បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា គណៈកម្មការសហភាពអឺរ៉ុបគ្រោងនឹងទប់ស្កាត់ការនាំចូលផលិតផលអាហារមួយចំនួនពីសហរដ្ឋអាម៉េរិក ប៉ុន្តែប្រធានាធិបតីអាម៉េរិកបានវាយបកវិញថា វិធានការនេះនឹងធ្វើឱ្យប៉ះពាល់ដល់សហភាពអឺរ៉ុបខ្លួនឯងតែប៉ុណ្ណោះ។

ថ្មីៗនេះ សហភាពអឺរ៉ុប បាន និងកំពុងពិចារណាទៅលើវិធានការរឆ្លើយតបនឹងការដាក់ពន្ធគយរបស់ទីក្រុងវ៉ាស៊ីនតោន។ ចាប់តាំងពី Trump ឡើងកាន់តំណែងជាប្រធានាធិបតី គាត់បានប្រកាសផែនការយកពន្ធនាំចូលជាច្រើនក្នុងកិច្ចខិតខំប្រឹងប្រែងដោះស្រាយបញ្ហាអតុល្យភាពពាណិជ្ជកម្ម ដែលធ្វើឲ្យភាពតានតឹងពាណិជ្ជកម្មរវាងសហរដ្ឋអាមេរិក និងសហភាពអឺរ៉ុបកំពុងកើនឡើង។ កាលពីខែមករា កន្លងទៅនេះ លោក Trump បានប្រកាសពីការដាក់ពន្ធ ២៥ ភាគរយលើការនាំចូលទាំងអស់ពីម៉ិកស៊ិច និងកាណាដា រួមជាមួយនឹងពន្ធបន្ថែម ១០ ភាគរយលើទំនិញពីប្រទេសចិន ដោយលើកឡើងពីការព្រួយបារម្ភអំពីអន្តោប្រវេសន៍ខុសច្បាប់ និងការជួញដូរគ្រឿងញៀន។ បន្ទាប់ពីពិភាក្សាជាមួយមេដឹកនាំម៉ិកស៊ិច និងកាណាដា ពន្ធគយត្រូវបានពន្យារពេលរយៈពេល ៣០ ថ្ងៃ ខណៈដែលប្រទេសទាំងពីរបានព្រមព្រៀងគ្នាដើម្បីបង្កើនសន្តិសុខព្រំដែន។ បន្ទាប់ពីវិធានការពន្ធបណ្តាលឱ្យរំខានដល់ការចែកចាយកាលពីសប្តាហ៍មុន Trump បានរក្សាការមិនយកពន្ធពីកញ្ចប់តូចៗពីប្រទេសចិន។

ទន្ទឹមនឹងនេះ វិធានការ​ពន្ធគយរបស់ Trump រួម​មាន៖ ការដាក់​ពន្ធ​​ ១០ ភាគរយលើ​ដែកថែប និង​អាលុយមីញ៉ូមទាំងអស់ដែលនាំចូលមកអាម៉េរិក, ពន្ធសងសឹកឱ្យស្មើភាពគ្នា (Reciprocal Tariff) , និង ​ការ​យកពន្ធ​ដាច់ដោយឡែក​លើ​រថយន្ត ឱសថ និងគ្រឿងផ្គុំឈីប semiconductor ។ យ៉ាងណាមិញ Trump គ្រោងនឹងដាក់ពន្ធបន្ថែម ២៥ ភាគរយលើដែក និងអាលុយមីញ៉ូមទាំងអស់ដែលនាំយកមកសហរដ្ឋអាមេរិកចាប់ពីថ្ងៃទី ៤ ខែមីនា ដោយបានសង្កត់ធ្ងន់ថា ពន្ធនេះនឹងអនុវត្តលើពន្ធដែលមានស្រាប់លើលោហធាតុទាំងនោះ។

កាលពីថ្ងៃអាទិត្យ កាសែត Financial Times បានរាយការណ៍ថា គណៈកម្មការអឺរ៉ុបកំពុងរៀបចំដើម្បីប្រកាសពន្ធសងសឹកជុំទីមួយ។ គេរំពឹងថា វិធានការទាំងនេះនឹងកំណត់គោលដៅលើដំណាំរបស់សហរដ្ឋអាម៉េរិក ដូចជាសណ្តែកសៀងជាដើម ដែលត្រូវបានដាំដុះដោយប្រើប្រាស់ថ្នាំសម្លាប់សត្វល្អិត ដែលបានហាមឃាត់កសិករសហភាពអឺរ៉ុបពីការប្រើប្រាស់។ យ៉ាងណាមិញ ប្រធានាធិបតី​អាម៉េរិក Donald Trump បានលើកឡើងថា ការធ្វើបែបនេះមានតែ​ធ្វើឱ្យអឺរ៉ុប​ខ្លួនឯងរងគ្រោះតែ​ប៉ុណ្ណោះ ហើយសេតវិមាននៅតែប្រកាន់ខ្ជាប់នូវផែនការអនុវត្តពន្ធសងសឹកឱ្យស្មើភាពគ្នា។
 

គួរឲ្យបញ្ជាក់ដែរថា សហរដ្ឋអាមេរិក និងសហភាពអឺរ៉ុបបានធ្លាក់ចូលក្នុងជម្លោះពាណិជ្ជកម្មដ៏ធំមួយក្នុងឆ្នាំ២០១៨ ដែលជាអាណត្តិប្រធានាធិបតីដំបូងរបស់ Trump។ ក្នុងអំឡុងពេលនោះ Trump បានដាក់ពន្ធ ២៥ ភាគរយលើការនាំចូលដែក និង ១០ ភាគរយលើអាលុយមីញ៉ូមពីអឺរ៉ុប ដោយលើកឡើងពីការប្រកួតប្រជែងរបស់អឺរ៉ុបគឺជាកង្វល់សន្តិសុខជាតិ។ ជាការឆ្លើយតប សហភាពអឺរ៉ុបបានដាក់ចេញនូវវិធានការណ៍តបតទៅវិញ ដោយដាក់ពន្ធនាំចូលលើម៉ូតូ Harley-Davidson និងខោខូវប៊យ Levi Strauss & Co។ ភាពតានតឹងបានកើនឡើងបន្ថែមទៀតនៅពេលដែល Trump គំរាមយកពន្ធលើការនាំចេញរថយន្តអឺរ៉ុបមកកាន់អាម៉េរិក ប៉ុន្តែវិធានការនេះមិនត្រូវបានអនុវត្តនោះទេ៕