រតនគិរី ៖ គម្រោង​​«ការពង្រឹងសុវត្ថិភាពហិរញ្ញវត្ថុក្នុងសហគមន៍»  ត្រូវបានដាក់ឱ្យដំណើរការជាផ្លូវការ និងបន្តអនុវត្តផែនការសកម្មភាពអាទិភាពនៅក្នុងខេត្តរតនគិរី កំពង់ឆ្នាំង និងពោធិ៍សាត់ ដោយមានការគិតគូរទៅដល់ប្រជាជនដែលមិនទាន់ទទួលបានចំណេះដឹងហិរញ្ញវត្ថុ ជាពិសេស ប្រជាជនដែលរស់នៅតំបន់ដាច់ស្រយាល និងជនជាតិដើមភាគតិច និងកំពុងត្រូវការចាំបាច់ប្រើប្រាស់នូវសេវាឥណទានផ្សេងៗ ព្រមទាំងលើកកម្ពស់នូវការសម្រេចចិត្តរបស់ប្រជាជន ដើម្បីពង្រឹងសិទ្ធិ និងការទទួលបានកិច្ចការពារដល់ពួកគាត់ផងដែរ។

លោក ឈន វឌ្ឍនៈ ក្រុមការងារដឹកនាំការអនុវត្តថ្នាក់កណ្តាលនៃគម្រោង «ការពង្រឹងសុវត្ថិភាពហិរញ្ញវត្ថុក្នុងសហគមន៍»  បានលើកឡើងថា ក្រោយពេលគម្រោងមួយនេះដំណើរការ ប្រជាជនជាច្រើនទទួលបានចំណេះដឹង និងដំណោះស្រាយក្នុងការគ្រប់គ្រងកម្ចី ក៏ដូចជាទទួលបាននូវការបណ្តុះបណ្តាលពីចំណេះដឹងហិរញ្ញវត្ថុសរុបប្រមាណជាង ៣ម៉ឺននាក់។ ក្រៅពីនេះ ពួកគាត់មានលទ្ធភាព និងយល់ដឹងកាន់តែច្បាស់ពីការសន្សំថែមទៀតផង។  

លោកបញ្ជាក់ថា តាមរយៈការពង្រីកគម្រោងជាលើកទី២នេះ នឹងនាំមកជាមួយនូវផែនការផ្សព្វផ្សាយទៅដល់ជនជាតិដើមភាគតិច ដែលអាចឱ្យពួកគាត់យល់ដឹងកាន់តែច្បាស់ពីការប្រើប្រាស់ឥណទាន មានសុវត្ថិភាព ទទួលបានកិច្ចការពារ ជាពិសេស ចៀសផុតពីកម្ចីក្រៅផ្លូវការដែលមានហានិភ័យខ្ពស់។ ជាក់ស្ដែង ជាបទពិសោធន៍ បន្ទាប់ពីសិក្សាអំពីលទ្ធផលចុងគ្រានៃការអនុវត្តគម្រោងធៀបនឹងការវាស់វែងដើមគ្រា ពិនិត្យឃើញថា ទទួលបានភាពវិជ្ជមាន ដោយមិនត្រឹមតែផ្តោតលើការបញ្ជ្រាបចំណេះដឹងប៉ុណ្ណោះទេ ប៉ុន្តែថែមទាំងជាជំហានសំខាន់ក្នុងការបង្កើតភាពអង់អាច ការយល់ដឹងអំពីសិទ្ធិ និងកាតព្វកិច្ចរបស់ប្រជាពលរដ្ឋ ដែលប្រើប្រាស់សេវាហិរញ្ញវត្ថុជាច្រើន​។

លោកជំទាវ ឌិត នីតា ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា និងជាតំណាងសមាគមធនាគារនៅកម្ពុជា បានសូមចូលរួមអបអរសាទចំពោះសមិទ្ធផលដែលសម្រេចបាននាពេលកន្លងមក ជាពិសេស លទ្ធភាពនៃការពង្រីកតំបន់គោលដៅថ្មីចំនួន ៥ ឃុំ ក្នុងឆ្នាំ២០២៦ រួមមាន ឃុំល្អក់ និងឃុំពយ ស្រុកអូរជុំ ខេត្តរតនគិរី, ឃុំសែប ស្រុកកំពង់ត្រឡាច ខេត្តកំពង់ឆ្នាំង, ឃុំឈូក ស្រុកប្រាសាទសំបូរ ខេត្តកំពង់ធំ, និងឃុំព្រងិល ស្រុកភ្នំក្រវាញ ខេត្តពោធិ៍សាត់ ។

