គណៈកម្មាធិការជាតិជំរុញចលនាភូមិមួយផលិតផលមួយ សហគ្រិនខ្មែរ និងអង្គការអុកស្វាម ក្រោមកិច្ចសហការជាមួយរដ្ឋបាលខេត្តកណ្ដាល នាព្រឹកថ្ងៃទី១៥ ខែកញ្ញា ឆ្នាំ២០២៣ បានរៀបចំវេទិកាផ្គូរផ្គងរវាងអ្នកផលិត និងអ្នកទិញ រួមជាមួយនឹងការដាក់តាំងបង្ហាញផលិតផលក្នុងស្រុក ក្រោមគម្រោង «ការទទួលបាន ទីផ្សារ សម្រាប់អ្នកផលិតក្នុងស្រុក និងសហគ្រាសធុនមីក្រូ តូច និងមធ្យម (ភូមិ១ផលិតផល១)»។

ជាមួយនឹងគោលដៅរួមគ្នាក្នុងការអភិវឌ្ឍសេដ្ឋកិច្ចក្នុងស្រុកប្រកបដោយបរិយាប័ន្ន និងនិរន្តរភាព គម្រោងនេះមានបំណងបង្កើតឱកាសទីផ្សារសម្រាប់សហគ្រាសធុនមីក្រូ តូច និងមធ្យម និងអ្នកផលិត​ក្នុងស្រុកដើម្បីជួបអ្នកទិញសក្តានុពល និងចូលរួមក្នុងការពិភាក្សាប្រកបដោយផ្លែផ្កាលើលក្ខខណ្ឌផ្គត់ផ្គង់ និងតម្រូវការផ្សេងៗ។

លើសពីនេះ ម្ចាស់អាជីវកម្មទាំងនោះមានឱកាសភ្ជាប់ទំនាក់ទំនងជាមួយតួអង្គផ្សេងៗ ដូចជាអាជ្ញាធរ​មូលដ្ឋាន ស្ថាប័នពាក់ព័ន្ធ អង្គការមិនមែនរដ្ឋាភិបាល ស្ថាប័នហិរញ្ញវត្ថុ និងក្រុមយុវជនដែលអាចផ្តល់​ការគាំទ្រជាបច្ចេកទេស និងធនធានក្នុងការអភិវឌ្ឍអាជីវកម្មរបស់ពួកគេ។ វេទិកានេះក៏រួមបញ្ចូលការ​តាំងផលិតផលដែលចូលរួមចំណែកក្នុងការផ្សព្វផ្សាយផលិតផល ក្នុងស្រុកទៅ​កាន់ទីផ្សារអោយកាន់​តែទូលាយផងដែរ។

ឯកឧត្តមបណ្ឌិត សួង ណយអគ្គលេខាធិការរងគណៈកម្មាធិការជាតិជំរុញចលនាភូមិមួយផលិតផលមួយនៃទីស្តីការគណៈរដ្ឋមន្ត្រីបានថ្លែងថា៖

«គណៈកម្មាធិការជាតិ និងគណៈកម្មាធិការខេត្ត រាជធានីជំរុញ​ចលនាភូមិមួយផលិតផលមួយមានសេចក្តីរំភើបរីករាយក្នុងការដឹកនាំគំនិតផ្តួចផ្តើមអោយ​មានជំនួប​រវាងអ្នកផលិត និងអ្នកទិញ ដ៏មានសារៈសំខាន់នេះដែលមានបំណងកាត់បន្ថយគម្លាតរវាងអ្នកផលិត​ក្នុងស្រុក និងអ្នកទិញសក្តានុពលប្រកបដោយប្រសិទ្ធភាព និងសុច្ចរិតភាព»។

តាមរយៈការបង្កើតយន្តការតភ្ជាប់បណ្តាញប្រទាក់ក្រឡាគ្នាប្រកបដោយអត្ថន័យ ពីអ្នកផ្គត់ផ្គង់វត្ថុ​ធាតុដើម អ្នកកែច្នៃវេចខ្ចប់ អ្នកប្រមូលផ្ដុំផលិតផល (ពីកសិដ្ឋានរហូតដល់តុបាយ ពីសិប្បកររហូត​ដល់អ្នកប្រើប្រាស់) ហើយពួកគាត់អាចសិក្សាស្វែងយល់ដកស្រង់បទពិសោធន៍ពីគ្នាទៅវិញទៅមក ណែនាំអ្នកផលិតទៅកាន់ទីផ្សារ ដោះស្រាយបញ្ហាជាមួយស្ថាប័នពាក់ព័ន្ធ ក្នុងការសុំចុះបញ្ជីរ ឬច្បាប់គតិយុត្តផ្សេងៗ និងជំរុញឱកាសពាណិជ្ជកម្ម លោកបណ្ឌិតមានទំនុកចិត្តថាព្រឹត្តិការណ៍​ថ្ងៃនេះនឹងរួមចំណែកដល់ការអភិវឌ្ឍសេដ្ឋកិច្ចនៃខេត្តកណ្ដាល និងប្រទេសកម្ពុជាទាំងមូល និងបង្កើន កម្រិតជីវភាពរបស់សហគមន៍មូលដ្ឋានផងដែរ»។​

