ភ្នំពេញ ៖ ជាការពិត ភាពរីកចម្រើននៃបច្ចេកវិទ្យាហិរញ្ញវត្ថុនាពេលបច្ចុប្បន្ន បានជំរុញឱ្យការចាយវាយកាន់តែមានភាពងាយស្រួលជាងមុន ដែលទាមទារឱ្យបុគ្គលម្នាក់ៗកាន់តែប្រកាន់ខ្ជាប់នូវវិន័យក្នុងការចាយវាយឱ្យបានត្រឹមត្រូវ។

ការចេះចាយ មិនមែនបានន័យថាចេះទូទាត់ ចេះចាយវាយទិញអ្វីដែលខ្លួនចង់បានតាមតែចិត្ត​នោះទេ។ ការចេះចាយវាយ គឺការចេះចាយឱ្យត្រូវខ្ទង់ ឱ្យត្រូវតាមផែនការដែលបានកំណត់ ចេះចាយយ៉ាងណាមិនឱ្យធ្លាក់ខ្លួនចូលក្នុងបំណុលលើសលប់ ​និងចេះចាយឱ្យសល់ចំណែក​សម្រាប់សន្សំ។

បើតាមការលើកឡើងរបស់លោក ទុំ សុភានុ ដែលជាអ្នកមានបទពិសោធន៍សន្សំបានឱ្យដឹងថា មនុស្សភាគច្រើនយល់ច្រឡំថា ការសន្សំ គឺជាការកាត់បន្ថយគុណភាពនៃការរស់នៅ តាមរយៈការចាយវាយតិចតួចជាងមុន ប៉ុន្តែមែនទែនទៅ យើងអាចសន្សំបានដោយនៅតែរក្សាគុណភាពនៃការរស់នៅឱ្យនៅថេរ។

ត្រង់ចំណុចនេះ លោកបានបកស្រាយថា សន្សំដោយមិនឱ្យប៉ះពាល់ដល់គុណភាពនៃ​ការរស់នៅ គឺជាការដកនូវចំណាយមិនចំបាច់ចេញ ហើយដើម្បីអាចដឹងអំពីការចំណាយមិនចាំបាច់ គឺត្រូវដឹងអំពីការចំណាយសរុបក្នុងមួយខែៗ។

សម្រាប់វិធីសាស្ត្រក្នុងការគ្រប់គ្រងហិរញ្ញវត្ថុវិញ លោកបានលើកទឹកចិត្តឱ្យប្រើប្រាស់វិធីសាស្ត្រ ៥០​/៣០/២០ ដោយ៥០% នៃចំណូលសរុបគឺទុកសម្រាប់ចំណាយលើរបស់ចាំបាច់ដូចជាទឹក ភ្លើង ម្ហូបអាហារជាដើម។ ៣០% ទុកសម្រាប់សន្សំ និង២០% ផ្សេងទៀត ទុកសម្រាប់ចំណាយលើខ្លួនឯង ដើម្បីជាការលើកទឹកចិត្ត។

យ៉ាងណាមិញ ចេះចាយ ចេះសន្សំហើយ នៅមិនទាន់គ្រប់គ្រាន់ទេ ចំណុចមួយទៀតដែលបុគ្គលម្នាក់ៗគួរយកចិត្តទុកដាក់ដែរនោះគឺការសន្សំដោយឆ្លាតវៃ។ សន្សំដោយឆ្លាតវៃ គឺរកវិធីសាស្ត្រសន្សំដែលមានសុវត្ថិភាពខ្ពស់ មានកិច្ចការពារត្រឹមត្រូវ និងមានការប្រាក់។​ ក្នុងនោះ ការសន្សំជាមួយធនាគារ និងគ្រឹះស្ថានហិរញ្ញវត្ថុ គឺជាជម្រើសដ៏ល្អមួយ។

ត្រង់ចំណុចនេះដែរ អ្នកមានបទពិសោធន៍សន្សំខាងលើបានលើកឡើងថា វិធីសាស្ត្រសន្សំដោយការរក្សាទុកប្រាក់ដោយខ្លួនឯង ប្រឈមនឹងហានិភ័យច្រើន ដែលរួមមានទាំងគ្រោះថ្នាក់ជាយថាហេតុ និងបញ្ហាអតិផរណាជាដើម។

លោក ទុំ សុភានុ បានលើកឡើងយ៉ាងដូច្នេះថា៖

«បញ្ហាអតិផរណានេះ ជាបញ្ហាសំខាន់មួយដែលអ្នកសន្សំប្រាក់មិនគួរមើលរំលង…១០ម៉ឺនរៀលនៅថ្ងៃនេះ អាចមានតម្លៃថោកជាងតម្លៃ ១០ម៉ឺនរៀល នៅក្នុងរយៈពេល ១០ ឆ្នាំទៀត ដែលធ្វើឱ្យលុយយើងមិនត្រឹមតែមិនអាចបង្កើនចំណូលទេ ថែមទាំងធ្វើឱ្យធ្លាក់តម្លៃទៅវិញ។»

បន្ថែមពីនេះ លោកក៏បានរំលេចអំពីអត្ថប្រយោជន៍មួយចំនួនដែលបានមកពីការសន្សំផងដែរ។ លោកថា ការមានកញ្ចប់សន្សំនឹងធ្វើឱ្យបុគ្គលម្នាក់មានផ្លូវចិត្ត និងសុខភាពរាង្គកាយល្អ ដោយសារតែរូបគេមិនសូវព្រួយបារម្ភអំពីបញ្ហាលុយកាក់។ ម្យ៉ាង កញ្ចប់សន្សំក៏នឹងអាចជំរុញឱ្យបុគ្គលម្នាក់ៗសម្រេចបាននូវគោលដៅជីវិតរបស់ខ្លួនផងដែរ។ ម្ល៉ោះហើយ សម្រាប់រូបលោកផ្ទាល់ ការសន្សំពិតជាមានសារៈសំខាន់ខ្លាំងណាស់ដែលបុគ្គលគ្រប់គ្នាគួរតែចេះ៕