចាំឆ្នាំត្រឹមតែ ៦.៥% និងលក្ខខណ្ឌអនុគ្រោះមួយចំនួនដែលអាចឱ្យប្រតិបត្តិករទេសចរណ៍ទទួលបានហិរញ្ញប្បទានសម្រាប់ការកែលម្អ, ការធ្វើទំនើបកម្ម ឬការពង្រីកខ្លួនបន្ថែម ក៏ដូចជាពិពិធកម្មនៃសេវាកម្មទេសចរណ៍របស់ខ្លួន។
ធនាគារអាចផ្តល់ប្រឹក្សាយោបល់អំពីផែនការអាជីវកម្ម និងស្វែងយល់បន្ថែមពីគម្រោងហិរញ្ញប្បទាននេះ។ ចំពោះទំហំហិរញ្ញប្បទានចាប់ពី ២ម៉ឺន ដល់ ៦០ម៉ឺនដុល្លារអាមេរិក ជាមួយនឹងរយៈពេលហិរញ្ញប្បទានរហូតដល់៨ឆ្នាំ ហើយរយៈពេលអនុគ្រោះបង់ប្រាក់ដើមរហូតដល់២៤ខែ និងការសងត្រឡប់មុនកាលកំណត់មិនមានការពិន័យ។
ជាមួយគ្នានេះ ក្រសួងទេសចរណ៍បានលើកទឹកចិត្តអាជីវកម្មទេសចរណ៍ក្នុងខេត្តសៀមរាបទាំងអស់ ដែលខ្វះខាតទុនវិនិយោគ ឬទុនបង្វិល សូមទំនាក់ទំនងទៅធនាគារសហគ្រាសធុនតូច និងមធ្យមកម្ពុជា។
លោកបណ្ឌិត លឹម អូន អគ្គនាយកធនាគារសហគ្រាសធុនតូច និងមធ្យម កម្ពុជា (SME Bank )ធ្លាប់បានលើកឡើងនាពេលកន្លងមកថា ៖ កម្មវិធីកម្ចីនេះសម្រាប់សហគ្រាសក្នុងវិស័យគោលដៅស្ថិតនៅខេត្តសៀមរាបដែលបម្រើសេវាកម្មដោយផ្ទាល់ជូនដល់ទេសចរជាតិ និងអន្តរជាតិដូចជា៖ សណ្ឋាគារ, ផ្ទះសំណាក់, រមណីយដ្ឋាន, ភោជនីយដ្ឋាន, អាជីវកម្មផលិត និង/ឬលក់វត្ថុអនុស្សាវរីយ៍, ក្រុមហ៊ុនភ្នាក់ងារទេសចរណ៍, សេវាកម្មដឹកជញ្ជូនភ្ញៀវទេសចរណ៍,អាជីវកម្មអភិវឌ្ឍផលិតផលទេសចរណ៍,ការផ្គត់ផ្គង់ផលិតផល និង/ឬសេវាកម្មដទៃទៀតដែលគាំទ្រឧស្សាហកម្មទេសចរណ៍អាចស្នើសុំហិរញ្ញប្បទានរហូតដល់៦០០ពាន់ដុល្លារអាមេរិក ជាមួយនឹងអត្រាការប្រាក់ប្រចាំឆ្នាំត្រឹមតែ ៦.៥០%។
លោកបណ្ឌិតបានឱ្យដឹងទៀតថា ៖ កម្មវិធីកម្ចីនេះមានលក្ខខណ្ឌអនុគ្រោះជាច្រើនដូចជា៖រយៈពេលអនុគ្រោះបង់ប្រាក់ដើមរហូតដល់២៤ខែ,មិនគិតថ្លៃសោហ៊ុយរៀបចំឥណទាន មិនមានពិន័យចំពោះការសងត្រឡប់មុនកាលកំណត់ ព្រមទាំងផ្តល់នូវលក្ខខណ្ឌនៃការអនុម័តប្រាក់កម្ចី មានភាពទន់ភ្លន់ជាងឥណទានធម្មតា។
លោកបណ្ឌិតបានបន្តថា៖កម្មវិធីកម្ចីនេះ នឹងរួមចំណែកក្នុងការស្តារ និងជំរុញកំណើនវិស័យទេសចរណ៍ខេត្តសៀមរាប ឱ្យត្រឡប់ទៅរកស្ថិរភាព និងមាគ៌ានៃកំណើនប្រកបដោយសក្តានុពល ក៏ដូចជាការអភិវឌ្ឍប្រកបដោយចីរភាព និងបរិយាប័ន្ន ស្របតាមចក្ខុវិស័យនៃប្រមុខរាជរដ្ឋាភិបាល ដោយមានការចូលរួមសហការយ៉ាងជិតស្និទ្ធ ក្នុងការជំរុញ ផ្សព្វផ្សាយ និងការទទួលខុសត្រូវខ្ពស់ពីគ្រប់ភាគីពាក់ព័ន្ធទាំងអស់ដូចជា ក្រសួងទេសចរណ៍អាជ្ញាធរខេត្តសៀមរាប សមាគមពាក់ព័ន្ធ និងម្ចាស់អាជីវកម្មដោយផ្ទាល់។
លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានមានប្រសាសន៍នាពេលកន្លងមកថា៖ កម្មវិធីកម្ចីដោយផ្ទាល់ដល់ប្រតិបត្តិករទេសចរណ៍នៅខេត្តសៀមរាបនឹងជំរុញលទ្ធភាពទទួលបានហិរញ្ញប្បទាន ដែលមានលក្ខខណ្ឌអនុគ្រោះដើម្បីបើកដំណើរការអាជីវកម្មឡើងវិញ ក៏ដូចជាធ្វើការកែលម្អ និងធ្វើទំនើបកម្មសេវាទេសចរណ៍ ព្រមទាំងការពង្រីកខ្លួន និងធ្វើពិពិធកម្ម សេវាទេសចរណ៍ សំដៅទាក់ទាញ និងទទួលភ្ញៀវទេសចរជាតិ និងអន្តរជាតិ។
សូមជម្រាបថា៖ ជាទិសដៅយុទ្ធសាស្ត្រ រាជរដ្ឋាភិបាលបានផ្តោតការយកចិត្តទុកដាក់ជាចម្បងលើការជំរុញវិស័យទេសចរណ៍ឱ្យមានសក្តានុពល និងមានសម្ទុះងើបឡើងវិញ តាមរយៈការដាក់ចេញនូវគោលនយោបាយសំខាន់ៗជាច្រើនដូចជា៖ផែនការមេអភិវឌ្ឍន៍ទេសចរណ៍ខេត្តសៀមរាបឆ្នាំ២០២១-២០៣៥,និងកម្មវិធីពិសេសទស្សនាសៀមរាបឆ្នាំ២០២៤,ក៏ដូចជាកម្មវិធីកម្ចីដោយផ្ទាល់ដល់ប្រតិបត្តិករទេសចរណ៍សៀមរាប និងសម្រេចបាននូវសមិទ្ធផលជាបន្តបន្ទាប់ដូចជា៖ អាកាសយានដ្ឋានអន្តរជាតិសៀមរាបអង្គរនិងការកែរលម្អរគុណភាពផ្លូវក្នុងខេត្តជាដើម។ទាំងនេះសុទ្ធតែជាគោលនយោបាយក្នុងគោលដៅជំរុញវិស័យទេសចរណ៍ ដើម្បីធានាចីរភាពនៃការស្តារ និងគាំទ្រវិស័យទេសចរណ៍៕
Account
Security
Favourite Content