ភ្នំពេញ ៖ កម្ពុជាបាននិងកំពុងយកចិត្តទុកដាក់ខ្ពស់ លើការងារហិរញ្ញវត្ថុប្រកបដោយចីរភាព និងហិរញ្ញវត្ថុបៃតង ហើយបានចូលជាសមាជិករបស់ស្ថាប័នថ្នាក់តំបន់ និងអន្តរជាតិនានា ដើម្បីជំរុញសកម្មភាពការងារសម្រាប់កិច្ចការលើកកម្ពស់ហិរញ្ញវត្ថុប្រកបដោយចីរភាព និងហិរញ្ញវត្ថុបៃតង។
យោងតាមរបាយការណ៍របស់ធនាគារត្រួតពិនិត្យប្រចាំឆ្នាំ២០២២ របស់ធនាគារជាតិនៃកម្ពុជា ដែលបានចេញផ្សាយកាលពីថ្មីៗនេះ បានឱ្យដឹងដូច្នេះថា ខ្លួនបាន និងកំពុងយកចិត្តទុកដាក់ខ្ពស់លើការងារហិរញ្ញវត្ថុប្រកបដោយចីរភាព និងហិរញ្ញវត្ថុបៃតង។ ជាក់ស្តែង ធនាគារជាតិនៃកម្ពុជា បានចូលជាសមាជិករបស់ស្ថាប័នថ្នាក់តំបន់ និងអន្តរជាតិនានា ដូចជា ១/-ក្រុមការងារ ស្ដីពី ចីរភាពហិរញ្ញវត្ថុ និងក្រុមការងារ ស្តីពី ក្របខ័ណ្ឌទស្សនៈទាន និងគោលការណ៍នៃវត្តករសាស្ត្រអាស៊ាន (ASEAN Taxonomy) ២/-ក្រុមការងារបរិយាបន្នហិរញ្ញវត្ថុបៃតង និង ៣/-បណ្តាញធនាគារកណ្ដាល និងអាជ្ញាធរត្រួតពិនិត្យសម្រាប់កិច្ចការហិរញ្ញវត្ថុបៃតង។
ធនាគារជាតិនៃកម្ពុជាបានបញ្ចូលគោលការណ៍បរិស្ថាន សង្គម និងអភិបាលកិច្ច ទៅក្នុងសេចក្ដីណែនាំនៃការវិនិយោគ ទុនបម្រុងអន្តរជាតិ និងបានវិនិយោគលើសញ្ញាបណ្ណបៃតង ដែលបោះផ្សាយដោយធនាគារសម្រាប់ការទូទាត់អន្តរជាតិ។ ជាមួយគ្នានេះ ធនាគារជាតិនៃកម្ពុជា បានបន្តអនុវត្តយ៉ាងសកម្មនូវការកសាងសមត្ថភាពមន្ត្រីបង្គោលលើប្រធានបទនានា ពាក់ព័ន្ធនឹងហិរញ្ញវត្ថុប្រកបដោយចីរភាព និងហិរញ្ញវត្ថុបៃតង ក៏ដូចជាការប្រែប្រួលអាកាសធាតុ។ ជាក់ស្ដែង ធនាគារជាតិនៃកម្ពុជា បានសហការរៀបចំវគ្គបណ្តុះបណ្តាល និងកិច្ចប្រជុំនានា ជាមួយដៃគូអភិវឌ្ឍន៍អន្តរជាតិមួយចំនួន ដូចជា ១/-ស្ថានទូតអង់គ្លេសប្រចាំនៅកម្ពុជា ស្តីពី ការវាយតម្លៃហានិភ័យបរិស្ថាន សង្គម និងអភិបាលកិច្ច ២/-សាជីវកម្មហិរញ្ញវត្ថុអន្តរជាតិប្រចាំនៅកម្ពុជា ស្ដីពីការកសាងចក្ខុវិស័យហិរញ្ញវត្ថុប្រកបដោយចីរភាព និងការវាយតម្លៃលើការត្រៀមខ្លួនរបស់កម្ពុជាសម្រាប់ទីផ្សារហិរញ្ញវត្ថុបៃតង និង ៣/-អង្គការ UNESCAP និងនិយ័តករមូលបត្រកម្ពុជា ស្តីពីការបោះផ្សាយសញ្ញាបណ្ណតាមវិស័យប្រកបដោយចីរភាព និងការរៀបចំរបាយការណ៍សិក្សា ស្ដីពីការវិភាគទីផ្សារហិរញ្ញវត្ថុប្រកបដោយចីរភាពនៅកម្ពុជា។