ជាមួយគ្នានេះ ឯកឧត្តមបណ្ឌិត ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ បានមានប្រសាសន៍​ថា សន្ទុះនៃការគាំទ្រ និងការយល់ដឹងពីផលិតផលក្នុងស្រុកបច្ចុប្បន្ន មានការរីកចម្រើនគួរអោយកត់​សំគាល់ ប៉ុន្តែគួរមានការផ្សព្វផ្សាយ និងស្វែងរកទីផ្សារបន្ថែម។

ត្រង់ចំណុចនេះ ឯកឧត្តមបានបញ្ជាក់ថា សហគ្រិនខ្មែរមានសុទិដ្ឋិនិយម ក្នុងការសហការជាមួយ​គណៈកម្មាធិការ​ជាតិចលនា​ភូមិមួយផលិតផលមួយ ក្នុងការបង្កើតវេទិកាផ្គូផ្គងរវាងអ្នកផលិតក្នុងស្រុក និងអ្នកទិញដើម្បី​បង្កើនការលក់ ក៏ដូចជាផ្សព្វផ្សាយផលិតផលក្នុងស្រុក ដែលស្របទៅនឹងគោល​ការណ៍​របស់​សហគ្រិនខ្មែរ ដើម្បីពង្រីកបន្ថែមនូវទីផ្សារសម្រាប់ផលិតករកម្ពុជាអោយកាន់តែរីកសុះសាយទាំង​ទីផ្សារក្នុងស្រុកក៏ដូចជាអន្តរជាតិ។

ក្នុងនោះដែរ លោកស្រី ភាណ សោភ័ណនាយិកាអង្គការអុកស្វាមបានមានប្រសាសន៍ថា៖

« កិច្ចសហប្រតិបត្តិការនេះ បញ្ជាក់ពីការប្តេជ្ញាចិត្តរបស់អង្គការអុកស្វាមក្នុងការបង្កើនឱកាសដល់​អ្នកផលិតក្នុងស្រុក និងសហគ្រាសធុនមីក្រូ តូច និងមធ្យមនៅកម្ពុជា ក្នុងការទទួលបានទីផ្សារ បង្កើនប្រាក់ចំណូល និងរួមចំណែកក្នុងការអភិវឌ្ឍប្រកបដោយបរិយាប័ន្ន ស្របពេលដែលកំណើន​នេះនឹងជួយរួមចំណែក ក្នុងការកាត់បន្ថយភាពក្រីក្រនៅប្រទេសកម្ពុជា»។

គួរបញ្ជាក់ថា វេទិកា និងការតាំងបង្ហាញផលិតផលនៅខេត្តកណ្តាលនាឱកាសនេះ មានអ្នកចូលរួមដោយ​ផ្ទាល់ប្រមាណ ២៥០នាក់ រួមមានថ្នាក់ដឹកនាំ និងតំណាងមកពីមន្ទីរពាក់ព័ន្ធ សមាគមធុរកិច្ច សហគ្រាស​ខ្នាតតូច និងមធ្យម សហករណ៍កសិកម្ម ស្ថាប័នហិរញ្ញវត្ថុ អង្គការសង្គមស៊ីវិល និងក្រុមយុវជន។

គម្រោងនេះដែរ ត្រូវបានផ្តួចផ្តើមឡើងដោយគណៈកម្មាធិការជាតិជំរុញចលនាភូមិមួយផលិតផលមួយនិងអង្គការអុកស្វាម តាំងពីឆ្នាំ២០២២។ សម្រាប់ឆ្នាំ២០២៣នេះ គម្រោងក៏នឹងរៀបចំវេទិកានេះនៅ​១៥ខេត្ត-ក្រុង រួមមាន៖ សៀមរាប កំពង់ឆ្នាំង បាត់ដំបង បន្ទាយមានជ័យ កំពង់ចាម ឧត្តរមានជ័យ កណ្តាល កំពត កោះកុង ពោធិ៍សាត់ កំពង់ធំ ត្បូងឃ្មុំ ស្ទឹងត្រែង កំពង់ស្ពឺ និងស្វាយរៀង៕