បរទេស៖ យោងតាមប្រភពព័ត៌មានពី BBC បានរាយការណ៍ថា ក្រសួងអប់រំសហរដ្ឋអាម៉េរិកគ្រោងនឹងកាត់បន្ថយកម្លាំងការងារជាងពាក់កណ្តាលដែលជាផ្នែកមួយនៃកិច្ចខិតខំប្រឹងប្រែងរបស់រដ្ឋបាល Trump ដើម្បីកាត់បន្ថយទំហំចំណាយនៃរដ្ឋាភិបាលសហព័ន្ធ។ ការបញ្ឈប់ការងារបុគ្គលិកដ៏ធំបែបនេះនឹងប៉ះពាល់ដល់មនុស្សជាង ២ ១០០ នាក់ ដែលត្រូវបានកំណត់ឱ្យលាឈប់ពីការងារចាប់ពីថ្ងៃទី២១ ខែមីនា ឆ្នាំ២០២៥ ខាងមុខនេះ។

ក្រសួងអប់រំសហរដ្ឋអាម៉េរិកត្រូវបានបង្កើតឡើងក្នុងឆ្នាំ១៩៧៩ មានមុខងារជានាយកដ្ឋានត្រួតពិនិត្យការផ្តល់មូលនិធិសម្រាប់សាលារដ្ឋ គ្រប់គ្រងប្រាក់កម្ចីសិស្ស និងដំណើរការកម្មវិធីជួយដល់សិស្សដែលមានប្រាក់ចំណូលទាប។ ក្រសួងនេះមានថវិកាប្រចាំឆ្នាំប្រហែល ២៣៨ ពាន់លានដុល្លារ ដែលមានបុគ្គលិកច្រើនជាង ៤ ០០០ នាក់។ យ៉ាងណាមិញ Trump បានព្យាយាមរកឱកាសជាយូរមកហើយ ដើម្បីលុបបំបាត់នាយកដ្ឋានមួយនេះ ប៉ុន្តែសកម្មភាពបែបនេះចាំបាច់ត្រូវការការយល់ព្រមពីសភា។

មូលនិធិសហព័ន្ធមានចំណែកតិចតួចប្រហែល ១៣ ភាគរយសម្រាប់សាលាបឋមសិក្សា និងមធ្យមសិក្សា ខណៈដែលភាគច្រើនគឺមកពីរដ្ឋ និងសហគមន៍។ ក្រសួងអប់រំសហរដ្ឋអាម៉េរិកក៏ដើរតួយ៉ាងសំខាន់ក្នុងការគ្រប់គ្រង និងត្រួតពិនិត្យប្រាក់កម្ចីរបស់និស្សិតអាម៉េរិករាប់លាននាក់ ដែលប្រើប្រាស់សម្រាប់បង់ថ្លៃសិក្សាថ្នាក់ឧត្តមសិក្សា។

កាលពីថ្ងៃអង្គារ៍ សេចក្តីថ្លែងការណ៍មួយពីលេខាធិការអប់រំ Linda McMahon បានលើកឡើងថា ៖

«ថ្ងៃនេះ នាយកដ្ឋានអប់រំចាំបាច់បង្ខំចិត្តកាត់បន្ថយកម្លាំងការងារ ដែលនឹងប៉ះពាល់ដល់ជិត ៥០ ភាគរយនៃកម្លាំងការងារសរុបរបស់នាយកដ្ឋាន។ ការកាត់បន្ថយនេះ​ធ្វើ​ឡើង​ដើម្បីសម្រួលដល់សិស្ស មាតាបិតា អ្នក​អប់រំ និង​អ្នក​បង់​ពន្ធ​ឲ្យ​កាន់​តែ​ល្អជាងមុន ប៉ុន្តែវានឹងប៉ះពាល់ដល់ផ្នែកទាំងអស់នៅក្នុងនាយកដ្ឋាន»។

គួររំលឹកថា ក្នុងអំឡុងពេល Trump ស្បថចូលកាន់តំណែងជាប្រធានាធិបតី ទីភ្នាក់ងារនេះមានបុគ្គលិកចំនួន ៤ ១៣៣ នាក់ប៉ុណ្ណោះ ដែលជាចំនួនតិចជាងគេបំផុតក្នុងចំណោមភ្នាក់ងារកម្រិតគណៈរដ្ឋមន្ត្រីទាំង ១៥ របស់សហរដ្ឋអាម៉េរិក។ ដូច្នោះហើយ បន្ទាប់ពីកាត់បន្ថយកម្លាំងការងារ នោះវានៅសល់បុគ្គលិកចំនួន ២ ១៨៣ នាក់ប៉ុណ្ណោះ។​ ទន្ទឹមនឹងនេះ សេចក្តីជូនដំណឹងបញ្ជាក់ដែរថា និយោជិតដែលត្រូវបានបញ្ឈប់ការងារនឹងបន្តទទួលបានប្រាក់បៀវត្សរ៍ធម្មតា និងអត្ថប្រយោជន៍រហូតដល់ថ្ងៃទី ៩ ខែមិថុនា ក៏ដូចជាកញ្ចប់ប្រាក់បំណាច់ ឬប្រាក់ចូលនិវត្តន៍ដោយផ្អែកលើរយៈពេលដែលពួកគេធ្វើការនៅនាយកដ្ឋាន។

លោក Randi Weingarten ប្រធានសហជីពលើកឡើងថា ការកាត់បន្ថយកម្លាំងយ៉ាងច្រើននៅក្រសួងអប់រំ គឺជាការបំផ្លិចបំផ្លាញលើឱកាស និងសមត្ថភាពរបស់ទីភ្នាក់ងារនេះក្នុងការគាំទ្រដល់សិស្ស ដោយធ្វើឱ្យកម្មវិធីអប់រំរបស់សហព័ន្ធធ្លាក់ចូលទៅក្នុងភាពវឹកវរនៅទូទាំងប្រទេស ហើយលោកស្រី​បាន​អំពាវនាវ​ឲ្យ​សភា និង​តុលាការ​ជួយ​អន្តរាគមន៍លើបញ្ហានេះ៕