សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពោធិ៍សាត់ ៖ និស្សិតអាហារូបករណ៍មួយរូប ដែលបច្ចុប្បន្នកំពុងសិក្សាឆ្នាំទី២ នៃសកលវិទ្យាល័យ ភូមិន្ទកសិកម្ម បានប្ដេជ្ញាយ៉ាងមុតមាំក្នុងការខិតខំប្រឹងប្រែងរៀនសូត្រ សំដៅយកជំនាញរបស់ខ្លួនទៅអភិវឌ្ឍន៍ឱ្យបានជាប្រយោជន៍នៅស្រុកភូមិវិញ។
យុវជន ថន ខាក់ ជានិស្សិតផ្នែកវិទ្យាសាស្ត្រកសិកម្ម និងជាម្នាក់ក្នុងចំណោម ១៦នាក់ដែលបានទទួលអាហារូបករណ៍ពីគម្រោងអប់រំសហគមន៍ RED+ នៃតំបន់ជួរភ្នំក្រវាញ។ និយាយដោយឡែក តែក្នុងខេត្តពោធិ៍សាត់ យុវជន ថន ខាក់ ជានិស្សិតតែម្នាក់គត់ដែលទទួលបានការអប់រំដល់ថ្នាក់ឧត្តម សិក្សា។
ក្នុងឱកាសចូលរួមយុទ្ធនាការអន្ទាក់សូន្យដំណាក់កាលទីពីរ ដែលបានចាប់ផ្ដើមនៅក្នុងខេត្តពោធិ៍សាត់ យុវជន ថន ខាក់ រៀបរាប់ទាំងមោទនភាពថា ខ្លួនបានមើលឃើញពីសក្កានុពលផ្នែកកសិកម្មនៅក្នុងសហគមន៍ ប៉ុន្តែយ៉ាងណា ការធ្វើកសិកម្មទាំងនោះហាក់បន្តធ្វើទៅតាមទម្លាប់ដែលចេះតៗគ្នាមក។
យុវជន ថន ខាក់ ៖
“បើតាមជំនាញរបស់ខ្ញុំត្រឡប់មកភូមិវិញ ខ្ញុំនឹងបង្រៀនពួកគាត់ពីការធ្វើកសិកម្ម បែបទំនើប ដែលធ្វើនៅលើដីទំហំតូច តែទទួលបានទិន្នផលច្រើន ខុសពីអ្វីដែលពួកគាត់កំពុងធ្វើ”
ដោយឆន្ទៈនេះហើយ ដែលអ្នកអនុវត្តគម្រោងបានជ្រើសរើសយកយុវជនរូបនេះ កាលពីឆ្នាំ២០២២ កន្លងទៅ។ បើតាមនិស្សិតរូបនេះដដែល ការដាក់ពាក្យយកអាហារូបករណ៍ក៏មិនស្រួលពេកដែរ ដោយខ្លួនត្រូវសរសេរពាក្យដាក់ទៅកាន់សហគមន៍ និងក្រោយមកមានការសម្ភាសន៍ជាមួយក្រុមការងារអនុវត្តគម្រោង។ នៅក្នុងកិច្ចសម្ភាសន៍ គឺគម្រោងអប់រំសហគមន៍ចង់ឃើញពីឆន្ទៈពិតប្រាកដរបស់សិស្សរូបនោះ ក្នុងការវិលត្រឡប់មកជួយជាប្រយោជន៍ដល់សហគមន៍វិញ បន្ទាប់ពីបញ្ចប់ការសិក្សា។
យុវជន ថន ខាក់ បន្តរៀបរាប់ថា ៖
“គេអត់មានកំណត់មុខវិជ្ជាដែលយើងត្រូវរៀនទេ គឺយើងរៀនអីដែលយើងស្រឡាញ់ ហើយត្រូវត្រឡប់មកជួយសហគមន៍ឱ្យបាន៣ឆ្នាំវិញ…អ្នកខ្លះគេរៀនទេសចរណ៍ ព្រោះសហគមន៍គេមានកន្លែងទេសចរណ៍ តែខ្ញុំជ្រើសរើសរៀនកសិកម្ម ព្រោះប្រជាជនភាគច្រើនក្នុង សហគមន៍ខ្ញុំជាកសិករ”
ដោយឡែក សម្រាប់អាហារូបករណ៍វិញ យុវជនរូបនេះអះអាងថា គម្រោងអប់រំសហគមន៍ RED+ បានរ៉ាប់រងនូវរាល់ការចំណាយទាំងអស់ រាប់បញ្ចូលទាំងថ្លៃបង់សាលាប្រចាំឆ្នាំ ការចាយវាយប្រចាំខែ មានការធានារ៉ាប់រងសុខភាព ការកាត់សម្លៀកបំពាក់ ការចំណាយលើសម្ភារៈសិក្សាជាដើម ពោលគឺនិស្សិតដែលជាប់អាហារូបករណ៍នេះ ផ្ដោតតែលើការខិតខំរៀនសូត្រប៉ុណ្ណោះ។
តាមរយៈជំនួយជាការអប់រំនេះ យុវជន ថន ខាក់ ប្ដេជ្ញាបន្តខិតខំប្រឹងប្រែងកាន់តែខ្លាំងដើម្បីប្រយោជន៍របស់សហគមន៍ជារួម និងជាពិសេស ជាចំណែកមួយធ្វើឱ្យប្រជាសហគមន៍មានជម្រើស ការងារ និងឈប់ចូលព្រៃបរបាញ់សត្វ ឬពឹងលើអនុផលព្រៃឈើ៕
Account
Security
Favourite Content