បរទេស ៖ អាចជាដំណឺងដ៏ល្អសម្រាប់ក្រុមហ៊ុនរកស៊ីក្នុងវិស័យដឹកជញ្ជូនទំនិញតាមផ្លូវទឹកពីតំបន់អាស៊ីទៅកាន់តំបន់អឺរ៉ុបដោយសារតែផ្លូវទឹកដ៏សំខាន់ថ្មីមួយនឹងអាចជួយកាត់បន្ថយពេលវេលាធ្វើដំណើរដល់ទៅពាក់កណ្តាលធៀបទៅនឹងផ្លូវទឹកសំខាន់ៗដែលធ្លាប់ប្រើជាយូរមកហើយរបស់ពិភពលោកនោះគឺព្រែកជីកស៊ុយអេ និងព្រែកជីកប៉ាណាម៉ា។

ក្រុមហ៊ុនយក្សរបស់រុស្ស៊ីក្នុងវិស័យផលិតថាមពលនុយក្លេអ៊ែរ Rosatom បានប្រកាសកាលពីដើមសប្តាហ៍កន្លងមកនេះថា ជាប្រវត្តិសាស្ត្រដ៏គួរឲ្យមោទនភាព ដោយសារតែនាវាដឹកកុងតឺន័រដំបូងរបស់ប្រទេសចិនបានបញ្ចប់ការធ្វើដំណើរតាមច្រកមួយដែលកសាង និងរៀបចំឡើងដោយប្រទេសរុស្ស៊ីកាត់តាមតំបន់ទឹកកកអាក់ទិក គឺ Arctic’s Northern Sea Route (NSR)។

Rosatom បានបញ្ជាក់ថា ការឆ្លងកាត់ផ្ទាំងទឹកកកនៅតំបន់អាក់ទិករបស់នាវាទំនិញចិនបានទទួលការគាំទ្រ និងបើកផ្លូវដោយក្រុមនាវាបំបែកដុំទឹកកកដើរដោយថាមពលនុយក្លេអ៊ែររបស់ប្រទេសរុស្ស៊ីដែលជាក្រុមការងារប្រតិបត្តិការ និងគ្រប់គ្រងលើផ្លូវទឹក NSR មួយនេះ។

រុស្ស៊ី បានខិតខំអភិវឌ្ឍផ្លូវ NSR មួយនេះជាយូរមកហើយ ព្រោះវាគឺជាផ្លូវដឹកជញ្ជូនតាមសមុទ្រដ៏សំខាន់ដែលឆ្លងកាត់តាមតំបន់ផ្ទាំងទឹកកករបស់ខ្លួន ព្រមទាំងតំបន់ចុងបូព៌ា ហើយវានឹងក្លាយទៅជាច្រកផ្លូវដ៏សំខាន់បំផុតដែលប្រើរយៈពេលខ្លីឆ្ពោះទៅកាន់គោលដៅរវាងតំបន់អឺរ៉ុបទាំងមូល និងបន្តទៅកាន់តំបន់អាស៊ីប៉ាស៊ីហ្វិក។ ក្រោយកិច្ចខិតខំប្រឹងប្រែងជាច្រើនឆ្នាំគេមើលឃើញ ថា​ NSR នឹងក្លាយទៅជាច្រកផ្លុវទឹកទំនិញតាមសមុទ្រដ៏មានសក្តានុពលខ្លាំងជាងគេច្រកផ្លូវទឹកតាមព្រែកស៊ុយអេ និងព្រែកជីកប៉ាណាម៉ាទៅទៀត។

គួរឲ្យដឹងដែរថា នាវាទំនិញចិនបានធ្វើដំណើរមកដល់ផែសមុទ្ររបស់ចក្រភពអង់គ្លេស Felixstowe ក្រោយការធ្វើដំណើរអស់រយៈពេល២០ថ្ងៃប៉ុណ្ណោះពីផែសមុទ្រចិន Nignbo។ នាវាដឹកទំនិញដែលមានទំងន់សរុប២៥០០០តោននេះក៏នឹងរំពឹងទុកថាបន្តធ្វើដំណើរទៅដល់ផែសមុទ្រនៅទីក្រុង Rotterdam របស់ហូឡូង់ និងទីក្រុង Hamburg របស់អាល្លឺម៉ង់ មុនពេលដែលបញ្ចប់ការទំលាក់ទំនិញចុងក្រោយនៅផែសមុទ្រទីក្រុង St. Petersburg របស់រុស្ស៊ី។ ការធ្វើដំណើរជាប្រវត្តិសាស្ត្រនេះបានក្លាយទៅជាការតាមដានយ៉ាងយកជិតទុកដាក់ដោយបណ្តាក្រុមហ៊ុនអ្នករកស៊ីនៅក្នុងឧស្សាហកម្មដឹកជញ្ជូនតាមសមុទ្ររបស់ពិភពលោកដើម្បីអាចជំនួសច្រកផ្លូវស៊ុយអេ ដែលជាទូទៅចំណាយពេលដល់ទៅ៤០ថ្ងៃ និងច្រកសមុទ្ររបស់អាហ្វ្រិក Cape of Good Hope ត្រូវចំណាយពេលដល់ទៅ៥០ថ្ងៃ។

កន្លងមក ប្រធានាធិបតីរុស្ស់ី លោក Vladimir Putin ធ្លាប់បានធ្វើការកត់សំគាល់ជាច្រើនរួចមកហើយថា NSR គឺជាផែនការជាយុទ្ធសាស្ត្ររបស់រុស្ស៊ី។ ទីក្រុងមូស្គូ គ្រោងនឹងដាក់គោលដៅក្នុងការបង្កើនចំនួនដឹកជញ្ជូនទាំងចំនួន និងទំហុំឲ្យបានទៅដល់២០០លានតោននៅត្រឹមឆ្នាំ២០៣០ ដោយក្នុងនោះមានទាំងការធ្វើទំនើបកម្មផែសមុទ្រនៅតំបន់ភាគខាងជើង និងការបង្កើនក្រុមនាវាសម្រាប់សេវាកម្មបំបែកផ្ទាំងទឹកកកឲ្យបានកាន់តែច្រើនផង៕