ភ្នំពេញ ៖ ការបង្កើតអាជីវកម្មថ្មីគឺមិនមែនជារឿងងាយស្រួលនោះទេ ហើយអ្វីដែលជាបញ្ហាប្រឈមនោះ គឺការគ្រប់គ្រងហិរញ្ញវត្ថុ ឬលុយ ដើម្បីធានាបានថា អាជីវកម្មមានស្ថិរភាពហិរញ្ញវត្ថុក្នុងការឈានទៅដល់ភាពរីកចម្រើននៃអាជីវកម្ម។

ការដាក់ចេញគោលដៅក្នុងការគ្រប់គ្រងហិរញ្ញវត្ថុរឹងមាំ និងប្រុងប្រយ័ត្ន គឺជាគន្លឹះស្នូលសម្រាប់អាជីវកម្មនានា ប៉ុន្តែសម្រាប់ម្ចាស់អាជីវកម្មខ្នាតតូច ការគ្រប់គ្រងបាន ឬមិនបាននូវប្រព័ន្ធហិរញ្ញវត្ថុអាចបង្ហាញពីភាពជោគជ័យ ឬបរាជ័យរបស់អាជីវកម្ម។

បញ្ហាប្រឈមដ៏សំខាន់មួយដែលម្ចាស់អាជីវកម្មជួបប្រទះគឺថា ពួកគេមិនមែនជាអ្នកជំនាញផ្នែកហិរញ្ញវត្ថុ ដែលទាមទារឱ្យពួកគេរៀនសូត្រពីការ «ការគ្រប់គ្រងលុយ» របស់ពួកគេឱ្យបានច្បាស់លាស់។

សម្រាប់អ្នកដែលកំពុងប្រឈមមុខនឹងបញ្ហានេះ អាចពិចារណាជាមួយនឹងគន្លឹះហិរញ្ញវត្ថុចំនួន ៥ ដូចដែលបានបង្ហាញនៅខាងក្រោម ៖

លុយអាជីវកម្ម និងលុយផ្ទាល់ខ្លួន ៖ ច្បាប់ទីមួយសម្រាប់ការធ្វើជាម្ចាស់អាជីវកម្ម; កុំ​ឡូកលំលុយ​អាជីវកម្ម​របស់​អ្នក​ជាមួយ​នឹង​លុយ​ផ្ទាល់ខ្លួន​របស់​អ្នក។ ការបែងចែកមិនច្បាស់លាស់រវាងលុយអាជីវកម្ម និងលុយផ្ទាល់ខ្លួន មានន័យថា អ្នកកំពុងតែបាត់បង់ទិន្នន័យពីប្រាក់ចំណូល និងលំហូរសាច់ប្រាក់របស់អាជីវកម្មរបស់ ហើយអាចនឹងឈានដល់ការបាត់បង់លុយផ្ទាល់ខ្លួន ដោយសារតែភាពមិនច្បាស់លាស់ក្នុងការគ្រប់គ្រងហិរញ្ញវត្ថុ។

ឧទាហរណ៍ ក្នុងករណីអាជីវកម្មប្រើប្រាស់កម្ចី នៅពេលចាប់ផ្តើមប្រើកម្ចី អាជីវកម្មអាចក្លាយជាបំណុល បើសិនការបែងចែកលុយអាជីវកម្ម និងលុយផ្ទាល់ខ្លួនមិនឱ្យច្បាស់លាស់។ ការលាយបញ្ចូលគ្នានៃលុយអាជីវកម្មជាមួយនឹងលុយផ្ទាល់ខ្លួននឹងធ្វើឱ្យពិបាកក្នុងការធ្វើកំណត់ត្រាហិរញ្ញវត្ថុ។ ដូច្នេះ ដើម្បីចៀសវាងកំហុសនៃការបញ្ចូលគ្នានូវគណនីទាំងពីរ គួរបើកគណនីធនាគារដាច់ដោយឡែកសម្រាប់អាជីវកម្មរបស់អ្នក និងគណនីផ្ទាល់ខ្លួន។

