តាកែវ ៖ ជាកសិកររស់នៅក្នុងស្រុកត្រាំកក់ ខេត្តតាកែវ បុរសម្នាក់បានចាប់ផ្ដើមការចិញ្ចឹមមាន់ជាលក្ខណៈគ្រួសារ។​ ក្នុងការចិញ្ចឹមនាពេលនោះ លោក និងគ្រួសារក៏មិនសូវជាមានបច្ចេកទេសច្បាស់លាស់នោះដែរ ពោលគឺ​ចិញ្ចឹមបន្តិចបន្តួច​ជាលក្ខណៈគ្រួសារ និងតាមទម្លាប់តែប៉ុណ្ណោះ។ ដោយការចិញ្ចឹមមានទំហំតូច លោកក៏មិនអាចរំពឹងអ្វីទៅលើមុខរបរនេះច្រើនដែរ ដូច្នោះហើយលោកក៏បានធ្វើចំណាកស្រុក ដើម្បីធ្វើការរកចំណូលបន្ថែមចូលគ្រួសារ។

បើតាមលោក យ៉ែម សុខនី ដែលជាអ្នកចិញ្ចឹមមាន់បានឱ្យដឹងថា កាលនោះលោកមិនសូវបាននៅផ្ទះនោះទេ ដោយត្រូវចេញទៅធ្វើការសំណង់បាត់ៗ ហើយមានពេលខ្លះលោកស្ទើរតែជួបគ្រោះថ្នាក់ដល់អាយុជីវិតទៀតផង។ យ៉ាងណាក៏ដោយ ចំណូលនាពេលនោះក៏មិនអាចផ្គត់ផ្គង់ជីវភាពគ្រួសារបានគ្រប់គ្រាន់នោះដែរ ដោយលោកមានកូនៗដែលកំពុងរៀន និងមានម្ដាយវ័យចំណាស់នៅក្នុងបន្ទុក។

រហូតដល់ឆ្នាំ២០២៣កន្លងទៅនេះ លោកត្រូវបានមជ្ឈមណ្ឌលអូស្ត្រាលីសម្រាប់​ការស្រាវជ្រាវកសិកម្មអន្តរជាតិ (ACIAR) ជ្រើសរើសជាកសិករគំរូសម្រាប់អនុវត្តការចិញ្ចឹមមាន់ក្នុងស្រុក។ គ្រួសាររបស់លោក យ៉ែម សុខនី គឺជាគ្រួសារមួយក្នុងចំណោមគ្រួសារចំនួន៣នៅក្នុងខេត្តតាកែវ ដែលត្រូវបានជ្រើសរើស។

ក្នុងការអនុវត្តគម្រោងនោះ វិទ្យាស្ថានស្រាវជ្រាវបសុសត្វអន្តរជាតិ (ILRI) ដែលជាដៃគូសហការជាមួយមជ្ឈមណ្ឌលអូស្ត្រាលីសម្រាប់​ការស្រាវជ្រាវកសិកម្មអន្តរជាតិ បានផ្ដល់ពូជមាន់ស្គួយ ឬដែលគេស្គាល់ជាទូទៅថាមាន់ស្រែនោះ ចំនួន១ពាន់ក្បាលសម្រាប់កសិករសាកល្បងចិញ្ចឹម និងបង្កាត់ពូជ។

បើតាមលោក យ៉ែម សុខនី គិតមកដល់ពេលនេះ ការចិញ្ចឹមគឺមានរយៈពេល ៧ខែហើយ រីឯលទ្ធផលវិញ គឺជោគជ័យស្ទើរតែមិនគួរឱ្យជឿ។ រយៈពេល៧ខែកន្លងទៅនេះ លោក និងភរិយា បានខិតខំថែទាំ បង្កាត់ពូជមាន់ស្គួយឱ្យកាន់តែសុទ្ធល្អ ហើយទន្ទឹមនឹងនោះ លោកក៏មានលទ្ធភាពលក់ស៊ុត និងមា​ន់សាច់ដែលមិនមែនជាពូជសុទ្ធទៅកាន់ទីផ្សារ។ មិនត្រឹមតែប៉ុណ្ណោះ លោកក៏អាចលក់កូនមាន់ពូជស្គួយទៅឱ្យកសិករផ្សេងទៀតដែលមានបំណងចង់ចិញ្ចឹមក្នុងតម្លៃថ្លៃគួរសម។

តាមរយៈចំណូលដែលទទួលបានពីការចិញ្ចឹមមាន់ កសិករវ័យ ៤០បា្លយរូបនេះអាចមានលទ្ធភាពកែប្រែជីវភាពពីលំបាកទៅជាធូរធា ជាពិសេសអាចឱ្យកូនទទួលបានការអប់រំគ្រប់គ្រាន់ រហូតដល់ថ្នាក់សកលវិទ្យាល័យទៀតផង។

អ្វីដែលសំខាន់បំផុតសម្រាប់លោកគឺ លោកលែងព្រួយបារម្ភអំពីការធ្វើចំណាកស្រុកទៅធ្វើការដែលប្រឈមនឹងគ្រោះថ្នាក់ទៀតហើយ។ បច្ចុប្បន្ន គ្រាន់តែស្នាក់នៅផ្ទះមើលថែទាំមាន់ លោក និងភរិយាអាចមានពេលវេលាគ្រប់គ្រាន់ក្នុងការថែទាំផ្ទះសម្បែងទៀតផង។

គួរបញ្ជាក់ថា គម្រោងកែប្រែជីវភាពកសិករនៅកម្ពុជាធ្វើឡើងដោយមានការគាំទ្រផ្នែកហិរញ្ញវត្ថុពី​មជ្ឈមណ្ឌលអូស្ត្រាលីសម្រាប់​ការស្រាវជ្រាវកសិកម្មអន្តរជាតិ និងការគាំទ្រផ្នែកបច្ចេកទេស​ពីវិទ្យាស្ថានស្រាវជ្រាវបសុសត្វអន្តរជាតិ។

គម្រោងខាងលើនេះ ធ្វើឡើងក្នុងគោលបំណងបង្កើនផលិតភាព និងភាពធន់នឹងអាកាសធាតុក្នុងតំបន់ទៅលើ​ពូជមាន់ក្នុងស្រុក ពូជស្គួយ (Skouy)។ គម្រោងនេះដែរ មានគោលដៅចង់បន្សុទ្ធពូជមាន់ស្គួយរហូតឱ្យសុទ្ធដល់កម្រិតមួយដែលអនុញ្ញាតឱ្យកសិករចិញ្ចឹមមាន់នេះមានទីផ្សារល្អ។

គម្រោងនេះមានរយៈពេល៤ឆ្នាំ ពីឆ្នាំ២០២០ ដល់ឆ្នាំ ២០២៤ ដោយធ្វើយ៉ាងណាឱ្យកសិករគំរូក្នុងខេត្តតាកែវទាំង៣គ្រួសារទទួលបានជោគជ័យក្នុងការបង្កាត់ពូជមាន់ស្គួយ និងក្លាយជាអ្នកចែកចាយពូជមាន់នេះចេញទៅខេត្តផ្សេងទៀតនៅក្នុងប្រទេសកម្ពុជាតែម្ដង៕