ហ្គាហ្សា បានក្លាយទៅជាភ្នក់ភ្លើងសង្គ្រាម និងការវាយប្រហារដាក់គ្នាយ៉ាងខ្លាំងក្លារវាងក្រុមប្រទេសមហាអំណាច ជាពិសេសចាប់តាំងតែពីពេលវាត្រូវបានក្រុមហាម៉ាសគ្រប់គ្រងអំណាចកាលពីឆ្នាំ២០០៧។ចាប់តាំងពីពេលនោះមក ហ្គាហ្សា បានក្លាយទៅជាចំណាប់ខ្មាំងផ្នែកនយោបាយដោយក្រុមប្រទេសក្នុងតំបន់ និងក្រៅតំបន់ ដែលរួមមានទាំងអ៊ីស្រាអែល និងអេហ្ស៊ីប ផងដែរ ដោយពួកគេបានបន្តដាក់ទណ្ឌកម្ម និងរាំងខ្ទប់រាល់សកម្មភាពចាំបាច់សម្រាប់ការអភិវឌ្ឍតំបន់ហ្គាហ្សាឡើងវិញ។

សង្គ្រាមធំៗមិនតិចជាង៤ដងនោះទេ ព្រមទាំងការបែងចែកដែនដីកាន់កាប់ដោយក្រុមហាម៉ាសផង និងក្រុមគាំទ្រដោយអជ្ញាធរប៉ាឡេស្ទីនផង នៅក្នុងតំបន់ West Bank ក៏ជាកត្តាជំរុញមួយទៀតដែលធ្វើឲ្យមានការកកស្ទះសេដ្ឋកិច្ចរបស់ហ្កាហ្សាកាន់តែអាក្រក់ជាងរៀងរាល់ថ្ងៃ។

ប្រតិបត្តិការសងសឹកលើក្រុមហាម៉ាសដោយកងកម្លាំងអ៊ីស្រាអែល ហៅកាត់ថា IDF ចុងក្រោយនេះ បានក្លាយទៅជាព្រឹត្តិការណ៍បំផ្លិចបំផ្លាញដ៏អាក្រក់បំផុតនៅក្នុងទឹកដីហ្គាហ្សា គិតចាប់តាំងតែពីសង្គ្រាមលោកលើកទី២មក ហើយបើយោងតាមការសិក្សា និងព្យាករណ៍ដោយអង្គការសហប្រជាជាតិ UN កាលពីពេលថ្មីៗនេះបានបង្ហាញថា ហ្គាហ្សា នឹងត្រូវការពេលវេលាយ៉ាងហោចណាស់រាប់រយឆ្នាំដើម្បីអាចស្តារសេដ្ឋកិច្ចរបស់ខ្លួនឲ្យបានដូចកម្រិតមុនការវាយប្រហារ។

នៅក្នុងវេទិកាពិភាក្សារបស់អង្គការសហប្រជាជាតិ ស្តីពី ពាណិជ្ជកម្ម និងការអភិវឌ្ឍ កាលពីថ្ងៃចន្ទដើមសប្តាហ៍នេះ បានបង្ហាញរបាយការណ៍នៃការព្យាករណ៍មួយដែលបានរៀបរាប់បែបនេះថា៖ប្រសិនបើសង្គ្រាមនៅហ្គាហ្សាអាចបញ្ចប់ភ្លាមៗ វាត្រូវការពេលវេលាយ៉ាងហោចណាស់ដល់ទៅ៣៥០ឆ្នាំដើម្បីអាចឲ្យទឹកដីនេះវិលត្រឡប់ទៅដល់កម្រិតមុនសង្គ្រាមដែលបានផ្ទុះឡើងកាលពីថ្ងៃទី៧ ខែតុលាឆ្នាំ២០២៣ នៅពេលដែលក្រុមហាម៉ាសបានបើកការវាយប្រហារទៅលើទឹកដីអ៊ីស្រាអែល។

របាយការណ៍ដដែលនេះបានសរសេរទៀតថា៖ បើទោះជាបទឈប់បាញ់ត្រូវបានបង្កើតឡើងភ្លាមៗក្តី ប៉ុន្តែ ហ្កាហ្សា នឹងមិនអាចត្រឡប់ទៅរកស្ថានភាពដើមភ្លាមនោះដែរ ហើយបើយោងទៅតាមការសន្ទស្សនៃកំណើនសេដ្ឋកិច្ចប្រចាំឆ្នាំរបស់ហ្គាហ្សានៅចន្លោះពីឆ្នាំ២០០៧ ដល់ឆ្នាំ២០២២ ដែលមានប្រមាណជា ០,៤ភាគរយនោះ វាចាំបាច់ត្រូវការពេលវេលាដល់ទៅ៣៥០ឆ្នាំដើម្បីឲ្យហ្គាហ្សាត្រឡប់ទៅរក GDP ក្នុងកម្រិតនេះវិញបាន។

បច្ចុប្បន្ន អ៊ីស្រាអែល នៅតែបន្តបិទខ្ទប់សកម្មភាពសេដ្ឋកិច្ចរបស់ហ្គាហ្សាដោយយកឡេសថា វានឹងអាចការពារមិនឲ្យក្រុមហាម៉ាសនាំចូលអាវុធបន្ថែមមកកាន់តំបន់ និងអាចបញ្ចប់ទៅនៃជម្លោះវាយប្រហារគ្នារវាងភាគីហាម៉ាស់ និងអ៊ីស្រាអែលផងដែរ។ នេះបើយោងតាមការលើកឡើងដោយតំណាងពិសេសនៅអង្គការសហប្រជាជាតិរបស់រដ្ឋាភិបាលអ៊ីស្រាអែល។

ទោះបីជាយ៉ាង អ្នកតំណាងរូបនេះបានធ្វើការឆ្លើយតបទៅនឹងរបាយការណ៍ព្យាករណ៍ ៣៥០ឆ្នាំនេះថា មិនអាចជាការពិតទាំងស្រុងនោះទេ ពីព្រោះថាបើចំណាយពេលដល់ទៅ៣៥០ឆ្នាំគឺមានន័យថា ហ្គហ្សានឹងមិនអាចរីកចម្រើនវិញបានជារៀងរហូត ប៉ុន្តែជាក់ស្តែងគឺវាអាស្រ័យទៅលើលក្ខខណ្ឌជាច្រើនដែលនឹងកើតឡើងនៅក្រោយការបញ្ចប់ជម្លោះទៅវិញនោះទេ។

គួរឲ្យដឹងដែរថា កាលពីខែមករា ធនាគារពិភពលោក បានព្យាករណ៍ថា ទំហំខូចខាតផ្នែកសេដ្ឋកិច្ចនៅតំបន់ West Bank និងហ្គាហ្សា មានប្រមាណជា ១៨,៥ពាន់លានដុល្លាររួចទៅហើយគិតត្រឹមក្នុងឆ្នាំ២០២២ ពោលគឺនៅមុនពេលដែលអ៊ីស្រាអែលបានបើកការវាយប្រហារលើក្រុមហាម៉ាស៕