ធនាគារជាតិនៃកម្ពុជាបានឱ្យដឹងដូច្នេះថា ខ្លួននឹងបន្តគាំទ្រសកម្មភាពការងារសម្រាប់កិច្ចការលើកកម្ពស់ហិរញ្ញវត្ថុប្រកបដោយចីរភាព និងហិរញ្ញវត្ថុបៃតង ដោយគ្រោងរៀបចំនូវយុទ្ធសាស្ត្រលើកកម្ពស់ហិរញ្ញវត្ថុប្រកបដោយ ចីរភាពតាមរយៈការសិក្សាលើការបង្កើត និងការអនុវត្តវត្តករសាស្ត្រឥណទានសង្គម និងបៃតង (Green and social loan Taxonomy) និងការរៀបចំនូវស្តង់ដាររបាយការណ៍បរិស្ថាន សង្គម និងអភិបាលកិច្ចជាដើម។
ក្នុងកិច្ចសម្ភាសន៍ជាមួយសារព័ត៌មាន CGTN កាលពីថ្មីៗនេះ លោកជំទាវបណ្ឌិត ជា សិរី ទេសាភិបាលរងធនាគារជាតិនៃកម្ពុជា លោកបានថ្លែងថា ការប្រែប្រួលអាកាសធាតុ គឺជាទំនួលខុសត្រូវរបស់មនុស្សគ្រប់រូប។ ផែនដីគឺជាទូកតែមួយ ហើយយើងទាំងអស់គ្នារស់នៅលើផែនដីនេះ មិនថាធំ ឬតូច យើងត្រូវចូលរួមចំណែក។
លោកជំទាវបានលើកឡើងថា ៖
“ខ្ញុំគិតថា ប្រទេសតូចៗមានផលប៉ះពាល់នៃការប្រែប្រួលអាកាសធាតុ និងកាន់តែងាយរងគ្រោះចំពោះការរងឥទ្ធិពលអវិជ្ជមាននៃការប្រែប្រួលអាកាសធាតុ ជាងប្រទេសធំៗ ដោយសារតែយើងខ្វះធនធាន ដើម្បីកាត់បន្ថយផលប៉ះពាល់ និងជួយដល់ការផ្លាស់ប្តូរប្រទេស”
លោកជំទាវក៏បានជំរុញឱ្យមានការគាំទ្រ និងជំនួយបន្ថែមពីប្រទេសធំៗ សម្រាប់ប្រទេសកំពុងអភិវឌ្ឍន៍មិនមែនតែកម្ពុជានោះទេ។ ម៉្យាងវិញទៀត វាមិនមែនមានន័យថា យើងគួរតែអង្គុយរង់ចាំ ហើយមិនធ្វើអ្វីនោះទេ ហើយនោះជាអ្វីដែលយើងប្រទេសកម្ពុជា និងធនាគារជាតិនៃកម្ពុជា បាន និងកំពុងខិតខំធ្វើគ្រប់យ៉ាង ដើម្បីរួមចំណែក និងដើរតួក្នុងរឿងនេះ។ លោកជំទាវ ជា សិរី បានបន្ថែមថា ៖
“យើងបានធ្វើរួចហើយ មុនដំបូងយើងបានធ្វើការវាយតម្លៃហានិភ័យលើផលប៉ះពាល់នៃការប្រែប្រួលអាកាសធាតុលើប្រព័ន្ធហិរញ្ញវត្ថុ។ ឥឡូវនេះ យើងក៏កំពុងធ្វើការលើការបង្កើតផែនទីបង្ហាញផ្លូវស្តីពីហិរញ្ញវត្ថុប្រកបដោយនិរន្តរភាព និងក៏កំពុងអភិវឌ្ឍគម្រោង (taxonomy )សម្រាប់ប្រទេសកម្ពុជាផងដែរ៕”