សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តាមរយៈរបាយការណ៍ដែលទទួលបានពីអគ្គនាយកដ្ឋានគយ និងរដ្ឋាករកម្ពុជា (GDCE) បានឱ្យដឹងថា ក្នុងរយៈពេល៨ខែឆ្នាំ២០២៤ ពាណិជ្ជកម្មរបស់កម្ពុជាជាមួយបណ្តាប្រទេសជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP) សម្រេចបានទំហំទឹកប្រាក់ ២២,៩២ ពាន់លានដុល្លារកើនឡើងប្រមាណ ១៧,២ ភាគរយ បើធៀបនឹងរយៈពេលដូចគ្នាកាលពីឆ្នាំ២០២៣ ដែលមានត្រឹម ១៩.៥៥ ពាន់លានដុល្លារ ។
របាយការណ៍ដដែលបានឱ្យដឹងទៀតថា ទំហំពាណិជ្ជកម្មរបស់ប្រទេសកម្ពុជាជាមួយសមាជិក RCEP រួមមានចំនួន ៦២ ភាគរយនៃទំហំពាណិជ្ជកម្មសរុបតម្លៃ ៣៦.៩៤ ពាន់លានដុល្លាររបស់ខ្លួន ក្នុងអំឡុងរយៈពេល៨ខែ គិតចាប់ពីខែមករា រហូតដល់ខែសីហា ឆ្នាំ២០២៤ នេះ។
ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានមានប្រសាសន៍ថា ទោះបីវិបត្តិសេដ្ឋកិច្ចសកលកើតមានដែលបណ្តាលពីជម្លោះភូមិសាស្ត្រនយោបាយរវាងប្រទេសមហាអំណាចធំៗ សង្គ្រាមរវាងរុស្ស៊ី-អ៊ុយក្រែន និងបញ្ហាអតិផរណា ដែលធ្វើឱ្យកម្លាំងបញ្ជាទិញនៅលើទីផ្សារធំៗធ្លាក់ចុះក៏ដោយ ក្នុងនាមកម្ពុជាជាសមាជិករបស់ RCEP កំណើននៃការនាំចេញនៅតែបន្តសញ្ញាវិជ្ជមាន។
ឯកឧត្តម ប៉ែន សុវិជាតិ បានគូសបញ្ជាក់ថា ៖ RCEP គឺជាកត្តាជំរុញកំណើនពាណិជ្ជកម្មរបស់កម្ពុជា និងជាមេដែកដើម្បីទាក់ទាញការវិនិយោគផ្ទាល់ពីបរទេសកាន់តែច្រើនមកកាន់ប្រទេស និងជំរុញដល់សមាហរណកម្មពាណិជ្ជកម្មក្នុងតំបន់ ក៏ដូចជាកិច្ចសហប្រតិបត្តិការ ដែលនាំមកនូវអត្ថប្រយោជន៍ដ៏អស្ចារ្យដល់ប្រទេសសមាជិកទាំងអស់ និងបានចូលរួមចំណែកយ៉ាងច្រើនក្នុងការបើកទីផ្សារនាំចេញផលិតផលកម្ពុជាទៅទីផ្សារអន្តរជាតិ ។
លោកបណ្ឌិតសេដ្ឋកិច្ច លោក ហុង វណ្ណៈ បានផ្តល់តម្លៃនៃកំណើនសេដ្ឋកិច្ចរបស់កម្ពុជាជាមួយបណ្តាប្រទេសសមាជិក RCEP ថា ជាមោទនភាព ដោយកិច្ចព្រមព្រៀង RCEP អាស៊ាន និងក្នុងកម្រិតក្របខ័ណ្ឌពាណិជ្ជកម្មសេរី កម្ពុជាទទួលបានលទ្ធផលផ្លែផ្កាជាបណ្ដើរៗ។
លោកបណ្ឌិតបានបញ្ជាក់ថា ៖
«យើងឃើញកំណើនថវិកា បានចាក់បញ្ចូលទៅក្នុងថវិកាជាតិដែលកំណើនសេដ្ឋកិច្ចនេះបានជំរុញឱ្យធនាគារអភិវឌ្ឍអាស៊ី និងធនាគារដទៃ ព្យាករកំណើនសេដ្ឋកិច្ចរបស់កម្ពុជាក្នុងចន្លោះ ៥,៨% ទៅ៦%។ កំណើននេះបានឆ្លុះបញ្ចាំងពីការកើនឡើងតិចតួចនៃថ្លៃម្ហូបអាហារ និង ការធ្លាក់ចុះនៃថ្លៃប្រេងឥន្ធនៈនៅក្នុងឆមាសទី១ ឆ្នាំ២០២៤ ធនាគារអភិវឌ្ឍន៍អាស៊ី បានបន្ថយការព្យាករ អតិផរណាពីមុនរបស់ខ្លួនពី ២,0% មក ០,៥% សម្រាប់ឆ្នាំ២០២៤»។
លោកបណ្ឌិតបានលើកឡើងថា នៅក្នុងការនាំចេញរបស់ប្រទេសកម្ពុជា ភាគច្រើនគឺជាកសិផលកែច្នៃ ដូច្នេះ កម្ពុជាត្រូវការសម្រួចការកែច្នៃកសិផលរបស់ខ្លួនប្រកបដោយគុណភាព និងសោភ័ណភាព សម្រាប់នាំចេញនៅក្នុងក្របខ័ណ្ឌប្រទេសជាសមាជិក RCEP ដើម្បីធានានូវភាពធន់សេដ្ឋកិច្ចកម្ពុជា ។
សូមជម្រាបថា RCEP គឺជាកិច្ចព្រមព្រៀងពាណិជ្ជកម្មសេរីដ៏ធំបំផុតនៅលើពិភពលោក ដែលមានសមាជិកចំនួន ១៥ ប្រទេស រួមមានសមាជិកអាស៊ាន ១០ (ប៊្រុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ថៃ ហ្វីលីពីន វៀតណាម និងសិង្ហបុរី) និងប្រទេសដៃគូពាណិជ្ជកម្មសេរីអាស៊ានចំនួន ៥ រួមមាន អូស្រ្តាលី ចិន ជប៉ុន កូរ៉េខាងត្បូង និងនូវែលហ្សេឡង់។ RCEP មានសុពលភាពអនុវត្ត ចាប់តាំងពីថ្ងៃទី១ ខែមករា ឆ្នាំ២០២២៕
Account
Security
Favourite Content