គិតត្រឹមដើមខែវិច្ឆិកា ឆ្នាំ២០២៣នេះ ចំនួនរោងចក្រនៅកម្ពុជាបានកើនឡើងពី ៦៤រោងចក្រ ដែលមានកម្មករនិយោជិត ត្រឹម៨ម៉ឺននាក់នៅឆ្នាំ១៩៩៧ ដល់ចំនួន ១៧៦៨៤រោងចក្រ​ និងមានកម្មករប្រមាណជាង ១លាន៥សែននាក់កំពុងបម្រើការងារ និងទទួលបានចំណូលជាប្រចាំ ខណៈដែលប្រាក់បៀវត្សរ៍នឹងឡើងដល់ ២០៤ ដុល្លារអាម៉េរិកក្នុងមួយខែចាប់ពីឆ្នាំ២០២៤ខាងមុខនេះទៅ។

នេះបើតាមការលើកឡើងរបស់ឯកឧត្តម ហេង​ សួរ រដ្ឋមន្ត្រីក្រសួងការងារ បណ្ដុះបណ្ដាល និងវិជ្ជាជីវៈ ថ្លែងក្នុង​ឱកាសអមដំណើរសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចុះជួប និងសំណេះសំណាល​ជាមួយ​កម្មករ និយោជិតចំនួន ១៥ ១៩៤នាក់ មកពីតាមបណ្តារោងចក្រដែលមានមូលដ្ឋានក្នុងតំបន់សេដ្ឋកិច្ចពិសេស ខេមបូឌា ចេជាង ហ្គ័រជី អេសអ៉ីហ្សេត ខេត្តព្រះសីហនុ កាល ថ្ងៃទី៧ ខែវិច្ឆិកា ឆ្នាំ២០២៣ ។

បើតាមការឱ្យដឹងបន្ថែមរបស់ឯកឧត្តម ហេង សួរ សម្រាប់តែខេត្តព្រះសីហនុ កាលពីឆ្នាំ២០១៣ មានរោងចក្រ​សហគ្រាសត្រឹមតែចំនួន ៣១៧ និងកម្មករចំនួន ២ម៉ឺននាក់ ដោយទទួលបានប្រាក់ឈ្នួលក្នុង​​មួយឆ្នាំសរុប​ប្រមាណជា ២២លានដុល្លារ។ ប៉ុន្តែសម្រាប់ឆ្នាំ២០២៣នេះ រោងចក្រនៅខេត្តព្រះសីហនុបានកើន​ឡើងដល់ ៦២៤ និងមានកម្មករ​ចំនួន ៨ម៉ឺននាក់។ 

ឯកឧត្តមបានបន្តឱ្យដឹងទៀតថា ជាង២ទសវត្សរ៍កន្លងមកនេះ មុនពេលកើតមានវិបត្តិជាសកលនៃការរាតត្បាតជំងឺកូវីដ-១៩ កំណើនសេដ្ឋកិច្ចកម្ពុជាកើនឡើងជាមធ្យមក្នុងរង្វង់ ៧% ហើយលក្ខខណ្ឌការងារសម្រាប់កម្មករនិយោជិតក៏ត្រូវបានកែសម្រួល និងគិតគូរលើកកម្ពស់ឱ្យកាន់តែប្រសើរឡើងជាបន្តបន្ទាប់។ ជាក់ស្ដែង ប្រាក់ឈ្នួលប្រចាំខែអប្បបរមាបានកើនឡើងពី ៤០ដុល្លារនៅឆ្នាំ១៩៩៧ ដល់ឆ្នាំ២០០ដុល្លារនៅឆ្នាំ២០២៣នេះ ហើយបន្តកើនឡើងដល់ ២០៤ដុល្លារដល់ឆ្នាំ២០២៤ឆាប់ៗខាងមុខនេះ។ បន្ថែមពីនេះ កម្មករនិយោជិតក៏ទទួលបាននូវអត្ថប្រយោជន៍ផ្សេងៗចំនួន ១៧ដុល្លារ ដល់ ២៨ដុល្លារផងដែរ ដូចជាប្រាក់រង្វាន់ធ្វើការទៀងទាត់ចំនួន ១០ដុល្លារ ប្រាក់ចំណាយធ្វើដំណើរ និងស្នាក់នៅចំនួន៧ ដុល្លារ ជាមួយនឹងប្រាក់អតីតភាពការងារសម្រាប់អ្នកដែលធ្វើការលើសពី ២ឆ្នាំ ចន្លោះពី ២ដុល្លារ ដល់ ១១ដុល្លារ។ 