វិនិយោគដោយសន្សំសំចៃ ៖ ក្នុងប៉ុន្មានខែដំបូង ឬឆ្នាំដំបូង នៅពេលដែលអាជីវកម្មរបស់អ្នកនៅតែស្ថិតក្នុងដំណាក់កាលចាប់ផ្តើម សូមប្រាកដថា រាល់ការចំណាយត្រូវមានភាពច្បាសលាស់ និងសន្សំសំចៃ។ ទោះបីជាអាជីវកម្មប្រើប្រាស់ប្រាក់កម្ចី ដើម្បីគាំទ្រដល់អាជីវកម្មរបស់ខ្លួនក៏ដោយ ការចំណាយថ្មីៗអាចកើតឡើងជានិច្ច។

គិតគូលើការទូទាត់កម្ចី ៖ កម្ចីអាចជាបំណុលល្អ និងអាក្រក់ អាស្រ័យលើការប្រើប្រាស់របស់ម្ចាស់អាជីវកម្មនីមួយៗ ហើយការជាប់បំណុលយូរមិនដែលល្អសម្រាប់អាជីវកម្មទេ។ បើ​ជាប់​កម្ចី​ណា​មួយ ហើយនៅពេលអាជីវកម្មចាប់ផ្តើមទទួលបានចំណូល សូម​ប្រាកដ​ថា ​អ្នករៀបចំ​គម្រោងទូទាត់​សង​ឱ្យបានលឿនតាម​ដែល​អាច​ធ្វើ​ទៅ​បាន។ ធ្វើដូច្នេះ វាសម្រាលដល់បន្ទុកហិរញ្ញវត្ថុរបស់អាជីវកម្ម នៅពេលអាជីវកម្មលែងមានបន្ទុកទូទាត់កម្ចី។

ទុនបម្រុង ឬសាច់ប្រាក់បម្រុង ៖ ទុនបម្រុងអាចដូចជាគណនីសន្សំសម្រាប់អាជីវកម្មរបស់អ្នកដែលអាចជួយអ្នកក្នុងគ្រាអាសន្ន នៅពេលដែលមិនមានវិធីផ្សេងៗ ក្នុងការដោះស្រាយបញ្ហាហិរញ្ញវត្ថុភ្លាមៗ។ វាមានសារៈសំខាន់ណាស់សម្រាប់អាជីវកម្មនានា ខណៈដែលអ្នកមិនអាចដឹងមុនបានទេថា នឹងមានរឿងកើតឡើងនាអនាគត ហើយក្នុងករណីដែលអ្នកយកប្រាក់ចំណូលរបស់អ្នកទៅវិនិយោគទាំងអស់នោះ អ្នកអាចប្រឈមមុខនឹងបញ្ហាហិរញ្ញវត្ថុ។ សូមរក្សាទុកចំណែកខ្លះនៃប្រាក់ចំណេញរបស់អ្នកមួយចំណែក ដើម្បីឆ្លើយតបនឹងភាពមិនច្បាស់លាស់ ឬបញ្ហាប្រឈមដែលអាចកើតឡើងនាពេលអនាគត។

ផែនការរៀបចំថវិកា ៖ គ្មានអាជីវកម្មណាអាចដំណើរការរលូនដោយគ្មានការរៀបផែនការថវិកា ឬផែនការហិរញ្ញវត្ថុច្បាស់លាស់នោះទេ។ ការរៀបចំផែនការថវិកាជួយធ្វើឱ្យអ្វីគ្រប់យ៉ាងមានភាពច្បាស់លាស់ និងជួយឱ្យអ្នករក្សាគោលដៅអាជីវកម្ម ដែលអ្នកចង់សម្រេចបាន។ អ្នក​នឹង​មិនមានភាពតានតឹងផ្នែកហិរញ្ញវត្ថុ ​ក្នុង​ពេល​ដោះស្រាយ​បញ្ហាអាជីវកម្ម ​និង​ការ​ចំណាយ​ក្នុងអាជីវកម្មរបស់​អ្នក ​ព្រោះ​អ្នក​ដឹង​ច្បាស់​ថា​តើ​លុយ​ប៉ុន្មាន​ត្រូវ​បាន​​ចំណាយ​​លើ​​អ្វីខ្លះ។ ដូច្នេះ បង្កើតគម្រោងរៀបចំថវិកា នឹងជួយឱ្យអាជីវកម្មបែងចែកបានច្បាស់លាស់ពីចំណាយ ចំណូល និងចំណេញ៕