សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ កិច្ចប្រជុំកំពូលនៃក្រុមប្រទេសសេដ្ឋកិច្ចថ្មីហៅកាត់ថា BRICS ទើបតែបានបញ្ចប់ទៅកាលពីពេលថ្មីៗនេះដោយមានប្រទេសរុស្ស៊ីជាម្ចាស់ផ្ទះ និងបង្ហាញនូវភាពខ្លាំងក្លា លើកមុខមាត់របស់រដ្ឋាភិបាលទីក្រុងមូស្គូនៅក្នុងឆាកអន្តរជាតិបើទោះបីជាមានការមិនពេញចិត្តពេញថ្លើមពីសំណាក់បណ្តាប្រទេសលោកខាងលិចក្តី។
ក្នុងពេលជាមួយគ្នានៃកិច្ចប្រជុំនេះ ប្រទេសរុស្ស៊ីក៏ទើបតែទទួលបានដំណឹងល្អផ្ទួនៗបន្ថែមទៀតតាមរយៈរបាយការណ៍ដែលត្រូវបានចេញផ្សាយដោយមូលនិធិរូបិយវត្ថុអន្តរជាតិ IMF ថា បានវ៉ាដាច់ប្រទេសជប៉ុន និងក្លាយជាមហាអំណាចសេដ្ឋកិច្ចពិភពលោកលេខរៀងទី៤គិតក្នុងទំហំអំណាចនៃការបញ្ជាទិញ ឬ purchasing power parity (PPP)។
អំណាចនៃការបញ្ជាទិញ PPP ដែលបានមកពីការប្រៀបធៀបគ្នារវាងផលិតកម្មក្នុងប្រព័ន្ធសេដ្ឋកិច្ច និងស្តង់ដារស់នៅរវាងប្រទេសនីមួយៗ ហើយដោយការធ្វើចំណាត់ថ្នាក់គ្នាទៅលើភាពខុសគ្នាតិចឬច្រើននៃតម្លៃថ្លៃដើមនៃទំនិញប្រើប្រាស់ រួមទាំងសេវាកម្មផ្សេងៗ។
នៅក្នុងរបាយការណ៍ World Economic Outlook (WEO) ដែលផលិតដោយ IMF និងត្រូវបានប្រកាសចេញផ្សាយជាផ្លូវការកាលពីសប្តាហ៍មុនបានបង្ហាញថា ប្រទេសរុស្ស៊ី គិតជាផលិតផលក្នុងស្រុកសរុប ឬ GDP សម្រាប់ឆ្នាំ២០២៤នេះ មានទំហំកើនឡើងទៅដល់៣,៥៥ភាគរយនៃចំណែក GDP សរុបរបស់ពិភពលោកក្នុងលក្ខខណ្ឌ PPP ពោលគឺច្រើនជាងជប៉ុនដែលមានត្រឹមតែ ៣,៣៨ភាគរយនៃ GDP ពិភពលោក។
ដោយឡែក ប្រទេសមហាអំណាចសេដ្ឋកិច្ចសម្រាប់លក្ខណ្ឌ PPP កំពូលទាំង៣របស់ពិភពលោកនោះគឺមានដូចជាប្រទេសចិនឈរនៅលេខរៀងទី១ មានចំណែក ១៨,៨ភាគរយនៃ GDP ពិភពលោក ខណៈអាមេរិកឈរនៅលេខរៀងទី២ មាន១៥ភាគរយ និងឥណ្ឌានៅលេខ៣ មាន៧,៩ភាគរយនៃ GDP ពិភពលោក ។
ក្រុមអ្នកស្រាវជ្រាវរបាយការណ៍ WEO បានសរសេររៀបរាប់ដែរថា ការតម្លើងចំណាត់ថ្នាក់រុស្ស៊ីនៅក្នុងឆ្នាំ២០២៤នេះ ដោយសារក្នុងនោះមានកត្តាជំរុញសំខាន់មួយដែលបានមកពីសំពាធ និងការដាក់ទណ្ឌកម្មសេដ្ឋកិច្ចពីសំណាក់លោកខាងលិច មានន័យថា បច្ចុប្បន្នសមាជិករបស់ BRICS ចំនួន៣ប្រទេសរួចទៅហើយដែលស្ថិតនៅចំណាត់កំពូលរបស់ WEO រួមមាន ចិន, ឥណ្ឌា និងរុស្ស៊ី ។
ចំពោះចំណាត់ថ្នាក់ថ្មីនេះ អ្នកជំនាញសេដ្ឋកិច្ចក្នុងស្រុករបស់រុស្ស៊ី និងជាប្រធានផ្នែកសិក្សាស្រាវជ្រាវមីក្រូសេដ្ឋកិច្ចនៃសកលវិទ្យាល័យហិរញ្ញវត្ថុ Financial University លោក Evgeny Balatsky បានលើកឡើងថា៖ រុស្ស៊ី បានអនុវត្តនូវកិច្ចការងារដ៏មានប្រសិទ្ធភាព និងបានឆាប់រហ័សបំផុតដើម្បីអាចជំនួសទំនិញក្នុងស្រុកទៅក្នុងទីផ្សារប្រើប្រាស់ ហើយចំណាត់ថ្នាក់នេះគឺពិតជាមានភាពស័ក្ដិសមទៅនឹងអ្វីដែលបានរំពឹងទុកជាមុន។
លោកបានបន្តថា៖ ប៉ុន្មានឆ្នាំចុងក្រោយនេះ រុស្ស៊ី បានវ៉ាដាច់ដៃគូប្រកួតប្រជែងរបស់ខ្លួនទាំងនៅក្នុងតំបន់អឺរ៉ុបជាច្រើនប្រទេស មានដូចជា អង់គ្លេស, បារាំង, អាល្លឺម៉ង់ និងបច្ចុប្បន្នរាប់ទាំងប្រទេសជប៉ុនថែមទៀតផង។
គួរឲ្យដឹងដែរថា IMF បានបង្ហាញទិន្នន័យបច្ចុប្បន្នភាពថា ចំណែក GDP នៅក្នុងលក្ខខណ្ឌ PPP របស់តំបន់សេដ្ឋកិច្ចធំៗទាំង៧ ឬ G7 ដែលមានដូចជា កាណាដា, បារាំង, ជប៉ុន, អ៊ីតាលី, អាមេរិក, អង់គ្លេស និងអឺរ៉ុប បានធ្លាក់ចុះយ៉ាងខ្លាំងពី ៥០,៤២ភាគរយកាលពីឆ្នាំ១៩៨២ មកត្រឹមតែ ២៩ភាគរយប៉ុណ្ណោះនៅក្នុងឆ្នា២០២៤នេះ៕
Account
Security
Favourite Content