ភ្នំពេញ ៖ គិតត្រឹមត្រីមាសចុងក្រោយនៃឆ្នាំ២០២២ កន្លងមកនេះ សមិទ្ធផលឥណទានលក្ខណៈបុគ្គលនៅកម្ពុជា​ បន្តសម្រេចបាននូវ​កំណើន​ដ៏រឹងមាំ​ ដោយសមតុល្យឥណទាន​ និងចំនួនគណនីឥណទាន​មានការកើនឡើងក្នុងគ្រប់តំបន់ ប៉ុន្តែចំនួននៃការស្នើសុំឥណទានបុគ្គល​ មានការថយចុះក្នុងត្រីមាសទី៤ បើប្រៀបធៀបនឹងត្រីមាសមុន។

ពាក្យស្នើសុំឥណទានលក្ខណៈបុគ្គលបង្ហាញអំពីបំណងរបស់អ្នកប្រើប្រាស់ក្នុងការទទួលបានឥណទានក្នុងលក្ខណៈជាឥណទានសម្រាប់ប្រើប្រាស់ផ្ទាល់ខ្លួនប័ណ្ណឥណទាន និងកម្ចីអចលនទ្រព្យ។

យោងតាមរបាយការណ៍របស់ក្រុមហ៊ុនក្រេឌីត ប្យួរ៉ូ បានបង្ហាញថា នៅត្រឹម​ត្រីមាសទី៤ នៃឆ្នាំ២០២២នេះ ចំនួនអតិថិជនដែលព្យាយាមស្នើសុំឥណទាន ក្នុងទម្រង់៣ផ្សេងៗគ្នាដូចជា ឥណទានសម្រាប់ប្រើប្រាស់ផ្ទាល់ខ្លួន (Personal Finance) ប័ណ្ណឥណទាន (Credit Cards) និងកម្ចីអចលនទ្រព្យ (Mortgage)។ ពាក្យស្នើសុំឥណទានលក្ខណៈបុគ្គល បានធ្លាក់ចុះ​ជារួម -៤%។ ការធ្លាក់ចុះពាក្យស្នើសុំកម្ចីប្រើប្រាស់ផ្ទាល់ខ្លួនមានចំនួន ​ –៦% ក្នុងនេះមានការធ្លាក់ចុះខ្លាំងនៅតំបន់ទំនាប​មានចំនួន -១៤% ។ ការស្នើរសុំប័ណ្ណឥណទាន​​ មាន​ការធ្លាក់ចុះរចំនួន -៣% ដោយសារមានការថយចុះនៅតំបន់ទន្លេសាបចំនួន​ -១៣% នឹង តំបន់ឆ្នេរ -១១%។​ ប៉ន្តែ ​ការស្នើរសុំកម្ចីអចលនទ្រព្យ មាន​ការកើន​ឡើងចំនួន​ +១៥%។

បម្រែបម្រួលជាភាគរយទំហំទឹកប្រាក់នៃការស្នើសុំឥណទាន ក៏មានការធ្លាក់ចុះគឺចំនួន -១១%​ ដែលចំនួននេះធ្លាក់ចុះកាលពីត្រីមាសមុន (ឆ្នាំ២០២២ ត្រីមាសទី៣: +៣%)​ ។​ បំរែបំរួល​នេះ​បណ្តាលមកពី​ការថយចុះនៃទំហំទឹកប្រាក់នៃការស្នើសុំកម្ចីផ្ទាល់ខ្លួ​ន -១១% ប័ណ្ណឥណទានធ្លាក់ចុះចំនួន -៥% និងកម្ចីអចលនទ្រព្យ ថយចុះចំនួន -១១%។

គិតត្រឹមខែធ្នូ ឆ្នាំ២០២២ ចំនួនគណនីឥណទានលក្ខណៈបុគ្គលមានការកើនឡើងគួរសម ចំនួន +៣,៤៥% ប្រៀបពីត្រីមាសមុនដែលធ្វើអោយចំនួនគណនីនៅទូទាំងប្រទេសសរុបមានចំនួន ១៥៤ លានគណនី។ ក្នុងចំណោមចំនួននេះ ៧៩,៤៣% ជាឥណទានសម្រាប់ប្រើប្រាស់ផ្ទាល់ខ្លួន ខណៈចំណែកតូចជាងគេគឺកម្ចីប័ណ្ណឥណទាន ៨,២៤% និងកម្ចីអចលនទ្រព្យ ១២,៣៣%។ កំណើននេះត្រូវបានគេមើលឃើញនៅក្នុងគ្រប់តំបន់ នៃព្រះរាជាណាចក្រកម្ពុជា (+៥,៩% នៅតំបន់ទន្លេសាប +៣,២% តំបន់ឆ្នេរ +៣,១% នៅតំបន់​ខ្ពង់រាប​ , ​ ហើយ +២,៦% នៅតំបន់ទំនាប)។

សមតុល្យឥណទានលក្ខណៈបុគ្គល ក៏បានបន្តកើនឡើង​ជាលំដាប់ក្នុងកម្រិត +៣,៨២% គិតត្រឹមពីខែធ្នូ ឆ្នាំ២០២៣​។ នៅចុងត្រីមាសនេះ សមតុល្យឥណទានលក្ខណៈបុគ្គលមានចំនួន ១៤,៣២ ពាន់លានដុល្លារ។

