បាត់ដំបង ៖ ជាអាជីវកម្មក្នុងស្រុក ដែលបានបង្កើតឡើងនៅក្នុងអំឡុងពេលកើតមានវិបត្តិសេដ្ឋកិច្ច ជាពិសេសវិបត្តិនៃជំងឺកូវីដមានការរីករាលដាលនៅទូទាំងសកលលោក ណែម យើង បានបន្តខ្សែសង្វាក់ផលិតកម្មរបស់ខ្លួនយ៉ាងមមាញឹក ជាមួយនឹងការទទួលបានប្រជាប្រិយភាពកាន់តែខ្លាំង និងមានទីផ្សារយ៉ាងទូលាយ ដែលដើរបញ្ច្រាសទិសរបស់អាជីវកម្មមួយចំនួនបានបិទទ្វារដោយសារតែមិនអាចទ្រាំទ្រនឹងការខាតបង់បាន។

លោក សំ បូរិន ជាម្ចាស់អាជីវកម្ម «ណែមយើង» ដែលជាសិប្បកម្មផលិតណែមរសជាតិបាត់ដំបងបានមានប្រសាសន៍ប្រាប់ឱ្យថា តាមការពិតទៅ អាជីវកម្មមួយនេះបានចាប់ផ្ដើមលើកដំបូងតាំងពីឆ្នាំ២០១៦ ប៉ុន្តែសម្រាប់ការពង្រឹង និងពង្រីកយ៉ាងពេញលេញគឺនៅអំ​ឡុងពេលនៃការរីករាលជំងឺកូវីដ​១៩ ពោលគឺនៅពេលមានវិបត្តិគឺចាប់ផ្ដើមធ្វើខ្លាំង លុះដល់ពេលសេដ្ឋកិច្ចដើរឡើងវិញគេក៏ស្គាល់កេរ្តិ៍ឈ្មោះណែមយើងកាន់តែច្រើន។​

លោកបាន​បន្តថា ៖

“សម្រាប់សិប្បកម្មនេះមានអ្នកផលិតចំនួន ៦នាក់ ហើយការផលិតប្រចាំថ្ងៃ​អាចផលិ​តបា​នប្រមាណ ៦០០-៧០០​ កញ្ចប់ ឬថ្ងៃខ្លះមានការកម្ម៉ង់ច្រើនអាចផលិតដល់ទៅ ១ ៥០០ កញ្ចប់ក៏មាន ហើយបន្ត​លក់បោះដុំទៅតាមបណ្ដាលខេត្តស្ទើរទូទាំងប្រទេស ជាពិសេសទៅតាមបណ្ដាលផ្សារទំនើប ម៉ាត និងផ្សារធម្មជាតិ ដូចជា ឡាក់គី, ជីបម៉ុង, តេលា, កាល់តិច និងTotal Circle-K ជាដើម។”

សម្រាប់ចំណុចពិសេសរបស់ផលិតផល «ណែមយើង» ត្រូវបានលោក សំ បូរិន បាន​បញ្ជាក់ថា ៖

“ចំពោះផ​លិតផលយើង គឺពាក់ព័ន្ធនឹងអនាម័យ បើគ្មានអនាម័យក៏លក់អត់បានដែរ ទីមួយគឺអនាម័យនេះតែម្ដង ទីពីរគឺរសជាតិ​ ដែលយើងផលិតណែម​ដោយ​មាន​ការ​ច្នៃមានការវេចខ្ចប់បានត្រឹមត្រូវតាមស្តង់ដារអាចលក់ក្នុ​ង​ផ្សា​រទំនើបបាន”

ចំពោះផលិតផលណែម «សិប្បកម្មណែមយើង» មានផលិតផលចម្បងៗ៣ប្រភេទគឺ ណែមសាច់ត្រីសុទ្ធ, ណែមសាច់ត្រីលាយស្បែកជ្រូក និងណែមស្បែកជ្រូកសុទ្ធ ដែលសុទ្ធតែមានរសជាតិឆ្ងាញ់ ផលិតពីវត្ថុធាតុដើមល្អៗ ពិសេសការផលិតមានកាលកំណត់ត្រឹមត្រូវ។  ពាក់ព័ន្ធនឹងការដឹកជញ្ជូនវិញ ម្ចាស់សិប្បកម្មរូបនេះរៀបរាប់ថា ការដឹកជញ្ជូនណែម គឺខាងសិប្បកម្ម​របស់​លោកដឹកនៅពេលដែលណែមមិនទាន់គ្រប់អាយុ។

លោកបានពន្យល់ថា ៖

“ណែមមិនទាន់គ្រប់អាយុនេះ គឺ​មានន័យថា ណែមដែលយើង​ផលិតហើយ មាន​រយៈពេ​ល ៤យប់ ៤ថ្ងៃ ទើបគ្រប់អាយុរបស់វា ​មានរជាតិជូរល្មម បន្ទាប់ពីគ្រប់អាយុហើយទើបគេត្រូវរក្សាទុ​កក្នុងទូរទឹកកចៀសវាងណែមជូរជ្រុល ខូចគុណភាព ហើយ​លុះដាក់រក្សាទុកក្នុងកន្លែងត្រជាក់ហើយ គេអាចរក្សាទុកបានរយៈពេល ៩០ថ្ងៃបន្ថែមទៀត​។”  

បើតាមការបញ្ជាក់ប្រាប់ពី​ម្ចាស់សិប្បកម្មណែម​ លោក សំ បូរិន ក៏មានគម្រោងទៅថ្ងៃអនាគត គឺ​លោក​ចង់គ្រប់គ្រងទីផ្សារបន្ថែម និងពង្រីកសមត្ថភាពផលិតឱ្យបានកាន់តែច្រើន ដើម្បីផ្គត់ផ្គង់ផលិតផលណែមបាត់ដំបងនេះរបស់​លោកនេះ ទៅទូទាំងប្រទេសតែម្តង​៕ អត្ថបទដោយ ៖ នី ស្រីពៅ ​