សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ នៅដើមខែតុលានេះ នាវាចម្បាំងខ្នាតយក្សប្រភេទ JS Chokai មួយគ្រឿងរបស់ប្រទេសជប៉ុនបានចាប់ផ្តើមធ្វើដំណើរចាកចេញពីដែនទឹករបស់ខ្លួនឆ្ពោះទៅកាន់ទឹកដីសហរដ្ឋអាម៉េរិកក្នុងគោលបំណងធ្វើទំនើបកម្មអាវុធផង និងដើម្បីហ្វឹកហ្វាត់កងនាវាចរណ៍ផង ជាមួយនឹងបច្ចេកវិទ្យាបំពាក់មីស៊ីលចំងាយឆ្ងាយរបស់អាម៉េរិក Tomahawk cruise missile ដែលអាចបាញ់បានរហូតដល់ប្រមាណ ១០០០គីឡូម៉ែត្រ។
JS Chokai ជាប្រភេទនាវា Kongo-class ដែលអាចបំពាក់មីស៊ីលបញ្ជាពីចំងាយជាច្រើនប្រភេទ ប៉ុន្តែមិនទាន់អាចប្រើប្រាស់ជាមួយនឹង Tomahawk បាននៅឡើយទេ។ វាមានប្រវែងសរុបដល់ទៅ ១៦១ម៉ែត្រនិងទទឹង២១ម៉ែត្រ អាចធ្វើដំណើរក្នុងល្បឿនប្រមាណជា៣០ណត់ ឬជិត៦០គីឡូម៉ែត្រក្នុងមួយម៉ោង ជាមួយនឹងទម្ងន់ផ្ទុកសរុបដល់ទៅ៩៥០០តោន។ ចំណែកឯមីស៊ីល Tomahawk គឺជាប្រភេទមីស៊ីលយុទ្ធសាស្ត្រដ៏សំខាន់របស់អាម៉េរិកដែលផលិតឡើងសម្រាប់សម្ព័ន្ធមិត្តនៅក្នុងតំបន់។ មីស៊ីលនេះអាចបាញ់បានចំងាយដល់ទៅ១០០០គីឡូម៉ែត្រ ពោលគឺគ្រប់គ្រាន់ក្នុងការវាយប្រហារទីតាំងជាច្រើនរបស់ប្រទេសចិន និងអាចទៅដល់ប្រទេសកូរ៉េខាងជើងផងដែរ។
តាមពិត ផែនការហ្វឹកហាត់ និងធ្វើទំនើបកម្មនេះមិនមែនជារឿងទើបតែអនុម័តនោះទេ ពោលគឺតាំងតែពីដើមឆ្នាំ២០២៤ ដោយរដ្ឋាភិបាលក្រុងតូក្យូបានចុះហត្ថលេខាក្នុងការបញ្ជាទិញមីស៊ីល Tomahawk ដល់ទៅ៤០០គ្រាប់។ កុងត្រាបញ្ជាទិញនេះគឺជាផ្នែកមួយនៃកិច្ចខិតខំក្នុងការពង្រឹងវិស័យការពារជាតិទប់ទល់ទៅនឹងការគំរាមកំហែងនៅក្នុងតំបន់។
នៅក្នុងសេចក្តីថ្លែងការណ៍មួយ រដ្ឋមន្ត្រីក្រសួងការពារជាតិជប៉ុន លោក Nakatani បានលើកឡើងបែបនេះថា៖ ពិភពលោកកំពុងស្ថិតនៅក្នុងស្ថានភាពមិនប្រាកដប្រជានោះទេ ហើយហានិភ័យនៃគ្រោះថ្នាក់និងភាពស្មុគ្រស្មាញកំពុងកើតមាន ខណៈដែលសកម្មភាពយោធារបស់ប្រទេសចិននៅតែជាបញ្ហាប្រឈមដ៏ធំជាងគេបំផុតរបស់ជប៉ុន ជាពិសេសបញ្ហានៅប្រជុំកោះ Senkaku ដែលរដ្ឋាភិបាលក្រុងប៉េកាំងកំពុងទាមទារយកទៅគ្រប់គ្រងក្រោមអំណាចរបស់ខ្លួន។
គួរឲ្យដឹងដែរថា សកម្មភាពគ្រោះថ្នាក់ចុងក្រោយនេះប្រទេសចិនបានបង្ហាញសមត្ថភាពថ្មីមួយចំនួន រួមទាំងមីស៊ីលប្រឆាំងនាវាដ៏មានឥទ្ធិពលក្នុងអំឡុងពេលព្យុហយាត្រាយោធានៅទីក្រុងប៉េកាំងកាលពីថ្ងៃទី៣ ខែកញ្ញា ឆ្នាំ២០២៥កន្លងទៅថ្មីៗនេះ៕
Account
Security
Favourite Content