លោកជំទាវបានសង្កត់ធ្ងន់ថា ការអប់រំចំណេះដឹងផ្នែកហិរញ្ញវត្ថុ ដើរតួនាទីយ៉ាងសំខាន់ក្នុងការគាំទ្រកំណើនសេដ្ឋកិច្ចជាតិ និងការបង្កើនសុខដុមរមនីយកម្មក្នុងវិស័យហិរញ្ញវត្ថុ។ វាជួយផ្តល់ឱកាសឱ្យប្រជាពលរដ្ឋគ្រប់ស្រទាប់ និងអាជីវកម្មគ្រប់ប្រភេទ អាចដំណើរការ និងទទួលសេវាហិរញ្ញវត្ថុបានយ៉ាងសមរម្យ ដើម្បីពង្រីកមុខរបរអាជីវកម្ម ប្រើប្រាស់ឥណទានត្រឹមត្រូវតាមគោលបំណង និងជៀសវាងហានិភ័យនៃបំណុលលើសលប់។ ជាពិសេស ចំណេះដឹងផ្នែកហិរញ្ញវត្ថុ បានចូលរួមយ៉ាងសកម្មក្នុងកិច្ចការពារ និងទប់ស្កាត់ការចាញ់បោកបន្លំផ្នែកហិរញ្ញវត្ថុ ក៏ដូចជាការប្រើប្រាស់ឥណទានមិនសមស្រប ដែលអាចនាំឱ្យប្រជាពលរដ្ឋជួបបញ្ហាហិរញ្ញវត្ថុធ្ងន់ធ្ងរ។ មិនត្រឹមតែប៉ុណ្ណោះ គម្រោងនេះ ក៏បានជួយពង្រឹងបំណិនជីវិតក្នុងការគ្រប់គ្រង និងចាត់ចែងហិរញ្ញវត្ថុក្នុងគ្រួសារ ព្រមទាំងលើកកម្ពស់ការយល់ដឹងអំពីសិទ្ធិ និងកាតព្វកិច្ចរបស់អ្នកប្រើប្រាស់សេវាហិរញ្ញវត្ថុផងដែរ។

ឯកឧត្តម ងិន ណែល អភិបាលរងខេត្តរតនគិរី យល់ឃើញថា គម្រោងនេះនឹងជួយលើកកម្ពស់សិទ្ធិអំណាចចំពោះប្រជាពលរដ្ឋដែលជាអតិថិជន មានការសម្រេចចិត្តត្រឹមត្រូវ និងអាចលើកយកបញ្ហារបស់ពួកគាត់ទៅពិភាក្សាជាមួយគ្រឹះស្ថានធនាគារ និងហិរញ្ញវត្ថុ ប្រកបដោយការគោរពនិងទទួលខុសត្រូវ។ អតិថិជននៃគ្រឹះស្ថានធនាគារ និងហិរញ្ញវត្ថុស្របច្បាប់ មានកិច្ចការពារដោយច្បាប់ ហើយអតិថិជនមានសិទ្ធិ បញ្ចេញមតិ និងមានសិទ្ធិដាក់បណ្តឹងតវ៉ា។

លោក ម៉ែន ភក្តី តំណាងដ៏ខ្ពង់ខ្ពស់ លោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា និងជាប្រធាននាយកដ្ឋានកិច្ចការពារអ្នកប្រើប្រាស់ ធនាគារជាតិនៃកម្ពុជា បានក៏បានលើកឡើងថា តាមរយៈគម្រោងនេះ ប្រជាពលរដ្ឋនៅក្នុងឃុំទាំង៩ ក្នុងខេត្តចំនួន៥ រួមទាំង បងប្អូនជនជាតិដើមភាគតិច អាចពង្រឹងសមត្ថភាពក្នុងការសម្រេចចិត្តលើបញ្ហាហិរញ្ញវត្ថុដោយខ្លួនឯង និងជៀសផុតពីហានិភ័យនានា ដូចជា ការចាញ់បោកផ្នែកហិរញ្ញវត្ថុ ការខ្ចីប្រាក់ពីប្រភពក្រៅផ្លូវការដែលជំរុញឱ្យកើនបំណុលលើសលប់ ព្រមទាំងយល់ដឹងច្បាស់ពីការប្រើប្រាស់ប្រភេទឥណទានបានសមស្រប និងត្រឹមត្រូវតាមគោលដៅ។