យ៉ាងណាក៏ដោយ បើប្រៀបធៀបប្រាក់ឈ្នួលអប្បបរមាជាមួយប្រទេសមួយចំនួនក្នុងតំបន់ឆ្នាំ២០២៣នេះ គឺមានអត្រាទាបជាងកម្ពុជា ក្នុងនោះរួមមានដូចជា ប្រទេសវៀតណាម មានប្រាក់ឈ្នួលត្រឹម​ចន្លោះពី ១៣៧ដុល្លារ ទៅ១៩៨ដុល្លារ, ប្រទេសមីយ៉ាន់ម៉ាមានត្រឹមតែ ៨៣ដុល្លារ និង ឡាវត្រឹម៩០ដុល្លារប៉ុណ្ណោះ។ ដោយឡែក ស្រីលង្កាមានត្រឹម ៤០ដុល្លារ​ ខណៈដែលបង់ក្លាដែសមានត្រឹម ៧៤ដុល្លារ ។ 

អ្វីដែលរឹតតែល្អប្រសើរជាងនេះទៅទៀត ក្រៅពីការដំឡើងប្រាក់ឈ្នួល រាជរដ្ឋាភិបាលក៏បានខិតខំរួមចំណែកកាត់បន្ថយការចំណាយរបស់កម្មករផងដែរ ដូចជា បានពង្រីកវិសាលភាព ប.ស.ស ដោយតម្រូវឱ្យនិយោជកបង់ជំនួសកម្មករនិយោជិត ១០០%​ លើផ្នែកសុខភាព និងហានិភ័យការងារ ហើយ ៥០% ជំនួសលើផ្នែកប្រាក់សោធន់ ជាហេតុ​ធ្វើឱ្យកម្មករ​និយោជិតអាចសន្សំថវិកាបានប្រមាណ ៦ដុល្លារក្នុងមួយខែ។ ជាក់ស្ដែង ចាប់តាំងពីឆ្នាំ២០១៨ ដល់ខែ​តុលា ឆ្នាំ២០២៣ នេះ មានកម្មករ និយោជិតដែលជាសមាជិក ប.ស.ស បានទៅពិនិត្យ និងព្យាបាលជំងឺដោយមិនបង់ប្រាក់ប្រមាណ ១៦លានករណី គិតជា​ទឹកប្រាក់ដែល ប.ស.ស បានចំណាយអស់ប្រមាណ ៤៦៣លានដុល្លារ។ 

ជាមួយគ្នានេះ រាជរដ្ឋាភិបាលក៏បានយកចិត្តទុកដាក់ទៅលើស្ត្រីមានផ្ទៃពោះ រួមជាមួយនឹងកុមារដែលជាកូនរបស់កម្មការិនីដែលអាយុក្រោម២ឆ្នាំផងដែរ ដោយក្នុងនោះ មុនពេលសម្រាល កម្មការិនីអាចទៅពិនិត្យសុខភាពចំនួន៤លើក ហើយក្រោយសម្រាល​អាចនាំកូន ក៏ដូចជាទៅពិនិត្យសុខភាពខ្លួនឯងចំនួន ១០លើក ដោយក្នុងមួយលើកៗ​ទទួលបាន​ប្រាក់ឧបត្ថម្ភចំនួន ៨ម៉ឺនរៀល។ នៅពេលសម្រាលទៀតសោត កម្មការិនីនឹងទទួលបានប្រាក់ឧបត្ថម្ភចំនួន ៨០ម៉ឺនរៀល។ ដើម្បីជួយសម្រួលដល់កម្មករ និយោជិតកាន់តែប្រសើរថែមទៀត ខណៈដែលក្រសួងក៏កំពុងតែរៀបចំបង្កើត​ទារកដ្ឋានសហគមន៍ និងមត្តេយ្យសហគមន៍តាមបណ្ដាខេត្តដែលមានទីតាំងរោងចក្រ សហគ្រាស ច្រើនផងដែរ។ 

