ភ្នំពេញ ៖ វិស័យជលផល បានចូលរួម​ចំណែកយ៉ាងសំខាន់​​ និងមានសក្ដានុពល​ខ្លាំង​ក្នុងការជំរុញកំណើន​សេដ្ឋកិច្ចជាតិ ជាពិសេស​ជល​ផល​ទឹកប្រៃ ឬជល​ផល​សមុទ្រ​ ព្រោះកម្ពុជាជា​ប្រទេសដែលជាបមាត់សមុទ្រ​​និងមានធនធានដ៏សម្បូរបែប ។

យោងតាមប្រសាសន៍ឯកឧត្តម​ ប្រាក់ ដាវីដ រដ្ឋ​លេខាធិការ​ក្រសួង​កសិកម្ម រុក្ខ​ប្រមាញ់ និងនេសាទ​ ថ្លែង​ក្នុង​សិក្ខាសាលាមួយ​កាលពីដើមសប្ដាហ៍នេះ បានឱ្យដឹងថា​ វិស័យជលផល គឺមានសក្ដានុពលខ្លាំង ក្នុងការ​ចូលរួម​ និងពង្រឹង​សេដ្ឋកិច្ច​ជាតិ ហើយនៅពេលដែលសេដ្ឋកិច្ចជាតិមានភាពរឹងមាំ ដើរដោយរលូនហើយនោះនឹង​ធ្វើឱ្យការងារ​សន្តិសុខ ការងារ​ការពារជាតិ ក៏ដូចជាការងារផ្សេងៗទៀត នឹង​ដើរ​ដោយរលូនទៅមុខដូចគ្នា ។​

ឯកឧត្តម​បន្តថា ៖

«សេដ្ឋកិច្ច​ប្រៀបបានជាប្រេង​សាំង​ដែលចាក់ចូលទៅក្នុងរថយន្ត​ដូច្នោះដែរ ។ បើសិនជា​រថយន្ត​មួយមិនមានប្រេងសាំងទេ ទោះបីជា​រថយន្តនោះទំនើប​ និងល្អ​ប៉ុណ្ណា​ក៏ដោយ ក៏វាមិនអាច​ទៅមុខ​ដែរ ។ ដូច្នេះ ការងារ​ដែលយើងត្រូវធ្វើទាំងអស់គ្នា គឺត្រូវ​កា​គ្រប់គ្រង​ធនធាន​ជល​ផលឱ្យ​បានល្អ  និង​ត្រូវ​មានច្បាប់​ការពារ​ច្បាស់លាស់ ទាំង​ទឹកសាប និងទឹកប្រៃឱ្យ​មានភាពគង់​វង្ស។ ​ បើសិនជា​សេដ្ឋកិច្ចជាតិយើងមិនខ្លាំង យើង​នឹង​នៅតែត្រូវគេធ្វើបាប​ ដូច​សព្វថ្ងៃនេះជាក់ស្ដែង នៅពេលសេដ្ឋកិច្ចជាតិយើងនៅទន់ខ្សោយ​ ត្រូវប្រទេសជិតខាង​ធ្វើបាប​និង​ចូលមកឈ្លានពាន ។ ប្រទេសកម្ពុជា​យើង​តូច​បើធៀបនឹង​ប្រទេសជិតខាង ហើយក៏មានប្រជាជន​តិចជាង​គេ​ដែរ ដូច្នេះបើសិនជា​សេដ្ឋកិច្ចយើងមិនខ្លាំង គេនឹងមិនទុក​យើងស្មើនឹង​គេទេ »។​​​