លោក តូច ចៅចេក តំណាងសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក៏បានលើកឡើងដែរថា ការដំណើរការគម្រោង និងកិច្ចពិភាក្សានេះ បានផ្តោតជាចាំបាច់អំពីសារៈសំខាន់នៃកិច្ចសហប្រតិបត្តិការយ៉ាងជិតស្និទ្ធរវាងនិយ័តករ អាជ្ញាធរមូលដ្ឋាន គ្រឹះស្ថានហិរញ្ញវត្ថុ និងសហគមន៍ ដើម្បីធានានូវការអភិវឌ្ឍប្រកបដោយបរិយាបន្ន និងនិរន្តរភាព។ ក្នុងនាមសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា លោកសូមថ្លែងអំណរគុណយ៉ាងជ្រាលជ្រៅដល់ធនាគារជាតិនៃកម្ពុជា រដ្ឋបាលខេត្ត និងអាជ្ញាធរមូលដ្ឋាននៅក្នុងខេត្តរតនគិរី ចំពោះការជួយជ្រោមជ្រែង និងការគាំទ្រលើការពង្រីកគម្រោង «ការពង្រឹងសុវត្ថិភាពហិរញ្ញវត្ថុក្នុងសហគមន៍» ក្នុងខេត្តរតនគិរី និងខេត្តផ្សេងៗទៀតនាពេលនេះ។ 

សូមបញ្ជាក់ថា គម្រោង «ការពង្រឹងសុវត្ថិភាពហិរញ្ញវត្ថុក្នុងសហគមន៍» ត្រូវបានបង្កើតឡើងក្នុងឆ្នាំ២០២៣ មានគោលបំណងពង្រីកការអប់រំផ្សព្វផ្សាយចំណេះដឹងផ្នែកហិរញ្ញវត្ថុ សិទ្ធិ និងកិច្ចការពារអតិថិជន ឱ្យបានទូលំទូលាយ តាមរយៈអាជ្ញាធរមូលដ្ឋាន ដែលជាអាណាព្យាបាលរបស់ប្រជាពលរដ្ឋ មានតួនាទីចាំបាច់ក្នុងការបន្តបណ្តុះបណ្តាល និងផ្សព្វផ្សាយបន្ថែមជូនប្រជាពលរដ្ឋ។

គម្រោងនេះ បានចាប់ផ្តើមអនុវត្តដំណាក់កាលសាកល្បងអំឡុងឆ្នាំ២០២៣ – ២០២៤ នៅក្នុងកម្រិតឃុំគោលដៅចំនួន៤ ក្នុងខេត្ត កំពង់ធំ បាត់ដំបង ស្វាយរៀង និងខេត្តកំពង់ស្ពឺ។ ហើយដើម្បីអាចតាមដាន និងវាស់វែងភាពជោគជ័យ និងចំណុចត្រូវកែលំអនៃសកម្មភាព និងយុទ្ធសាស្ត្រគម្រោង ក្រុមការងារបានសិក្សាស្វែងយល់តាមសុច្ចនាករដែលបានបង្កើតឡើងសម្រាប់វាស់វែងក្នុងអំឡុងពេលចាប់ផ្តើមអនុវត្តគម្រោង និងចុងគ្រានៃការអនុវត្តសាកល្បងគម្រោងផងដែរ ក្រោមការចូលរួមគាំទ្រពីភ្នាក់ងារអភិវឌ្ឍន៍ JICA។ ជាមួយគ្នានេះ ដើម្បីសម្រេចបាននូវគោលបំណងទាំងនេះ គម្រោងបានដាក់ចេញនូវយុទ្ធសាស្ត្រសំខាន់ៗចំនួន ៥ រួមមាន៖ ទី១. លើកកម្ពស់ចំណេះដឹងផ្នែកហិរញ្ញវត្ថុ សិទ្ធិ និងកិច្ចការពារអតិថិជន, ទី២. ពង្រឹងភាពជាដៃគូតាមរយៈការកៀរគរធនធាន និងការចូលរួមពីរដ្ឋាភិបាល អាជ្ញាធរ អង្គការមិនមែនរដ្ឋាភិបាលជាតិ និងអន្តរជាតិ និងដៃគូអភិវឌ្ឍនានា, ទី៣. ជំរុញការអភិវឌ្ឍក្បួនអនុវត្ត និងឧបករណ៍នានាសម្រាប់ការអនុវត្តគម្រោង និងលើកកម្ពស់គុណភាពនៃការអនុវត្ត, ទី៤. ចងក្រងឯកសារភស្តុតាង និងការអនុវត្តមេរៀនបទពិសោធន៍ល្អៗឆ្ពោះទៅរកការពង្រីកវិសាលភាពនៃគម្រោង និងទី៥. ពង្រឹងយន្តការដឹកនាំ ការគ្រប់គ្រង ការត្រួតពិនិត្យ ការវាយតម្លៃ និងការសម្របសម្រួលដើម្បីដំណើរការការងារជាមួយស្ថាប័នពាក់ព័ន្ធក្នុងការពង្រឹង និងពង្រីកការអនុវត្ត៕ អត្ថបទ ៖ សាន ពសុធា