តាមរយៈការបង្កើតទារកដ្ឋាននេះ នឹងធ្វើឱ្យកូនចៅកម្មករមានការ​លូតលាស់ល្អ មានអាហារូប​ត្ថម្ភ​គ្រប់គ្រាន់ និងទទួលបានកម្មវិធីអប់រំតាំងពីមត្តេយ្យ។ កូនចៅជំនាន់ក្រោយនឹងកាន់តែមានមូល​ដ្ឋានអប់រំខ្ពស់។ ការយោគយល់ទាំងនេះហើយ ដែលធ្វើឱ្យស្ថានភាពការងារនៅកម្ពុជាកាន់តែល្អប្រសើរ ហើយ​នឹងធ្វើឱ្យសេដ្ឋកិច្ចគ្រួសារមានភាពល្អប្រសើរប្រកបដោយសុខុមាលភាពទៅតាមនោះដែរ ព្រោះកាលណាតែជីវភាពគ្រួសារកាន់តែល្អប្រសើរ សេដ្ឋកិច្ចជាតិទាំងមូលក៏នឹងមានកំណើនដូចគ្នា។

ស្ថិតនៅក្រោមគោលនយោបាយរបស់រាជរដ្ឋាភិបាលអាណត្តិទី៧ ដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា និងបានដាក់ចេញគោលការណ៍ខាងលើនេះ លោក លី វិចិត្រ ប្រធានសហភាពសហជីពសុភមង្គលកម្មករកម្ពុជា បានបង្ហាញពីកិច្ចគាំទ្រ និងរីករាយសាទរយ៉ាងពេញទំហឹង ត្បិតនឹងអាចជួយសម្រាលបន្ទុក និងកាត់បន្ថយចំណាយរបស់បងប្អូនកម្មករនិយោជិតបានច្រើន។

លោក លី វិចិត្រ បានមានប្រសាសន៍សង្កត់ធ្ងន់ថា ៖ ​រាជរដ្ឋាភិបាលបានយកចិត្តទុកដាក់យ៉ាងខ្លាំងទៅលើសុខទុក្ខរបស់បងប្អូនកម្មករ-កម្មការិនី ជាពិសេសស្ត្រីដែលមានផ្ទៃពោះ។ ជាក់ស្ដែង បើយើងសម្លឹងមើលកាលពីប៉ុន្មានឆ្នាំមុន សម្រាប់កម្មករដែលជាស្ត្រីមានផ្ទៃពោះ ពេលសម្រាលកូន និងលំហែរមាតុភាព គឺត្រូវប្រឈមនឹងការចំណាយខ្លួនឯងស្ទើរទាំងស្រុង ហើយទទួលបានចំណូលត្រឹម៥០ភាគរយពីរោងចក្រតែប៉ុណ្ណោះ ប៉ុន្តែបច្ចុប្បន្នគឺទទួលបានអត្ថប្រយោជន៍យ៉ាងច្រើន ពោលគឺទទួលបានពីខាងរោងចក្រផង ទទួលពីខាង ប.ស.ស ផង និងទទួលបានការឧបត្ថម្ភពីសំណាក់រដ្ឋាភិបាលផង ទាំងពេលទៅពិនិត្យផ្ទៃពោះមុនពេលសម្រាល ពេលសម្រាល និងក្រោយពេលសម្រាល។

ជាមួយគ្នានេះ ក្នុងនាមជាប្រធានសហភាពសហជីពសុភមង្គលកម្មករកម្ពុជា លោក លី វិចិត្រ ក៏សូមសម្ដែងនូវក្ដីសាទរ និងរីករាយជាខ្លាំងដែលបណ្តាបងប្អូនកម្មករ- កម្មការិនី ត្រូវបានរាជរដ្ឋាភិបាលកម្ពុជាយកចិត្តទុកដាក់ និងជួយសម្រាលបន្ទុកទាំងការចំណាយក្នុងជីវភាពគ្រួសារ និងបញ្ហាសុខសុវត្ថិភាព៕