បរទេស៖ យោងតាមប្រភពព័ត៌មានពី Oil Price បានរាយការណ៍ថា  តម្លៃប្រេងបានធ្លាក់ចុះបន្តិចបន្ទាប់ពីមានដំណឺងថា អារ៉ាប៊ីសាអូឌីត មានបំណងលុបចោលគោលដៅរបស់ខ្លួនក្នុងការជំរុញតម្លៃប្រេង ១០០ ដុល្លារ និងមានឆន្ទៈក្នុងការស៊ូទ្រាំនឹងការធ្លាក់ចុះតម្លៃប្រេងរយៈពេលខ្លី។

ទន្ទឹមនឹងនេះ តម្លៃប្រេងឆៅម៉ាក Brent ធ្លាក់ចុះ ២,២ ភាគរយ ឬ សល់ត្រឹម ៧១,៨៦ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas intermediate (WTI) ធ្លាក់ចុះ ២,២ ភាគរយ ឬ សល់ត្រឹម​ ៦៨,១៥ ដុល្លារក្នុងមួយបារ៉ែល។ បន្ទាប់ពីមានការលេចឮដំណឺងថា អារ៉ាប៊ីសាអូឌីតមានបំណងបង្កើនផលិតកម្មនៅចុងឆ្នាំនេះ​ ខណៈដែលតម្លៃប្រេងឆៅរបស់សហរដ្ឋអាមេរិកបានធ្លាក់ចុះជិត ៣ ភាគរយភ្លាមៗនោះ។ ទន្ទឹមនឹងនេះ អារ៉ាប៊ីសាអូឌីតកំពុងត្រៀមខ្លួនរួចជាស្រេចក្នុងការបង្កើនផលិតកម្មប្រេងនៅក្នុងខែធ្នូ បើទោះបីជាការផ្លាស់ប្តូរនេះបណ្តាលឱ្យតម្លៃប្រេងធ្លាក់ចុះទាបក្នុងរយៈពេលយូរក៏ដោយ។ មិនត្រឹមតែប៉ុណ្ណោះ អារ៉ាប៊ីសាអូឌីតមានបំណងលុបចោលគោលដៅខ្លួនដែលជំរុញប្រេងមានតម្លៃ ១០០ ដុល្លារក្នុងមួយបារ៉ែលផងដែរ។

គួរឲ្យបញ្ជាក់ដែរថា អារ៉ាប៊ីសាអូឌីត គឺជាប្រទេសនាំចេញប្រេងឆៅលំដាប់កំពូលរបស់ពិភពលោក និងជាមេដឹកនាំនៃអង្គការ OPEC ជាមួយនឹងសម្ព័ន្នមិត្ត OPEC+ បានកាត់បន្ថយការផ្គត់ផ្គង់ប្រេងអស់រយៈពេលជាងមួយឆ្នាំមកហើយ ក្នុងគោលបំណងដើម្បីធ្វើឱ្យមានតុល្យភាពទីផ្សារ និងជំរុញតម្លៃប្រេងឡើងថ្លៃ។ កាលពីដំបូង OPEC+ គ្រោងនឹងចាប់ផ្តើមកាត់បន្ថយផលិតកម្មចាប់ពីខែតុលាឆ្នាំនេះ ប៉ុន្តែការធ្លាក់ចុះតម្លៃប្រេងធ្លាក់នៅក្នុងខែសីហា និងខែកញ្ញា បានជំរុញឲ្យពួកគេពន្យារពេលកាត់បន្ថយ ២,២ លានបារ៉ែលរហូតដល់ខែធ្នូ។

យ៉ាងណាមិញ ការសម្រេចចិត្តនេះមិនបានជំរុញតម្លៃប្រេងខ្លាំងនោះទេ ដោយសារ OPEC បានកាត់បន្ថយការព្យាករណ៍របស់ពួកគេលើកំណើនតម្រូវការ ខណៈដែលតម្រូវការពីចិននៅមានភាពទន់ខ្សោយនៅឡើយ។ ពោល គឺបន្ទាប់​ពី​ក្រុង​ប៉េកាំង​បាន​ប្រកាស​ពី​វិធានការថ្មី​ជំរុញ​សេដ្ឋកិច្ច​ថ្មីនៅ​ដើម​សប្តាហ៍នេះ តម្លៃ​ប្រេង​បាន​កើន​ឡើ​ង ដែលធ្វើឲ្យមានការរំពឹងថានឹងមានកំណើនតម្រូវការពីចិន ដែលជាប្រទេសប្រេងធំជាងគេទី ២ របស់ពិភពលោក។ មិនត្រឹមតែប៉ុណ្ណោះ តម្លៃក៏ស្ថិតនៅក្រោមសម្ពាធផងដែរ ដោយសារមានការរំពឹងទុកថាផលិតកម្មប្រេងនឹងកើនឡើងវិញនៅក្នុងប្រទេសលីប៊ី។ បន្ថែមពីនេះ អាហ្រ្វិកខាងជើងបានឈានដល់កិច្ចព្រមព្រៀងក្នុងការតែងតាំងអភិបាលធនាគារកណ្តាលថ្មី។

គួររំលឹកថា អស់រយៈពេលជាងមួយឆ្នាំមកនេះ អារ៉ាប៊ីសាអូឌីត បានប្រកាន់ខ្ជាប់យ៉ាងតឹងរ៉ឹងទៅនឹងគោលដៅកាត់បន្ថយផលិតកម្មប្រេង ប៉ុន្តែ​វា​​ខាតបង់​ចំណែក​ទីផ្សារ​​ដែលមិនត្រឹមតែ​អ្នក​ផលិត​មិនមែនជាសមាជិក OPEC+ ប៉ុណ្ណោះ​ទេ សូម្បីតែ​អង្គការ OPEC និង​សម្ព័ន្នមិត្ត OPEC+ ក៏ទទួលការខាតបង់ដូចគ្នាផងដែរ។ ទន្ទឹមនឹងនេះ អារ៉ាប៊ីសាអូឌីត បានប្តេជ្ញាចិត្តបង្កើនផលិតកម្មមកវិញក្នុងខែធ្នូខាងមុខនេះ ដោយមិនគិតពីសមតុល្យទីផ្សារ និងតម្លៃប្រេងនទៀតនោះទេ៕