បរទេស៖ យោងទៅតាមប្រភពពីរ៉យទ័របានរាយការណ៍ថា កំណើនសេដ្ឋកិច្ចសកលនឹងថយចុះនៅឆ្នាំនេះ ដោយសារអតិផរណានៅបន្តធ្លាក់ចុះ និងអត្រាការប្រាក់ឡើងខ្ពស់ ខណៈដែលការជំរុញសេដ្ឋកិច្ចដោយក្រុមប្រទេសជឿនលឿន G20 មានភាពយឺតយ៉ាវ។ ស្របពេលនេះដែរ អ្នកជំនាញបានវាយតម្លៃឃើញថា កំណើន GDP ពិតប្រាកដរបស់ក្រុម G20 នឹងថយចុះមកត្រឹម ២,១ ភាគរយក្នុងឆ្នាំនេះ និង ២,២ ភាគរយឆ្នាំក្រោយ ដែលធ្លាក់ចុះពី ២,៧ ភាគរយកាលពីឆ្នាំ២០២២ កន្លងទៅនេះ។

នៅក្នុងប្រទេសសេដ្ឋកិច្ចជឿនលឿនសំខាន់ៗនឹងមានកំណើនសេដ្ឋកិច្ចខ្សោយខ្លាំង ដោយសារវិបត្តិសេដ្ឋកិច្ចកំពុងកើតឡើងនៅសហរដ្ឋអាមេរិក ចក្រភពអង់គ្លេស អាល្លឺម៉ង់ បារាំង និងអ៊ីតាលីជាដើម ហើយអតិផរណា ឬវិបត្តិហិរញ្ញវត្ថុនឹងផ្តល់ហានិភ័យកម្រិតខ្ពស់។ ថ្មីៗនេះផងដែរ អ្នកបង្កើតគោលនយោបាយរបស់សហរដ្ឋអាមេរិកសម្រេចកិច្ចព្រមព្រៀងបណ្ដោះអាសន្នមួយស្តីពីកម្រិតបំណុលរបស់ប្រទេស ខណៈដែលតម្រូវការសរុបចុះខ្សោយបានបង្ខំឱ្យធនាគារកណ្តាលនៃប្រទេសមួយចំនួនរឹតបន្តឹងបន្ថែមទៀត។

យោងទៅតាមទីភ្នាក់ងារ Moody’s Investor Service បានព្យាករណ៍ថា អត្រាកំណើនសេដ្ឋកិច្ចនឹងកើនឡើងប្រហែល ១ ភាគរយប៉ុណ្ណោះក្នុងឆ្នាំ២០២៣ និង ២០២៤ សម្រាប់សេដ្ឋកិច្ចអាមេរិក ដែលធ្លាក់ចុះពី ២,‌១ ភាគរយកាលពីឆ្នាំ២០២២ កន្លងទៅនេះ។ ការព្យាករណ៍បានមើលឃើញថា ការធ្លាក់ចុះសេដ្ឋកិច្ចកម្រិតស្រាលក្នុងត្រីមាសបន្តបន្ទាប់គ្នាៗ ដែលនឹងបង្កើនកំណើរអត្រាគ្មានការងារធ្វើដល់ប្រហែល ៥ ភាគរយនៅឆមាសទីពីរនៃឆ្នាំ ២០២៣ នេះ។  

នៅក្នុងករណីរបស់ប្រទេសអាល្លឺម៉ង់វិញ ភាពចុះខ្សោយនៃវិស័យផលិតកម្ម កង្វះកម្លាំងពលកម្ម អត្រាការប្រាក់ខ្ពស់ និង ការជាប់គាំងនៃអតិផរណា កំពុងកើនឡើងបានធ្វើឱ្យសេដ្ឋកិច្ចកាន់តែអាក្រក់ទៅៗ។ បន្ទាប់ពីផលិតកម្មឧស្សាហកម្មនៅក្នុងប្រទេសសេដ្ឋកិច្ចធំបំផុតរបស់តំបន់អឺរ៉ូមួយនេះកើនឡើង ៣,៧ ភាគរយនៅខែមករា វាបានធ្លាក់ចុះ ៣,៤ ភាគរយនៅក្នុងខែមីនា ជាពិសេសឧស្សាហកម្មរថយន្តបានរួមចំណែកច្រើនបំផុតក្នុងការធ្លាក់ចុះសេដ្ឋកិច្ច ដោយសារការបញ្ជាទិញថ្មីធ្លាក់ចុះខ្លាំង។ ទីភ្នាក់ងារ Moody បានព្យាករណ៍ថាកំណើនសេដ្ឋកិច្ចអាល្លឺម៉ង់នឹងកើនឡើង ១,២ ភាគរយប៉ុណ្ណោះនៅឆ្នាំ ២០២៤។

ទន្ទឹមនឹងនោះដែរ សេដ្ឋកិច្ចនៅចក្រភពអង់គ្លេសស្ថិតក្នុងកម្រិតមធ្យម ដោយសារសម្ពាធអតិផរណាខ្ពស់ ហើយសេដ្ឋកិច្ចអង់គ្លេសនឹងធ្លាក់ចុះ ០,១ ភាគរយនៅឆ្នាំនេះ។ របាយការណ៍បានបង្ហាញថា នៅឆ្នាំ ២០២៣ នេះផងដែរ ផលប៉ះពាល់ពីតម្លៃរស់នៅខ្ពស់ និង លក្ខខណ្ឌហិរញ្ញវត្ថុកាន់តែតឹងតែងនៅតែបន្តរារាំងដល់សេដ្ឋកិច្ចប្រទេស ខណៈដែលអត្រាការប្រាក់របស់ធនាគារកណ្តាលអង់គ្លេសនឹងឡើងដល់កំពូលនៅ ៤,៧៥ ភាគរយ ដែលបង្កឲ្យនយោបាយរូបិយវត្ថុរឹតតែតឹងតែងក្នុងរយៈពេលប៉ុន្មានឆ្នាំខាងមុខនេះ។  ស្របពេលនេះដែរ នាយករដ្ឋមន្ត្រីអង់គ្លេស Rishi Sunak បានព្រមានថា សេដ្ឋកិច្ចរបស់ចក្រភពអង់គ្លេសអាចនឹងស្ថិតក្នុងវិបត្តិសេដ្ឋកិច្ចនៅឆ្នាំក្រោយ ដោយសារអតិផរណាខ្ពស់អាចនឹងជំរុញឱ្យអត្រាការប្រាក់លើសពី ៥ ភាគរយ៕