សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ឆ្នាំង ៖ ខ្ទឹមស្លឹក ជាដំណាំម្យ៉ាងដែលប្រជាជនក្នុងខេត្តកំពង់ឆ្នាំង កំពុងមមាញឹកដាំដុះ និងប្រមូលផលឥតសម្រាកដៃ ដើម្បីផ្គត់ផ្គង់តម្រូវការទីផ្សារក្នុងស្រុក ជាពិសេសនៅតាមបណ្តាទីផ្សារនានាក្នុងរាជធានីភ្នំពេញ។ ជាក់ស្ដែង សហគមន៍កសិកម្មទឹកហូតមានជ័យក្ដីសង្ឃឹម ស្ថិតក្នុងភូមិត្រពាំងក្រពើ ឃុំទឹកហូត ស្រុករលាប្អៀរ ខេត្តកំពង់ឆ្នាំង ជាសហគមន៍មួយដែលតែងជួយសម្រួលដល់ការងារកសិករ ជាពិសេសអ្នកដាំដំណាំស្លឹកខ្ទឹម ទៅលើបច្ចេកទេសដាំ សម្ភារកសិកម្ម និងរកទីផ្សារឱ្យកសិករផងដែរ។
អ្នកស្រី រិទ្ធ ចន្ថា ប្រធានក្រុមប្រឹក្សាភិបាលសហគមន៍ខាងលើបានមានប្រសាសន៍ថា
“សម្រាប់សមាជិកដាំខ្ទឹមស្លឹកក្នុងសហគមន៍យើងមានច្រើន ដែលអាចផ្គត់ផ្គង់ស្លឹកខ្ទឹមធម្មជាតិទៅកាន់ទីផ្សារបានពេញមួយឆ្នាំតែម្ដង។ សមាជិកដាំខ្ទឹមស្លឹកមានចំនួន ១៦០គ្រួសារ ដែលជាមធ្យមសហគមន៍អាចផ្គត់ផ្គង់បាន ៤តោនក្នុងថ្ងៃ ចំពោះខ្ទឹមស្លឹក”
អ្នកស្រីបន្តថា ៖
“ខ្ទឹមស្លឹកខាងសហគមន៍យើងអាចផ្គត់ផ្គង់បានពេញមួយឆ្នាំ ដែលអតិថិជនភាគច្រើនជាអាជីវករក្នុងទីរួមខេត្តកំពង់ឆ្នាំងផ្ទាល់ ក្រៅពីនេះក៏មានខេត្ត បាត់ដំបង ពោធិសាត់ កំពង់ស្ពឺ និងរាជធានីភ្នំពេញដែលចែកចាយទៅតាមផ្សារដូចជា ផ្សារឧដ្ដុង ផ្សារអូឌឹម ផ្សារបាត់ដឹង ផ្សារថ្នល់ទទឹង ផ្សារដើមគរជាដើម”
ចំពោះតម្លៃវិញ ខ្ទឹមស្លឹករបស់សហគមន៍ទឹកហូតមានជ័យក្ដីសង្ឃឹម អាចលក់បានជាមធ្យមក្នុងតម្លៃ ៤ ០០០រៀល ក្នុង១គីឡូក្រាម ហើយសម្រាប់ចំណុចពិសេសនៃខ្ទឹមស្លឹករបស់សហគមន៍បៃតងស្រស់ គឺក្លិនឈ្ងុយល្អ ដោយសារមានប្រភពទឹកស្រោចស្របពេញមួយឆ្នាំ លក្ខណ្ឌដីមានជីវជាតិល្អងាយក្នុងការដាំដុះ ខ្ទឹមមានទំហំធំដល់ទៅ ៣ទៅ៣តឹកកន្លះ ខុសពីតំបន់ផ្សេង និងមានតម្រូវការខ្ពស់ជាងគេក្នុងតំបន់ ហើយវាក៏ជាអត្តសញ្ញាណនៃខេត្តកំពង់ឆ្នាំងផងដែរ។ នេះជាអ្វីដែលប្រធានក្រុមប្រឹក្សាភិបាលខាងលើបានលើកឡើង។
សម្រាប់ការងារកន្លងមករបស់សហគមន៍ទឹកហូតមានជ័យក្ដីសង្ឃឹម ដោយសារមានការគាំទ្រពីមន្ទីរកសិកម្មខេត្តកំពង់ឆ្នាំងបានជួយសម្រួលការងារកសិករជាច្រើន ដូចជា ការរកទីផ្សារ ការផ្តល់ជំនួយបច្ចេកទេស និងសម្ភារកសិកម្ម ផ្តល់ទុយោទឹក ស្បៃ កៅស៊ូក្រាលរង និងផ្តល់ពូជខ្ទឹមផងដែរ។
យ៉ាងណាមិញ សហគមន៍នេះក៏មានកត្តាប្រឈមខ្លះដែរដូចជា ខ្វះខាតដើមទុនផលិតមិនទាន់តម្រូវការទីផ្សារ និងមិនទាន់មានឧបករណ៍ទំនើបដូចជាម៉ាស៊ីនស្ទូងខ្ទឹម បញ្ហាបម្រែបម្រួលអាកាសធាតុ ម្យ៉ងទៀតចំណេះដឹងកសិកម្មរបស់បងប្អូនកសិករនៅមានកម្រិតនៅឡើយ។
គួរបញ្ជាក់ដែរថា សមាជិករបស់សហគមន៍ទឹកហូតមានជ័យក្ដីសង្ឃឹមមានសរុបចំនួន ៥៨១គ្រួសា ស្រី៤១៥នាក់ ដោយក្នុងនោះ ក្រៅពីអ្នកដាំខ្ទឹមស្លឹក ក៏មានអ្នកចិញ្ចឹមមាន់ ១៨គ្រួសារផងដែរ។ សម្រាប់គម្រោងនាពេលអនាគត សហគមន៍នេះក៏មានផែនការពង្រីកផ្ទៃដីដាំដុះឱ្យបាន ៣២ហិកតា ដើម្បីផលិតឱ្យគ្រប់តម្រូវការទីផ្សារ៕
Account
Security
Favourite Content