សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ត្រប់សណ្ដាយ ជាដំណាំមួយដែលគេនិយមដាំ ព្រោះវាមានភាពងាយស្រួលជាងប្រភេទដំណាំដទៃ ទាំងការដាំ ទាំងការថែទាំ និងប្រើរយៈពេលខ្លី អាចទទួលបានទិន្នផលខ្ពស់ ជាពិសេសគេអាចយកទៅច្នៃធ្វើជាម្ហូបបានច្រើនមុខ មិនថាជាការចម្អិន ឬធ្វើជាបន្លែផ្ទាប់ស្រស់នោះទេ ខណៈដែលទីផ្សារក៏មានភាពទូលាយ។ ប៉ុន្តែ ទោះជាយ៉ាងណា ដំណាំត្រប់សណ្ដាយ ឬត្រប់វែងនេះ ក៏ងាយនឹងរងការទន្ទ្រានពីពពួកសត្វចង្រៃ និងកត្តាធម្មជាតិផងដែរ ដែលអ្នកដាំ ជាពិសេស កសិករត្រូវតែមានការយល់ដឹងឱ្យបានច្បាស់ទៅលើការការគ្រប់គ្រងដោយប្រើវិធានការមួយចំនួន។
បើតាមឯកសារផ្សព្វផ្សាយរបស់ក្រសួងកសិកម្ម រុក្ខប្រមាញ់ និងនេសាទ បានឱ្យដឹងថា កសិករអាចបញ្ចៀសបញ្ហាដែលអាចកើតមានឡើងលើដំណាំត្រប់សណ្តាយតាមវិធានការផ្សេងៗគ្នា ដូចជា ការជ្រើសរើសពូជដែលធន់ទ្រាំ ឬពូជធន់ចំពោះសត្វល្អិត ឬមានវិធានសំខាន់ៗមួយចំនួនទៀត ដូចជា វិធានការដាំដុះ វិធានការមេកានិច និងវិធានការជីវសាស្ត្រជាដើម។
ក្នុងនោះ វិធានការដាំដុះ កសិករគួរជៀសវាងការធ្វើឯកវប្បកម្មដំណាំត្រប់ ហើយត្រូវអនុវត្តដំណាំវិលជុំវិញ ព្រោះដង្កូវចោះត្រួយ និងផ្លែ វាបំផ្លាញលើដំណាំតែមួយប្រភេទ ហេតុនេះគេត្រូវការផ្អាកការដាំដុះត្រប់ ២-៣រដូវជាមុនសិន ទើបអាចកាត់បន្ថយការបំផ្លាញបានច្រើន។ ម៉្យាងវិញទៀត មិនត្រូវដាំដំណាំត្រប់នៅក្បែរចំការដំណាំដទៃ ជាពិសេស ដំណាំកប្បាស តាសក់ ឬតំបន់ដទៃទៀតដែលសម្បូរទៅដោយពពួកទ្រីប និងចៃអាហ្វីដ។
អ្នកដាំត្រូវយកចិត្តទុកដាក់ទៅលើការគ្រប់គ្រងស្មៅចង្រៃឱ្យបានទាំងនៅកន្លែងបណ្ដុះកូនត្រប់ និងនៅចំការដើម្បីកាត់បន្ថយកន្លែងដែលផ្ដល់ជម្រកឱ្យសត្វល្អិតចង្រៃនានា។ ក្រៅពីនេះ គេអាចដាំដំណាំមួយចំនួនដែលអាចកាត់បន្ថយការបំផ្លាញដូចជា ដាំពោតបារាំង ជាអន្ទាក់តាមព្រំចំការ ហើយបាញ់ថ្នាំគីមីលើដំណាំអន្ទាក់ដែលអាចគ្រប់គ្រងមមាចបាន ហើយអាចដាំដំណាំខ្ពស់ៗ ដូចជា ពោត សូគូម ឬមីលេ ដើម្បីកាត់បន្ថយការវាយប្រហារពីរុយស។
ចំណែកឯវិធានការមេកានិច គេណែនាំមិនឱ្យកសិករបណ្ដុះកូន និងដាំដុះត្រប់ក្បែរដីចំការត្រប់ចាស់ ឬគំនសេសសល់នៃកម្ទេកកម្ទីត្រប់ស្ងួតៗនោះទេ ឬអាចគ្របសំណាញ់នីឡុងក្រឡាល្អិត ដើម្បីបញ្ចៀសការជ្រៀតចូលនៃមេអំបៅដង្កូវចោះត្រួយ និងផ្លែ ដែលអាចពងលើកូនត្រប់ក្នុងដំណាក់កាលលូតលាស់។ ក្នុងករណីសម្បូរដោយសត្វល្អិតជញ្ជក់ ដូចជា ពពួករុយស ទ្រីប ត្រូវប្រើសំណាញ់នីឡុងក្រឡា ៥០-៦០ mesh គ្របរងកូន។ ប្រសិនបើត្រួយ និងផ្លែរងការបំផ្លាញ ត្រូវប្រមូលចោលជាបន្ទាន់។
ក្រៅពីនេះ កសិករក៏អាចប្រើគម្របប្លាស្ទិក ឬចំបើងដើម្បីកាត់បន្ថយអត្រាកើតមានរុយស និងទ្រីបលើដំណាំត្រប់ផងដែរ។ ក្នុងដំណាក់កាលដែលពិបាកទប់ទល់ កសិករអាចប្រើថ្នាំរូបមន្តផ្សំពីស្ដៅតាមបែបធម្មជាតិដោយការបាញ់នៅលើដី ឬលើស្លឹកដើម្បីគ្រប់គ្រងពពួករុយសក៏បាន៕
Account
Security
Favourite Content