សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានប្រកាសដាក់ឱ្យប្រើប្រាស់ប្រព័ន្ធស្ថិតិជលផលឌីជីថល (Online FishStat System) ដើម្បីធានាប្រសិទ្ធភាពក្នុងការគ្រប់គ្រង និងអភិវឌ្ឍធនធានជលផល។ ប្រព័ន្ធ FishStat នេះ ទទួលបានការគាំទ្រផ្នែកហិរញ្ញវត្ថុពីសហភាពអឺរ៉ុប និងជំនួយបច្ចេកទេសពីអង្គការស្បៀងអាហារ និងកសិកម្ម (FAO)។
ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ការបើកដំណើរការប្រព័ន្ធស្ថិតិជលផលនៅពេលនេះ មិនត្រឹមតែជាការណែនាំកម្មវិធី ឬបច្ចេកវិទ្យាថ្មីមួយនោះទេ ប៉ុន្តែវាជាការបង្ហាញពីការផ្លាស់ប្តូរដ៏សំខាន់របស់កម្ពុជាក្នុងការអនុវត្តបច្ចេកវិទ្យាឌីជីថលទំនើបសម្រាប់ការគ្រប់គ្រង និងការអភិវឌ្ឍធនធានជលផល។
ឯកឧត្តម រដ្ឋលេខាធិការបានគូសបញ្ជាក់ថា ប្រព័ន្ធនេះ ត្រូវបានរំពឹងថា អាចជួយដោះស្រាយបញ្ហាលំបាកផ្សេងៗ តាមរយៈការបង្ហាញឱ្យឃើញបានច្បាស់ជាងមុន ដែលមិនត្រឹមតែទិន្នន័យបច្ចុប្បន្ននោះទេ ប៉ុន្តែថែមទាំងអាចកំណត់និន្នាការ ស្ថានភាពជលផល រួមមានទាំងឧបករណ៍សម្រាប់គ្រប់គ្រង និងការធ្វើរបាយការណ៍ផ្អែកលើទិន្នន័យឌីជីថលជលផលនេះ។
ឯកឧត្តម ហាស់ សារ៉េត បានបញ្ជាក់ថា៖ « ការប្រកាសដាក់ឱ្យដំណើរការប្រព័ន្ធស្ថិតិជលផល គឺចំពេលវេលា និងឆ្លើយតបតាមតម្រូវការទិន្នន័យកាន់តែប្រសើរ និងជាក់លាក់។ ជាផ្នែកសំខាន់ក្នុងបណ្តុំទិន្នន័យធំ ដែលភ្ជាប់ និងបំពេញជាមួយវិស័យពាក់ព័ន្ធផ្សេងៗ។ ទិន្នន័យទាំងនេះផ្តល់ព័ត៌មានចាំបាច់សម្រាប់តភ្ជាប់វិស័យជលផលជាមួយការអភិវឌ្ឍកសិកម្ម និងការគ្រប់គ្រងធនធានទឹក ប្រកបដោយនិរន្តភាព។ វិធីសាស្ត្របញ្ចូលគ្នានេះ គឺសំខាន់ណាស់សម្រាប់ការធានាសន្តិសុខស្បៀងរយៈពេលវែងនៅប្រទេសកម្ពុជា។
ឯកឧត្តម រដ្ឋលេខាធិការ ក៏បានសម្តែងនូវការថ្លែងអំណរគុណចំពោះសហភាពអឺរ៉ុបសម្រាប់ការគាំទ្រផ្នែកហិរញ្ញវត្ថុ និងភាពជាដៃគូសហការ ហើយក៏សូមអរគុណដល់អង្គការ FAO សម្រាប់ជំនួយបច្ចេកទេស ក្នុងការអនុវត្តន៍កម្មវិធី CAPFISH ជាពិសេសការអភិវឌ្ឍ និងដាក់ឱ្យដំណើរការប្រព័ន្ធ FishStat រួមជាមួយរដ្ឋបាលជលផល និងខណ្ឌរដ្ឋបាលជលផល ដែលបានប្តេជ្ញាចិត្តខ្ពស់ក្នុងការសម្រេចបាននូវសមិទ្ធផលដ៏មានតម្លៃនេះ។
សូមជម្រាបថាក្នុងពិធីនេះ ក៏មានការចូលរួមពីថ្នាក់ដឹកនាំនាយកដ្ឋានវិទ្យាស្ថាន អធិការរដ្ឋបាលជលផល២៥ ខណ្ឌរដ្ឋបាលជលផល តំណាងនាយកដ្ឋានផែនការ ស្ថិតិនៃក្រសួងកសិកម្ម លោក Koen Everaert អនុប្រធានផ្នែកសហប្រតិបត្តិការអន្តរជាតិនៃសហភាពអឺរ៉ុប និងលោកស្រី Rebekah Bell ប្រធានអង្គការ FAO ប្រចាំនៅកម្ពុជាផងដែរ។
Account
Security
Favourite Content