សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងនាមជាសេនាធិការរបស់រាជរដ្ឋាភិបាល ក្រសួងពាណិជ្ជកម្ម បានរៀបចំនូវគោលនយោបាយជាតិស្តីពីកម្មសិទ្ធិបញ្ញា ឆ្នាំ២០២៣-២០២៨ ដែលជាផែនទីបង្ហាញផ្លូវមួយសម្រាប់ក្រសួងស្ថាប័នជាតិដែលមានជាប់ពាក់ព័ន្ធនឹងវិស័យនេះអាចយកទៅអនុវត្ត និងអភិវឌ្ឍន៍សកម្មភាពការងាររបស់ខ្លួនឱ្យស្របតាមឆន្ទៈរបស់រាជរដ្ឋាភិបាលកម្ពុជា ក្នុងការជំរុញគំនិតច្នៃប្រឌិត ការបង្កើតថ្មី ជំរុញនវានុវត្តន៍ផលិតផលនិងសេវាកម្មថ្មីៗ និងជំរុញវិស័យពាណិជ្ជកម្ម ឧស្សាហកម្ម បច្ចេកវិទ្យា វិទ្យាសាស្ត្រ កសិកម្ម ទេសចរណ៍ និងសុខាភិបាលជាដើម។
ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានមានប្រសាសន៍ឱ្យដឹងដូច្នេះ ក្នុងពិធីបើកសិក្ខាសាលាពិគ្រោះយោបល់ស្ដីពី ការពិនិត្យ និងផ្តល់ធាតុចូលលើសេចក្តីព្រាងយុទ្ធសាស្រ្ត និងផែនទីបង្ហាញផ្លូវសម្រាប់ប្រព័ន្ធចុះបញ្ជី និងអភិវឌ្ឍន៍ផលិតផលម៉ាកសម្គាល់ភូមិសាស្រ្តទំនិញកម្ពុជា និងប្រកាសស្តីពី ការបង្កើតក្រុមការងារម៉ាកសម្គាល់ភូមិសាស្រ្តទំនិញកម្ពុជា កាលពីថ្ងៃទី១១ ខែសីហា ឆ្នាំ២០២៥ នៅរាជធានីភ្នំពេញ ។
ឯកឧត្តមរដ្ឋលេខាធិការ បានគូសបញ្ជាក់ថា បច្ចុប្បន្នកម្ពុជាមានលិខិតបទដ្ឋានគតិយុត្តសម្រាប់គ្រប់គ្រងលើវិស័យកម្មសិទ្ធិបញ្ញា ជាពិសេសពាក់ព័ន្ធនឹងម៉ាកសម្គាល់ភូមិសាស្ត្រទំនិញដែលរួមមានច្បាប់ស្តីពីម៉ាកសម្គាល់ភូមិសាស្ត្រទំនិញ អនុក្រឹត្យ និងប្រកាស។ តែទោះបីជាយ៉ាងនេះក្តី ច្បាប់និងលិខិតបទដ្ឋានទាំងអស់នេះត្រូវការការសិក្សាស្រាវជ្រាវបន្ថែមដើម្បីពិនិត្យលទ្ធភាពក្នុងការកែសម្រួលឬធ្វើវិសោធនកម្មច្បាប់ខ្លះ ដែលមិនវិវត្តន៍ទាន់ការអភិវឌ្ឍន៍សង្គម។
ក្រសួងពាណិជ្ជកម្មបានរៀបចំសិក្ខាសាលាពិគ្រោះយោបល់មួយ ដែលមានការចូលរួមពីភាគីពាក់ព័ន្ធជាតិនិងអន្តរជាតិដើម្បីប្រមូលធាតុចូលក្នុងគោលបំណងជួយឱ្យសេចក្តីព្រាងយុទ្ធសាស្រ្ត និងផែនទីបង្ហាញផ្លូវ កាន់តែមានប្រសិទ្ធភាព និងកាន់តែល្អប្រសើរ ។
ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម ប្រធានលេខាធិការដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញា និងជាប្រធាននាយកដ្ឋានកម្មសិទ្ធិបញ្ញា បានឱ្យដឹងថា៖ចាប់តាំងពីប្រទេសកម្ពុជាចូលជាសមាជិករបស់ អង្គការកម្មសិទ្ធិបញ្ញាពិភពលោក (WIPO) នៅឆ្នាំ ១៩៩៥ និងបន្ទាប់ពីកម្ពុជាចូលជាសមាជិក របស់អង្គការពាណិជ្ជកម្មពិភពលោកនៅឆ្នាំ២០០៤ បានជំរុញឱ្យប្រទេសកម្ពុជាបានចូលរួមអនុវត្តយ៉ាងសកម្មក្នុងប្រព័ន្ធ ពហុភាគីនិយមសម្រាប់ការធ្វើពាណិជ្ជកម្ម (Multilateral Trading System) និងបានខិតខំ កសាងនូវលិខិតបទដ្ឋានគតិយុត្តនានាពាក់ព័ន្ធនឹងវិស័យ កម្មសិទ្ធិបញ្ញាឱ្យស្រប តាមបទដ្ឋាន និងស្តង់ដាររបស់អង្គការ WIPO និង WTO ដើម្បីគាំពារដល់ម្ចាស់សិទ្ធិកម្មសិទ្ធិបញ្ញានិង ការអភិវឌ្ឍនូវប្រព័ន្ធពាណិជ្ជកម្មផងដែរ៕
Account
Security
Favourite Content