សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
យោងតាមគោលនយោបាយស្ដីពីការគ្រប់គ្រងសំរាមសំណល់រឹងនៅទីប្រជុំជនឆ្នាំ២០២០-២០៣០ បានឱ្យដឹងថា បច្ចុប្បន្នសំណល់រឹងក្នុងទីប្រជុំជនមានប្រមាណ ២លានតោនក្នុងមួយឆ្នាំ ដែលត្រូវបានប្រមូលទៅចាក់នៅទីលានសំរាមទូទាំងប្រទេស ដែលចំនួននេះមានការកើនឡើងក្នុងអាត្រា ១៥%ក្នុងមួយឆ្នាំ។ ដោយឡែក ការអនុវត្តសេវាកម្មប្រមូលសំរាមនាពេលបច្ចុប្បន្នត្រូវបានប៉ានស្មានថាក្នុងចំនួន ៦០%ប៉ុណ្ណោះនៃសំណល់រឹងដែលបានបង្កើតសរុប ខណៈដែលគេប៉ានស្មានថាចំនួនសំណល់រឹងសរុបក្នុងទីប្រជុំជនអាចមានចំនួនជាង ៣លានតោនក្នុងមួយឆ្នាំ។
កាលពីពេលកន្លងទៅនេះ ក្រសួងបរិស្ថាន ក៏ដូចជាអង្គការក្រៅរដ្ឋាភិបាល បានដាក់ចេញនូវយុទ្ធនាការ និងគម្រោងជាបន្តបន្ទាប់ដូចជា គម្រោងប្លាស្ទីកដូរយកអង្ករ និងយុទ្ធនាការសម្អាតទន្លេ សមុទ្រ ជាដើម។ ជាមួយគ្នានេះ ដើម្បីអាចប្រមូលសំរាមទាំងអស់ទៅទុកដាក់ក្នុងទីលានឱ្យបានត្រឹមត្រូវ ច្បាស់ណាស់ថា មិនអាចធ្វើឡើងចេញតែពីក្រសួងតែឯងនោះទេ ប៉ុន្តែក៏គួរមានការចូលរួមពីអង្គការក្រៅរដ្ឋាភិបាល ជាពិសេសប្រជាជនមូលដ្ឋានផ្ទាល់។
គម្រោងប្លាស្ទីកដូរយកអង្ករដែលជាគំនិតផ្ដួចផ្ដើមរបស់ក្រសួងបរិស្ថាន បានចាប់អនុវត្តលើខេត្តជាប់ទន្លេសាប ផ្ដោតជាពិសេសលើប្រជាជនដែលរស់នៅលើផ្ទៃទឹក។ គម្រោងនេះ ជាការលើកទឹកចិត្ត ដល់ប្រជាជនកុំឱ្យចោលសំណល់ប្លាស្ទីកចូលទៅក្នុងទឹក ដែលវានឹងបង្កផលប៉ះពាល់ដ៏ធំទៅថ្ងៃមុខ។
តាមរយៈកម្មវិធីនេះ ប្រជាជនអាចរក្សាទុកប្លាស្ទីកដើម្បីដូរយកជាអង្ករចំនួន ១០គីឡូ ទឹកត្រី ទឹកស៊ីអៀវ ត្រីខ និងមីជាដើម។ រហូតមកដល់ពេលនេះ គម្រោងប្លាស្ទីកដូរយកអង្ករមានអាយុកាលជិត៥ឆ្នាំហើយ រីឯលទ្ធផលគឺទទួលបានជោគជ័យច្រើន។ ជោគជ័យនៅទីនេះ គឺសំដៅលើការផ្លាស់ប្ដូរឥរិយាបថរបស់ប្រជាជនរស់នៅលើផ្ទះបណ្ដែតទឹកពីការបោះចោលសំរាមពាសវាលពាសកាល ទៅជាការស្រឡាញ់ និងរក្សាទុកសំរាមដើម្បីជាផ្នែកមួយនៃជីវភាពរស់នៅប្រចាំថ្ងៃ។
ដោយឡែក ងាកទៅយុទ្ធនាការសម្អាតទន្លេឯណោះវិញ ក៏ផ្ដោតសំខាន់លើការប្រមូលសំរាមចេញពីផ្ទៃទឹកផងដែរ ដោយប្រើប្រាស់ម៉ាស៊ីនដើរដោយបច្ចេកវិទ្យាទំនើប។ ប៉ុន្តែយ៉ាងណា វានៅតែមិនគ្រប់គ្រាន់សម្រាប់សំរាមក្នុងទំហំដ៏ច្រើន ដូច្នេះហើយទើបអង្គការបណ្ដុះឱ្យប្រជាជននៅមូលដ្ឋានចូលរួមរើសតាមតំបន់រៀងៗខ្លួន ហើយពួកគេអាចដូរជាប្រាក់ពីអង្គការវិញ។
គម្រោងទាំងពីរនេះកំពុងតែធ្វើឡើងដោយសន្សឹមៗ និងទទួលបានការចូលរួមជាច្រើនពីប្រជាជនតាមបណ្ដាខេត្តនានា រហូតវាបានក្លាយជាផ្នែកមួយនៃការលើកស្ទួយជីវភាពប្រជាជនទៀតផង។ មិនត្រឹមតែប៉ុណ្ណោះ កាកសំណល់សំរាម ជាពិសេសប្លាស្ទីក ត្រូវបានក្រុមហ៊ុនឯកជនយកទៅកែច្នៃសម្រាប់ប្រើប្រាស់ឡើងវិញបន្តទៀត ដែលវាចំណេញដល់សេដ្ឋកិច្ច ក៏ដូចជាអាចជួយសម្រាលបន្ទុកបរិស្ថានផងដែរ។
ចេញពីសំរាមដែលស្ថិតនៅរាយប៉ាយលើផ្ទៃដី និងផ្ទៃទឹក ទៅជាផលិតផលនានា ដែលជួយកាត់បន្ថយការផលិតផ្លាស្ទីកថ្មីបន្ថែមទៀត។
លោក នូ សុវណ្ណ នាយកប្រតិបត្តិរបស់អង្គការសម្អាតទន្លេសមុទ្របានគូសបញ្ជាក់អំពីចក្ខុវិស័យ របស់អង្គការថា៖
“អ្វីដែលធំបំផុតគឺចង់ពញ្ញាក់អារម្មណ៍ប្រជាពលរដ្ឋឱ្យចេះទុកដាក់សំរាមឱ្យបានត្រឹមត្រូវ ចេះចូលរួមសម្អាត ជួយចូលរួមជាថវិកា ខណៈដែលយើងផឹកទឹកទន្លេទាំងអស់គ្នា ដូច្នេះហើយបានជាយើងលើកទឹកចិត្តបងប្អូនតាមតំបន់គោលដៅឱ្យចូលរួមជាមួយពួកយើង ណាមួយការចូលរួមនេះចំណេញទាំងសេដ្ឋកិច្ចពួកគាត់ ហើយស្អាតទាំងបរិស្ថានគាត់ទៀត៕”
Account
Security
Favourite Content