ភ្នំពេញ៖ រដ្ឋមន្ត្រីក្រសួងការបរទេស សមាហរណកម្មតំបន់ និងពលរដ្ឋតូហ្គោនៅក្រៅប្រទេស បានបង្ហាញពីគោលបំណងស្វែងរកកិច្ចសហការយ៉ាងស៊ីជម្រៅជាមួយកម្ពុជាទៅលើវិស័យឧស្សាហកម្ម ខណៈដែលលោក ក៏ដូចជាគណៈប្រតិភូជាច្រើននាក់ដែលមកធ្វើទស្សនកិច្ច និងស្វែករកឱកាសវិនិយោគនៅកម្ពុជាបានសម្លឹងឃើញពីសក្ដានុពលរបស់កម្ពុជា។ ការលើកឡើងបែបនេះត្រូវបានធ្វើឡើងក្នុងឱកាសចូលជួបពិភាក្សាការងារជាមួយឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីពេលកន្លងទៅថ្មីនេះ។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបគណៈប្រតិភូជាន់ខ្ពស់នៃសាធារណរដ្ឋតូហ្គោ ដឹកនាំដោយ ឯកឧត្តម សាស្ត្រាចារ្យ Komlan Edo Robert DUSSEY រដ្ឋមន្ត្រីក្រសួងការបរទេស សមាហរណកម្មតំបន់ និងពលរដ្ឋតូហ្គោនៅក្រៅប្រទេស ដើម្បីពិភាក្សាអំពីការពង្រឹងទំនាក់ទំនងទ្វេភាគី និងកិច្ចសហប្រតិបត្តិការក្នុងវិស័យឧស្សាហកម្ម។

នៅក្នុងកិច្ចជំនួបនេះ ឯកឧត្តមរដ្ឋមន្ត្រី DUSSEY បានកោតសរសើរចំពោះកំណើនវិស័យឧស្សា​ហកម្ម និងការធ្វើពាណិជ្ជកម្មរបស់កម្ពុជា ដោយគូសរំលេចអំពីការនាំចេញរបស់កម្ពុជាទៅកាន់សហរដ្ឋអាមេរិកថា ជាគំរូសម្រាប់ប្រទេសតូហ្គោ។

ឯកឧត្តម DUSSEY បានលើកឡើងថា៖

«ដំណើរទស្សនកិច្ចនេះនឹងមិនគ្រប់ជ្រុង​ជ្រោយទេប្រសិនបើគណៈប្រតិភូយើងមិនបានជួបពិភាក្សាជាមួយក្រសួងឧស្សាហកម្មកម្ពុជា។ យើងមានបំណងស្វែងយល់អំពីកត្តាជោគជ័យរបស់កម្ពុជា ក្នុងការទាក់ទាញវិនិយោគ និងជំរុញការនាំចេញ»។

ឯកឧត្តម ហែម វណ្ណឌី បានជម្រាបជូនថា ការរីកចម្រើននៃវិស័យឧស្សាហកម្មកម្ពុជា ឈរលើមូលដ្ឋានគ្រឹះនៃសុខសន្តិភាព និងស្ថិរភាព ដែលសម្រេចបានក្នុងឆ្នាំ១៩៩៨ តាមរយៈគោលនយោបាយឈ្នះ-ឈ្នះ ដែលបានបើកចំហសេដ្ឋកិច្ចសម្រាប់ការធ្វើពាណិជ្ជកម្មសកល បន្ទាប់ពីកម្ពុជាត្រូវបានដាក់ឱ្យនៅឯកកោ និងទណ្ឌកម្មសេដ្ឋកិច្ចជាច្រើនទសវត្សរ៍។

ឯកឧត្តមបានលើកឡើងថា ៖

«កម្ពុជាបានផ្តល់អាទិភាពលើការកសាងហេដ្ឋារចនាសម្ព័ន្ធ ដូចជាផ្លូវថ្នល់ ស្ពាន និងបណ្តាញអគ្គិសនី នៅក្នុងដំណាក់កាលអភិវឌ្ឍន៍ដំបូងៗរបស់ខ្លួន ដើម្បីបង្កើតបរិយាកាសអំណោយផលសម្រាប់ការវិនិយោគ និងជំរុញការធ្វើពាណិជ្ជកម្ម»។

កិច្ចពិភាក្សាក៏គ្របដណ្តប់លើយុទ្ធសាស្ត្រដែលកម្ពុជាប្រើសម្រាប់កសាងទំនាក់ទំនងល្អរវាងនិយោជក និងកម្មករ-និយោជិត តាមរយៈយន្តការនានា ដូចជាយន្តការប្រាក់ឈ្នួលអប្បបរមា និងគម្រោងរោងចក្រកាន់​តែ​ប្រសើរដែលផ្តួចផ្តើមដោយអង្គការ ILO។ កត្តាទាំងនេះបានធ្វើឱ្យប្រសើរឡើងនូវលក្ខខណ្ឌការងារ និងបង្កើនទំនុកចិត្តរបស់អ្នកវិនិយោគ។

ជាមួយគ្នានេះ ឯកឧត្តម ហែម វណ្ណឌី បានស្វាគមឱកាសក្នុងការបង្កើនកិច្ចសហប្រតិបត្តិការទ្វេភាគី ជាពិសេសើការអភិវឌ្ឍឧស្សាហកម្ម និងជំរុញការវិនិយោគ។ ឯកឧត្តមបានលើកឡើងថា កម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូល Francophonie នៅខេត្តសៀមរាបនៅឆ្នាំក្រោយ ដែលជាវេទិកាមួយទៀតសម្រាប់ការពង្រឹងទំនាក់ទំនងរវាងប្រទេសទាំងពីរ។

ឯកឧត្តមរដ្ឋមន្ត្រីក្រសួងការបរទេសតូហ្គោ បានទទួលស្គាល់សមិទ្ធផលរបស់ប្រទេសកម្ពុជា ដោយលើកឡើងថា អគ្គលេខាធិការរបស់អង្គការ ILO ដែលជាជនជាតិតូហ្គោ ក៏បានកោតសរសើរអំពីការកសាងទំនាក់ទំនងរវាងនិយោជក និងកម្មករ-និយោជិតនៅកម្ពុជាផងដែរ។

ជាចុងក្រោយ គណៈប្រតិភូក៏បានជម្រាបជូនអំពីផែនទីបង្ហាញផ្លូវតំបន់សេរីតូហ្គោ (Togo Free Zone) ដែលផ្តោតលើឧស្សាហកម្មសំខាន់ៗ ដូចជាឧស្សាហកម្មយានយន្ត កសិ-ឧស្សាហកម្ម និងវាយនភណ្ឌ ដែលគាំទ្រដោយកំពង់ផែសមុទ្រ និងផែស្ងួត ដើម្បីសម្រួលដល់ការធ្វើពាណិជ្ជកម្ម។ គណៈប្រតិភូក៏បានស្នើឱ្យមានការរៀបចំកិច្ចព្រមព្រៀងសហប្រតិបត្តិការមួយជាមួយកម្ពុជា៕