សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាប់គិតចាប់ពីឆ្នាំ២០០០ ដល់ឆ្នាំ២០២៤នេះ កម្ពុជាទទួលបានការវិនិយោគលើគម្រោងអគារខ្ពស់ៗនៅទូទាំងប្រទេសមានចំនួន ២ ៩០៣អគារ ដែលក្នុងនោះឃើញថារាជធានីភ្នំពេញ ជាតំបន់ដែលទទួលបានគម្រោងវិនិយោគលើអគារខ្ពស់ៗជាច្រើនជាងគេក្នុងចំណោមបណ្ដាខេត្តនានាទូទាំងប្រទេស ។
យោងតាមរបាយការណ៍បូកសរុបលទ្ធផលការងាររបស់ក្រសួងរៀបចំដែនដី នគរូបនីយកម្ម និងសំណង់ ឆ្នាំ២០២៤ បានឱ្យដឹងថា ក្នុងចំណោមអគារទាំង ២៩០៣ អគារនេះ ភ្នំពេញមានអគារខ្ពស់ចាប់ពី៥ជាន់ឡើងទៅចំនួន ១ ៨២៤អគារ បន្ទាប់មកគឺខេត្តព្រះសីហនុ ជាតំបន់ដែលមានការវិនិយោគលើអគារខ្ពស់ច្រើនជាងគេ ដោយក្នុងគិតត្រឹមឆ្នាំ ២០២៤នេះ ខេត្តព្រះសីហនុ មានអគារខ្ពស់ចំនួន ៧៣៨ អគារ និងខេត្តបន្ទាយមានជ័យមានចំនួន ២៧២អគារ ។
របាយការណ៍ក៏បានបង្ហាញផងដែរនូវចំនួនអគារចាប់ពី ៥ជាន់ ដល់ ៩ជាន់ មានចំនួន ១ ៦៨០អគារ , អគារកម្ពស់ចាប់ពី ១០ជាន់ ដល់ ១៩ជាន់ មានចំនួន ៧៥៨អគារ អគារកម្ពស់ចាប់ពី ២០ជាន់ ដល់ ២៩ជាន់ មានចំនួន ២៥២អគារ, អគារកម្ពស់ចាប់ពី ៣០ ដល់ ៣៩ជាន់ មានចំនួន ១៥៣អគារ និងអគារកម្ពស់ចាប់ពី ៤០ជាន់ឡើងទៅមានចំនួន ៦០អគារ ។ ដោយឡែក សម្រាប់តែឆ្នាំ២០២៤នេះ ការវិនិយោគលើគម្រោងអគារខ្ពស់ចាប់ពី ៥ជាន់ឡើងទៅមានចំនួន ១៦៥គម្រោង ស្មើនឹង១៨៤អគារបន្ថែមទៀតផងដែរ ។
ក្រុមហ៊ុនអចលនទ្រព្យ CBRE បានឱ្យដឹងតាមរយៈការស្រាវជ្រាវរបស់ខ្លួនថា ការវិនិយោគលើអគារ ឬការវិនិយោគលើវិស័យអចលនទ្រព្យក្នុងប្រទេសកម្ពុជា មានសន្ទុះងើបឡើងខ្លាំងនៅក្នុងអំឡុងឆ្នាំ ២០១៧ រហូតដល់ឆ្នាំ២០១៩ និងចាប់ផ្ដើមធ្លាក់ចុះវិញចាប់ពីឆ្នាំ២០២០ ជាអំឡុងពេលដែលពិភពលោកបានជួបនឹងវិបត្តិជំងឺកូវីដ១៩ និងក្រោយមកទៀតក៏ជួបនឹងវិបត្តិសេដ្ឋកិច្ចសកលដោយសារតែរងឥទ្ធិពលពីសង្គ្រាមរវាងរុស្ស៊ី និងអ៊ុយក្រែន និងធ្វើឱ្យការវិនិយោគអគារខ្ពស់ៗនៅកម្ពុជាជាពិសេសនៅខេត្តព្រះសីហនុជាច្រើនបានជាប់គាំង ។
ក្រោយវិបត្តិកូវីដ១៩ និងវិបត្តិនៃសង្គ្រាមរវាងរុស្ស៊ី និងអ៊ុយក្រែន រាជរដ្ឋាភិបាលកម្ពុជាបានប្រើប្រាស់យន្តការដោះស្រាយនិងស្វែងរកវិនិយោគទុនថ្មីៗមកបន្តនិងបញ្ចប់គម្រោងអគារនៅក្នុងខេត្តព្រះសីហនុ ក៏ដូចជាគម្រោងវិនិយោគដែលជួបបញ្ហា ។ ជាលទ្ធផល គម្រោងអគារជាប់គាំងជាបន្តបន្ទាប់នៅក្នុងខេត្តព្រះសីហនុ ត្រូវបានដោះស្រាយ និងលើកទឹកចិត្តនិងជំរុញឱ្យមានការវិនិយោគជាបន្តបន្ទាប់ឡើងវិញ ។
លោក សៅ ហុក ប្រធានក្រុមហ៊ុនអចលនទ្រប្យ KW Cambodia សាខាខេត្តព្រះសីហនុ បានមានប្រសាសន៍ឱ្យដឹងថា បន្ទាប់ពីរាជរដ្ឋាភិបាលកម្ពុជាបានដាក់ដំណើរការនូវកម្មវិធីពិសេសជំរុញការវិនិយោគនៅខេត្តព្រះសីហនុ ឃើញថាខេត្តមួយនេះ ចាប់ផ្ដើមទទួលបានការវិនិយោគទាំងគម្រោងវិនិយោគដែលជាប់គាំងនិងគម្រោងវិនិយោគថ្មីៗជាបន្តបន្ទាប់ធ្វើឱ្យតម្រូវការដីធ្លីសម្រាប់សាងសង់អគារនិងការវិនិយោគនានាចាប់ផ្ដើមមានកំណើនឡើង និងរំពឹងថាសកម្មភាពនៃការវិនិយោគនឹងចាប់ផ្ដើមល្អឡើងវិញផងដែរ ៕
Account
Security
Favourite Content