សហរដ្ឋ​អាមេរិក​បាន​ក្លាយ​ជា​ដៃគូ​សន្ទនា និងពាណិជ្ជកម្ម​របស់សមាគមប្រជាជាតិអាស៊ីអាគ្នេយ៍ដែលហៅកាត់ថាអាស៊ាន​តាំងតែ​ឆ្នាំ១៩៧៧ មកម្ល៉េះ ពោលគឺមានរយៈពេលប្រមាណជា ១០ ឆ្នាំ​ក្រោយ​ការ​បង្កើត​តំបន់សេដ្ឋកិច្ចនៅ​អាស៊ីអាគ្នេយ៍។

របាយការណ៍ចុងក្រោយមួយត្រូវបានចេញផ្សាយនៅលើគេហទំព័រ Asean Briefing បានបង្ហាញថា ទំហំពាណិជ្ជកម្មគ្រប់ប្រភេទទំនិញ និងសេវាកម្មរវាងសហរដ្ឋអាមេរិក និងអាស៊ាន មានចំនួនសរុបប្រមាណ ៤៤១,១ ពាន់លានដុល្លារកាលពីក្នុងឆ្នាំ២០២១ ជាចំនួនកើនឡើងពីទំហំពាណិជ្ជកម្ម ៣៦២,២ ពាន់លានដុល្លារដែលទទួលបានកាលពីក្នុងឆ្នាំ២០២០។ តួលេខដ៏រឹងមាំបានបង្ហាញថា សហរដ្ឋអាមេរិក គឺជាដៃគូពាណិជ្ជកម្មធំទីបំផុតទី ២ របស់អាស៊ានបន្ទាប់ពីប្រទេសចិន។ ក្នុងនោះគេសង្កេតឃើញដែរថា សហរដ្ឋអាមេរិក គឺជាប្រភពនៃការវិនិយោគផ្ទាល់ពីបរទេស ឬហៅថា FDI ដ៏ធំបំផុតនៅក្នុងតំបន់អាស៊ានទាំងមូល ដែលរួមចំណែកដល់ប្រមាណ ២២,៥ ភាគរយនៃ FDI សរុបទៅក្នុងតំបន់នេះ។

ដោយសារតែអាស៊ានជាដៃគូពាណិជ្ជកម្មធំជាងគេទី ៤ របស់សហរដ្ឋអាមេរិក តំបន់នេះកំពុងមានសារសំខាន់កាន់តែខ្លាំងឡើងសម្រាប់ពាណិជ្ជកម្មរបស់សហរដ្ឋអាមេរិក និងរដ្ឋាភិបាលរបស់ខ្លួន ជាពិសេសនៅក្នុងបញ្ហាសំខាន់របស់ពិភពលោកបូករួមទាំងបញ្ហាអាកាសធាតុ ការដឹកជញ្ជូន ថាមពល និងការថែទាំសុខភាព ខណៈដែលចិនឈរនៅលំដាប់ទី១របស់អាមេរិក។ ប៉ុន្តែទោះបីជាយ៉ាងណាក្តី បើយើងពិនិត្យទៅលើនយោបាយ និងទំនាក់ទំនងកាទូតជាមួយនឹងអាមេរិកនោះ តំបន់អាស៊ានកំពុងស្ថិតនៅកម្រិតមួយដែលល្អប្រសើរជាងចិនទោះបីជាមិនទាន់ដល់កម្រិតរបស់បណ្តាប្រទេសនៅអឺរ៉ុបក្តី។ មានន័យថា កត្តាសន្តិសុខ និងបញ្ហាជម្លោះនានារវាងអាស៊ាន និងអាមេរិកគឺមានភាពរឹងម៉ាំខ្លាំងមិនងាយនឹងអាចប៉ះពាល់ឡើយតាំងពីអតីតកាល ឬបច្ចុប្បន្ន និងទៅថ្ងៃមុខក្តី។

ដោយឡែកសម្រាប់ឆ្នាំ២០២២កន្លងទៅថ្មីៗនេះ អាស៊ានបានក្លាយទៅជាទីផ្សារធំជាងគេបំផុតទី ៤ របស់ពិភពលោក ហើយសហរដ្ឋអាមេរិកនៅតែមានឈ្មោះជាប្រភពដ៏ធំបំផុតរបស់អាស៊ាននៃការវិនិយោគផ្ទាល់ពីបរទេស។ ​ស្ថិតិដែលត្រូវបានចេញផ្សាយដោយការិយាល័យវិភាគសេដ្ឋកិច្ចរបស់សហរដ្ឋអាមេរិក​ U.S. Bureau of Economic Analysis បានបង្ហាញថា ពាណិជ្ជកម្មសរុបរបស់សហរដ្ឋអាមេរិកលើទំនិញ និងសេវាកម្មជាមួយអាស៊ាននៅតែមានការកើនឡើងបន្ថែមទៀតទៅដល់ចំនួនសរុបប្រមាណ ៥០៥,៨ ពាន់លានដុល្លារ។

តាមរយៈសកម្មភាពជាច្រើនរបស់អាស៊ាន និងតួលេខទាំងអស់នេះបានបង្ហាញថា ប្លុកអាស៊ានបានដើរតួនាទីកណ្តាលក្នុងសមាហរណកម្មសេដ្ឋកិច្ចអាស៊ីដោយចូលរួមការចរចាដើម្បីបង្កើតកិច្ចព្រមព្រៀងពាណិជ្ជកម្មសេរីដ៏ធំបំផុតរបស់ពិភពលោក និងចុះហត្ថលេខាលើកិច្ចព្រមព្រៀងពាណិជ្ជកម្មសេរីធំៗចំនួន៦រួចមកហើយជាមួយប្រទេស និងតំបន់ដែលមានសេដ្ឋកិច្ចក្នុងតំបន់ផ្សេងទៀត។

គួរឲ្យដឹងដែរថា ប្រទេសសមាជិកទាំង១០របស់អាស៊ាន បច្ចុប្បន្នកំពុងក្លាយខ្លួនជាមហាអំណាចសេដ្ឋកិច្ចមួយរបស់ពិភពលោក ហើយអ្នកវិភាគជាច្រើនបានប៉ាន់ស្មានដូចគ្នាថា ប្រសិនបើអាស៊ានគឺជាប្រទេសតែមួយ នោះវានឹងក្លាយជាប្រទេសដែលមានសេដ្ឋកិច្ចធំជាងគេទី៧របស់ពិភពលោក ហើយអាចនឹងក្លាយជាតំបន់​ដែល​មាន​សេដ្ឋកិច្ច​ធំ​ជាង​គេ​ទី ៤ នៅ​ឆ្នាំ២០៥០៕