ភ្នំពេញ ៖ គិតមកដល់ពេលនេះ កម្ពុជាមានរោងចក្រផលិតសំបកកង់រថយន្ដចំនួន៣ ក្នុងនោះរោងចក្រចំនួន ២កំពុងដំណើរការ និងមួយទៀតកំពុងស្ថិតក្នុងដំណាក់កាលសាងសង់។

រោងចក្រទី១ ដែលបានដំណើរការ គឺមានទីតាំងនៅក្រុងបាវិត ខេត្តស្វាយរៀង និងរោងចក្រទី២ដែល​បាន​ដំណើរការផងដែរ មានទីតាំងនៅតំបន់សេដ្ឋកិច្ចពិសេស ក្រុងព្រះសីហនុ។ រីឯរោងចក្រមួយទៀតស្ថិតនៅក្នុងដំណាក់កាលសាងសង់គឺមានទីតាំងនៅក្នុងខេត្តក្រចេះ។ មិនត្រឹមតែប៉ុណ្ណោះ រោងចក្រ ខាត ថាយអឺរ ឯ.ក ដែលជារោងចក្រផលិតសំបកកង់រថយន្ដដំបូង​បង្អស់នៅកម្ពុជា ក៏កំពុងមានគម្រោងក្នុងបោះដើមទុនបន្ថែមទៀត ដើម្បីពង្រីកសមត្ថភាពផលិតផងដែរ។

ទាក់ទិននឹងរឿងនេះ អ្នកជំនាញបានបង្ហាញការសាទរដោយគូសបញ្ជាក់ថា នេះជាដំណឹងល្អសម្រាប់អ្នកដាំដំណាំកៅស៊ូ ក៏ដូចជាសម្រាប់វិស័យកៅស៊ូនៅកម្ពុជាតែម្ដង។ ជាដំណឹងល្អព្រោះថា កន្លងមក កម្ពុជាពឹងផ្អែកខ្លាំងទៅលើទីផ្សារខាងក្រៅក្នុងការលក់ជ័រកៅស៊ូ ដែលការពឹងផ្អែកបែបនេះនឹងធ្វើឱ្យទីផ្សារកៅស៊ូមិនមានស្ថិរភាព។ ហេតុដូច្នេះហើយបានជាពេលកន្លងមក នៅពេលដែលតម្លៃកៅស៊ូធ្លាក់ចុះខ្លាំង ប្រជាកសិករដែលដាំដុះកៅស៊ូបង្ខំចិត្តកាប់​ដើមកៅស៊ូចោល។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា​ និងជាអ្នកជំនាញសេដ្ឋកិច្ចមួយរូបដែរនោះបានមានប្រសាសន៍ថា តាមរយៈការវិនិយោគរោងចក្រផលិតកៅស៊ូកង់រថយន្ដនៅកម្ពុជានេះ គឺជាសញ្ញាមួយល្អសម្រាប់វិស័យកម្មន្ដសាល មិនមែនវិស័យកាត់ដេរ ដែលជាអនុវិស័យ​សម្រាប់ទ្រទ្រង់​សេដ្ឋកិច្ចជាតិ ជាពិសេសគឺផលិតផលកសិកម្ម។

អ្នកឧកញ៉ាបន្តថា៖

«នៅពេលដែលយើងមានរោងចក្រវិនិយោកកង់ឡានហើយ បរិមាណ​កៅស៊ូ​មួយចំនួនគឺថាយើងផ្គត់ផ្គង់នៅនឹងទីផ្សារក្នុងស្រុករបស់យើងតែម្ដង ដែលលក់ឱ្យរោងចក្រ​ផលិតកង់​រថយន្ដនេះឯង…ខ្ញុំជឿថា បើមានរោងចក្រកាន់តែច្រើន​ ដំណាំផ្នែកឧស្សាហកម្មកៅស៊ូនេះនឹងមាន​ការ​កើនឡើង ខុសពីពេលកន្លងមកដែលកៅស៊ូមានបញ្ហាទីផ្សារ ទើបធ្វើឱ្យប្រជាកសិករសុ​ខចិត្ត​កាប់កៅស៊ូចោល ដើម្បីដាំដំណាំផ្សេងជំនួសវិញ»។

គួរបញ្ជាក់ថា ការនាំចេញជ័រកៅស៊ូ និងឈើកៅស៊ូក្នុងរយៈពេល១១ខែ កម្ពុជារកចំណូលបាន៤៤៦ ៩២៥ ៦៧៤ដុល្លារ ដែលក្នុងនោះចំណូលពីការនាំចេញជ័រកៅស៊ូ មានចំនួន ៤៤៥ ៤២២ ២៣៥ដុល្លារ និងចំណូលពីការនាំចេញឈើកៅស៊ូមានចំនួន ១ ៥០៣ ៤៣៩ដុល្លារ។ នេះបើយោងតាមរបាយការណ៍ប្រចាំឆ្នាំរបស់ក្រសួងកសិកម្ម រុក្ខប្រមាញ់និងនេសាទ។

របាយការណ៍ដដែលនេះ បានឱ្យដឹងថា ផលិតផលជ័រកៅស៊ូរយៈពេល១១ខែ ឆ្នាំ២០២៣ មានចំនួន ៣៣៤ ៨៨៣តោន កើនឡើងចំនួន ៥ ៥២៧តោន ស្មើនឹង១,៧% ប្រៀបធៀបរយៈពេល១១ខែ ឆ្នាំ២០២២។ រីឯតម្លៃលក់ជ័រកៅស៊ូគិតជាមធ្យមរយៈពេល១១ខែ ឆ្នាំ២០២៣ គឺ១ ៣៣៣ដុល្លារ ក្នុងមួយតោន បាន​ថយចុះចំនួន១១១ដុល្លារក្នុងមួយតោន ស្មើនឹង៧,៧% ប្រៀបធៀបរយៈពេល១១ខែ ឆ្នាំ២០២២ ។

​យោងតាម​អគ្គនាយកដ្ឋាន​កៅស៊ូ គិត​ត្រឹម​ចុងឆ្នាំ​ ២០២២ នៅ​កម្ពុ​ជាមាន​ផ្ទៃដី​កៅស៊ូ​សរុប ៤០៤ ៥៧៨​ ហិកតា ក្នុងនោះ​ផ្ទៃដី​ចៀរ​ជ័រ​មាន ៣១៥ ៣៣២​ ហិកតា ស្មើនឹង ៧៨ ​ភាគរយ និង​ផ្ទៃដី​ថែទាំ​ចំនួន ៨៩ ២៤៦ ​ហិកតា ស្មើនឹង ២២​ ភាគរយ​៕