លោក ​នៃ គង់ អភិបាលរងខេត្តព្រះសីហនុ បានមានប្រសាសន៍ឱ្យដឹងថា វិស័យជលផល​ក្នុង​ខេត្តព្រះសីហនុបានដើរ​តួនាទី​យ៉ាង​សំខាន់​ ក្នុងនាមជា​ប្រភពចំណីអាហារ​មិនចេះរីង​ស្ងួតសម្រាប់ប្រជាពលរដ្ឋ​ ដែលរួម​ចំណែកក្នុងការអភិវឌ្ឍសង្គម និងសេដ្ឋកិច្ច ។ ជាមួយគ្នា​នេះដែរ ការ​លើក​កម្ពស់​ការ​គ្រប់គ្រង​ធនធាន​ជល​ផល​ប្រកបដោយចីរភាព ពិតជា​ការងារ​ចាំបាច់​បំផុត​ ដែលក្នុងពេលកន្លងមក រដ្ឋបាលខេត្តព្រះសីហនុ បានចូលរួម​យ៉ាង​សកម្មជាមួយក្រសួង​ និងស្ថាប័ន​ជាតិ​ ជំរុញការ​អនុវត្ត​ផែនការ​យុទ្ធសាស្ត្រ​វិស័យជលផល ការ​បង្កើន​វារីវប្បកម្ម ការពង្រឹង​ការ​គ្រប់គ្រង និងការអភិវឌ្ឍសហគមន៍នេសាទ​ ការជំឬុញ ការអភិវឌ្ឍ​សមត្ថភាព និងបច្ចេកវិទ្យា​ ដើម្បីកែលម្អគុណភាពជលផល ការអភិវឌ្ឍ ខ្សែច្រវាក់​តម្លៃជលផល និងជំឬុញការ​នាំចេញ និងការពង្រឹង​ការអនុវត្ត​ច្បាប់​ស្ដីពីជលផល​ក្នុងការ​ប្រយុទ្ធសាស្ត្រ​ប្រឆាំង​នឹង​ការ​នេសាទ​ខុសច្បាប់ ។

លោក​បន្តថា បច្ចុប្បន្ន​ ខេត្ត​ព្រះសីហនុ​ មាន​តំបន់នេសាទ ទឹកសាប និងទឹកប្រៃ សម្រាប់តំបន់​សេដ្ឋកិច្ច​ទឹកសាប​ភាគច្រើន​នៅក្នុង​ស្រុក​ព្រៃនប់ និងស្រុកកំពង់សីលា ។ ចំពោះតំបន់​សមុទ្រ​ លាតសន្ធឹងចាប់ពីព្រែក​ត្រពាំងរពៅ ព្រំប្រទល់​ខេត្តកំពត មកដល់​នឹងព្រែកឆ្កែព្រុស ខេត្តកោះកុង មានបណ្ដោយឆ្នេរ​ ១៧៥​,៨១គីឡូម៉ែត្រ ។

លោកបានបន្ថែមថា ក្នុងឆ្នាំ២០២៥នេះ ខេត្តព្រះសីហនុ មាននាវានេសាទ​សមុទ្រ​សរុបចំនួន ២ ៥២៣គ្រឿង ដែល​មានគ្រួសារអ្នកនេសាទ ចំនួន ១៥ ៣៤៥គ្រួសារ ដោយប្រើប្រាស់​កម្លាំង​ពលកម្ម​សរុប​ចំនួន ២៨ ០៦០នាក់ ក្នុងនោះបែងចែកជា​ នេសា​ទសិប្បកម្ម នេសាទលក្ខណៈគ្រួសារ​ ក្នុង​សមុទ្រ​ និងនេសាទ​តាមវាល​ស្រែ ( ទឹកសាប ) ។

លោក​ ហ៊ាង ថុណា ប្រជានេសាទ​សមុទ្រ​មួយរូប​នៅខេត្តកោះកុងបាននិយាយថា មុខរបរនេសាទ​បាន​ផ្ដល់​ប្រាក់កម្រៃសម្រាប់ចិញ្ចឹមគ្រួសាររបស់លោក ហើយ​លោក​ប្រកបរបរនេះជាច្រើនឆ្នាំមកហើយ​ បើគិតមកដល់ឆ្នា២០២៥​នេះ មានរយៈពេលជិត​២០ឆ្នាំ ។

លោកបន្តថា ពលរដ្ឋ​រស់នៅ​លើកោះក្នុង​តំបន់សមុទ្រ ភាគច្រើន​គឺមានរបរ​នេសាទ ដោយខ្លះនេសាទត្រី ខ្លះនេសាទ មឹក ក្ដាម បង្គា​និងផលសមុទ្រផ្សេងៗទៀត ហើយផល​នេសាទ​វិញ ក៏មិនទៀងទាត់ដែរ គឺទទួលបានតាមរដូវ​កាល​ ដោយពេលខ្លះក៏បានផល​ច្រើន ខ្លះក៏បានផលតិច ប៉ុន្តែវាអាច​ចិញ្ចឹមគ្រួសារបានសមរម្យ ៕