បើទោះបីជា​ ចំនួនគណនី​​នៃកម្ចី​អចលនទ្រព្យមាន​​ត្រឹមតែ​ ១២,៣៣% នៃ​ចំនួន​គណនី​សរុបក៏ដោយ កម្ចីអចលនទ្រព្យនៅតែមានលើសពីពាក់កណ្តាលនៃសមតុល្យឥណទានលក្ខណៈបុគ្គលសរុប ៥៥,៨១% ចំណែកឯ សមតុល្យឥណទានប្រើប្រាស់ផ្ទាល់ខ្លួនមានចំណែក ៤៣,៣៥%។ សមតុល្យប័ណ្ណឥណទានមានចំណែកតូចគឺត្រឹមតែ ០,៨៤% តែប៉ុណ្ណោះ។ និយាយជារួម សមតុល្យឥណទានមានការកើន​ឡើងជាវិជ្ជមាននៅគ្រប់តំបន់​ដូចជា តំបន់ទន្លេសាប +១៨,៨% តំបន់ឆ្នេរ +២,៥% ទំនាប +១,១% តំបន់ខ្ពង់រាប​ 0,៩% ។

គុណភាពឥណទានលក្ខណៈបុគ្គលបានមកពីអនុបាទនៃគណនីឥណទានជាមួយនឹងការសងយឺត ៣០ ថ្ងៃហួសកាលបរិច្ឆេទកំណត់ ដែលជា30+ DPD។ វាបង្ហាញពីលទ្ធភាពនៃការបង់សង និង ហានិភ័យនៃការខកខាននៅក្នុងត្រីមាស។

អនុបាទ 30+DPD ធ្លាក់ចុះ​ពី ២,៥១% នៅក្នុង​ត្រីមាសនេះ ពី ២,៦០% ក្នុងត្រីមាសទី៣ ឆ្នាំ២០២២។ ក្នុងចំណោមផលិតផលទាំងបីនោះ ផលិតផលដែលមាន អនុបាទ ៣០+DPD ខ្ពស់បំផុតគឺ ប័ណ្ណឥណទានជាមួយនឹង អនុបាតចំនួន ៤,៣៨%។

ចំនួនសមតុល្យឥណទានមិនដំណើរការលើសពី៣០ថ្ងៃ មានការកើន​ឡើង​ជារួម +០,១% នៅទូទាំងតំបន់។ ការកើន​ឡើងដែលច្រើនជាងគេនៃចំនួនទឹកប្រាក់ឥណទានសំណងយឺតលើសពី៣០ថ្ងៃគឺនៅ ​តំបន់ទន្លេសាបមានការកើនឡើង +៩% តែ នៅតំបន់ឆ្នេរធ្លាក់ចុះ​ចំនួន -៦,៦%,  តំបន់ខ្ពង់រាបធ្លាក់ចុះចំនួន -៤%, ហើយតំបន់​ទំនាបវិញមាន​ការធ្លាក់ចុះ​ចំនួន -២%។

ចំនួនអតិថិជនដែលមានកម្ចីតែមួយស្ថាប័ននៅតែមានកម្រិតខ្ពស់គឺ ៧១,០១%នៃចំនួនអតិថិជនទាំងអស់។ ចំណែកឯអតិថិជន​​ដែលមានកម្ចីច្រើនស្ថាប័ននៅតែមានកម្រិតទាបដដែលត្រឹម ២៨,៩៩%។

អតិថិជនប្រើប្រាស់ឥណទានលក្ខណៈបុគ្គលដែលមានគណនីចំនួន ១ មាន ៥៨,៥១%, ​ អ្នកមានគណនីឥណទានចំនួន ២ មានចំនួន ២៧,៩០% អ្នកដែលមានគណនីឥណទានចំនួន ៣​ មានចំនួន ៩,៨% ហើយអ្នកដែលមានគណនីឥណទានច្រើនជាង៣ មានចំនួន ៣,៧៥% នៃចំនួនអតិថិជនទាំងអស់។ លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌីបានមានប្រសាសន៍ថា

“តម្រូវការពាក្យស្នើសុំឥណទានបុគ្គលមានការថមថយបន្តិច។ យ៉ាងណាក៏ដោយ សមិទ្ធផលឥណទានលក្ខណៈបុគ្គលនៅតែរក្សារបាននូវលំនឹង ជាមួយនឹងចំនួនគណនី និងសមតុល្យកម្ចីក្នុងត្រីមាសចុងក្រោយ បើប្រៀបធៀបនឹងត្រីមាសមុន”

លោកបានបន្ថែមទៀតថា គុណភាពកម្ចីមានភាពប្រសើរបន្តិច ជាមួយនឹងការថយចុះនៃអនុបាទនៃគណនីប្រាក់កម្ចីជាមួយនឹងការសងយឺត ៣០ ថ្ងៃហួសកាលបរិច្ឆេទកំណត់ ពី ២,៦០% ក្នុងត្រីមាសទីបី មកដល់២,៥១%ក្នុងត្រីមាសទីបួន ២០២២ នេះ៕