សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ នៅថ្ងៃចន្ទសប្តាហ៍នេះ ចិន បានប្រកាសហើយថា កិច្ចប្រជុំកំពូលរវាងថ្នាក់ដឹកនាំចិនជាមួយនឹងសហភាពអឺរ៉ុបនឹងប្រព្រឹត្តទៅនៅចំថ្ងៃគំរប់ខួបលើកទី៥០នៃការកកើតទំនាក់ទំនងរវាងភាគីទាំងពីរដោយមានប្រធានបទសំខាន់ពាក់ព័ន្ធទៅនឹងជម្លោះពាណិជ្ជកម្ម ព្រមទាំងការកើនឡើងនៃភាពមិនច្បាស់លាស់របស់ពិភពលោក។
បើមិនមានអ្វីប្រែប្រួលទេ ប្រធានគណៈកម្មការអឺរ៉ុប លោកស្រី Ursula von der Leyen និងប្រធានក្រុមប្រឹក្សាអឺរ៉ុប លោក Antonio Costa នឹងធ្វើដំណើរបំពេញទស្សនកិច្ចនាទីក្រុងប៉េកាំងចាប់ពីថ្ងៃព្រហស្បតិ៍ក្នុងសប្ដាហ៍នេះ ហើយព្រមទាំងមានជំនួបដោយផ្ទាល់ជាមួយនឹងលោកប្រធានាធិបតីចិន Xi Jinping ផងដែរ។
យោងតាមការប្រកាសដោយក្រសួងការបរទេសចិនដដែលបានបញ្ជាក់ថា នៅក្នុងថ្ងៃដដែលនេះ លោកនាយករដ្ឋមន្ត្រីចិន Li Qiang ក៏នឹងត្រូវត្រៀមខ្លួនដឹកនាំនៃកិច្ចប្រជុំកំពូលចិន-អឺរ៉ុប (China-EU Summit) លើកទី២៥ ជាមួយនឹងមេដឹកនាំអឺរ៉ុបផ្សេងទៀតដែរ។ ក្នុងកិច្ចប្រជុំដ៏មានសារៈសំខាន់នេះត្រូវបានគេរំពឹងទុកថា នឹងមានកិច្ចពិភាក្សាស្វែងរកដំណោះស្រាយជុំវិញបញ្ហាជម្លោះពាណិជ្ជកម្មដែលកំពុងកើនឡើងកំដៅ ខណៈដែលទីក្រុងប៉េកាំងបានបញ្ជាក់អំពីជំហរបស់ខ្លួនហើយក្នុងការស្វែងរក និងធានាឲ្យបាននូវទំនាក់ទំនងសេដ្ឋកិច្ច នយោបាយឲ្យកាន់តែជិតស្និទ្ធត្រឡប់មកវិញដើម្បីទប់ទល់ទៅនឹងភាពមិនច្បាស់លាស់របស់សេដ្ឋកិច្ចសកល ជាពិសេសទំនាក់ទំនងដ៏រកាំរកូសជាមួយនឹងសហរដ្ឋអាម៉េរិក។
សូមរំលឹកដែរថា ចាប់តាំងពីឆ្នាំ២០២១រហូតមក ទំនាក់ទំនងចិន និងអឺរ៉ុប បានធ្លាក់ចុះខ្លាំងដល់ចំណុចមួយដែលពុំធ្លាប់មានក្រោយពេលដែលតំបន់អឺរ៉ុបបានសម្រេចចិត្តក្នុងការទំលាក់ទណ្ឌកម្មប្រឆាំងនឹងប្រទេសចិន និងក្រុមមន្ត្រីរដ្ឋាភិបាលជាច្រើនដែលរងការចោទប្រកាន់ថា បានចូលរួមក្នុងសកម្មភាពរំលោភបំពានសិទ្ធិមនុស្សទៅលើក្រុមពលរដ្ឋភាគតិចដែលរស់នៅក្នុងតំបន់ Xinjiang ។ ជាការឆ្លើយតប រដ្ឋាភិបាលក្រុងប៉េកាំងក៏បានធ្វើការសងសឹកពេញទំហឹងផងដែរតាមរយៈការកាត់បន្ថយទំនាក់ទំនងពាណិជ្ជកម្មមួយផ្នែកធំជាមួយគ្នា។
នៅក្នុងជំនួបនេះផងដែរ គេក៏រំពឹងទុកដែរថា ចិន និងអឺរ៉ុប នឹងធ្វើការរួមគ្នាក្នុងកិច្ចពិភាក្សាស្វែងរកដំណោះស្រាយនៅក្នុងជម្លោះពាណិជ្ជកម្មថ្មីៗក្នុងរយៈពេលប៉ុន្មានឆ្នាំចុងក្រោយ ដូចជា បញ្ហាទីផ្សារថយន្តអគ្គិសនី សំដៅលើម៉ាកយីហោរបស់ចិន, បញ្ហាទំនិញជាសាច់ជ្រូករបស់អឺរ៉ុប ព្រមទាំងការបញ្ជាទិញទំនិញឧបករណ៍បរិក្ខាពេទ្យ និងរ៉ែកម្រជាដើម។
យ៉ាងណាក្តី ក្រោយការប្រកាសដ៏គួរភ្ញាក់ផ្អើលពីសំណាក់លោកប្រធានាធិបតីអាម៉េរិក Donald Trump ជាមួយនឹងតម្លៃពន្ធគយថ្មីដ៏ច្រើនហួសហេតុកាលពីខែមេសា លោកស្រី Leyen បានទូរស័ព្ទផ្ទាល់ជាមួយនឹងនាយករដ្ឋមន្ត្រីចិន លោក Li ដោយបញ្ជាក់ថា ចិន និងអឺរ៉ុប នឹងត្រូវចាប់ដៃគ្នាទប់ទល់នឹងវិបត្តិនេះ ហើយចាំបាច់ត្រូវតែគាំទ្រគ្នាទៅវិញទៅមកចំពោះការកែប្រែប្រព័ន្ធនៃការធ្វើពាណិជ្ជកម្មសកលដែលគួរតែមានភាពស្មើគ្នាដោយសេរី និងផ្អែកលើមូលដ្ឋានគ្រឹះជារួម៕
Account
Security
Favourite Content