សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងឱកាសចូលរួមកិច្ចប្រជុំប្រចាំឆ្នាំ២០២៦ នៃវេទិកាសេដ្ឋកិច្ចពិភពលោក(World Economic Forum) នាទីក្រុងដាវ៉ូស សហព័ន្ធស្វីស ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា បានព្យាយាមផ្សព្វផ្សាយពីសក្ដានុពល និងឱកាសវិនិយោគនៅកម្ពុជាដល់បណ្តាអ្នកតំណាងក្រុមហ៊ុនធំៗលំដាប់ពិភពលោក ដើម្បីអាចទាក់ទាញ និងបញ្ចុះបញ្ចូល ក្រុមហ៊ុនអន្តរជាតិទាំងនោះសម្រេចចិត្តមកកម្ពុជា។
នៅថ្ងៃទី២១ ខែមករា ឆ្នាំ២០២៦ ឯកឧត្តមឧបនាយករដ្ឋមន្ត្រី ស៊ុន ចាន់ថុល បានជួបពិភាក្សាអំពីការវិនិយោគ និងការធ្វើពាណិជ្ជកម្មនៅកម្ពុជា ជាមួយលោក Eddy Pirard ប្រធាន និងជានាយកប្រតិបត្តិនៃក្រុមហ៊ុន JTI ដោយមានការចូលរួមពីលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ។
នៅថ្ងៃដដែលនេះ ឯកឧត្តម ស៊ុន ចាន់ថុល បានជួបពិភាក្សាការងារជាមួយ ឯកឧត្តម Paul Chan រដ្ឋលេខាធិការក្រសួងហិរញ្ញវត្ថុនៃតំបន់រដ្ឋបាលពិសេសហុងកុង ដើម្បីពិភាក្សាអំពីការបន្តពង្រឹងកិច្ចសហប្រតិបត្តិការរវាងហុងកុង និងកម្ពុជា។ ជំនួបនេះមានការចូលរួមពី ឯកឧត្តមសាស្ត្រាចារ្យបណ្ឌិតសភាចារ្យ សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស។
កាលពីថ្ងៃទី២០ ខែមករា ឆ្នាំ២០២៦ ឯកឧត្តមអនុប្រធានទី១ក្រុមប្រឹក្សាអភិវឌ្ឍន៍កម្ពុជា ដោយមានការចូលរួមពីលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានពិភាក្សាជាមួយនាយកប្រតិបត្តិក្រុមហ៊ុន Carlsberg Group លោក Jacob Aarup-Andersen អំពីការជំរុញភាពប្រកួតប្រជែងដោយស្មើភាព សកម្មភាពពាណិជ្ជកម្មរបស់ក្រុមហ៊ុន និងកាលានុវត្តភាពសម្រាប់ការបណ្តាក់ទុនរបស់ក្រុមហ៊ុនបន្ថែមទៀតនៅកម្ពុជា។
ដោយឡែក ក្នុងឱកាសជាវាគ្មិននៅក្នុងវេទិកាសេដ្ឋកិច្ចពិភពលោក លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានចែករំលែកទស្សនាទាន និងចក្ខុវិស័យរបស់កម្ពុជាក្នុងការប្រើប្រាស់កាលានុវត្តភាពនៃកិច្ចសហប្រតិបត្តិការអន្តរជាតិសម្រាប់អភិវឌ្ឍប្រទេសដែលកំពុងអភិវឌ្ឍន៍ដូចជាកម្ពុជា ពិសេសតាមរយៈការប្រើប្រាស់បច្ចេកវិទ្យាដើម្បីសម្រួលវិស័យពាណិជ្ជកម្មឱ្យកាន់តែមានភាពប្រកួតប្រជែងនិងមានអនុលោមភាព។ នាឱកាសនោះ លោកជំទាវរដ្ឋមន្ត្រីក៏បានលើកឡើងពីវឌ្ឍនភាពសំខាន់ៗ និងគំនិតផ្តួចផ្តើមនានារបស់ប្រមុខដឹកនាំកម្ពុជា ដើម្បីធ្វើយ៉ាងណាឱ្យសេដ្ឋកិច្ចជាតិកាន់តែកើនឡើងជាលំដាប់៕
Account
Security
Favourite Content