ភ្នំពេញ ៖ បើមិនមានការប្រែប្រួលនោះទេ សហរដ្ឋអាមេរិកក្រោមរដ្ឋបាលថ្មីរបស់លោក ដូណាស់ ត្រាំ នឹងដាក់វិធានការពន្ធ ៤៩%មកលើកម្ពុជា សម្រាប់ការនាំចូលទំនិញគ្រប់មុខពីកម្ពុជាចូលទឹកដីអាមេរិក ដែលទំនិញភាគច្រើនត្រូវបានគេដឹងថាជាផលិតផលក្នុងវិស័យឧស្សាហកម្មកាត់ដេរ។   

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភា​កម្ពុជាបានលើកឡើងថា ការដំឡើងពន្ធនាំចូលពីបណ្តាប្រទេសផ្សេងៗ គឺជាសិទ្ធិរបស់សហរដ្ឋអាមេរិក ក្នុងការគៀងគរប្រភពទុនដើម្បីពង្រឹងសេដ្ឋកិច្ចរបស់ខ្លួន ប៉ុន្តែយ៉ាងណា អាមេរិក ក៏ត្រូវការទំនិញជាច្រើនពីបណ្តាប្រទេសផ្សេងៗសម្រាប់បំពេញតម្រូវការប្រើប្រាស់ប្រចាំថ្ងៃនៅក្នុងប្រទេសដែរ។   

លោកបណ្ឌិត ហុង វណ្ណៈ បានបញ្ជាក់ថា ៖

«កម្ពុជានាំចេញទៅអាមេរិកក្នុងរង្វង់ជាង ១០ពាន់លានដុល្លារ ចំណែកអាមរិកនាំចូលមកកម្ពុជាវិញត្រឹម ២០០-៣០០លានដុល្លារប៉ុណ្ណោះ ក្នុងមួយឆ្នាំ ហើយបើកម្ពុជាធ្វើការបន្ធូរបន្ថយបញ្ចុះពន្ធមួយចំនួនទៅលើការនាំចូលទំនិញពីសហរដ្ឋអាមេរិក នោះប្រហែលជាសហរដ្ឋអាមេរិកគិតគូរឡើងវិញ ប៉ុន្តែសាច់រឿងបានឈានដល់ដំណាក់កាលមួយដែលនឹងត្រូវអនុវត្ត ហើយការបារម្ភនៅត្រង់ថា កម្ពុជាត្រូវបានដំឡើងពន្ធលើសគេ លើសវៀតណាម៤៦% និងឡាវ៤៨%ទៀតផង ដូច្នេះ រដ្ឋាភិបាលត្រូវមានដំណោះស្រាយឱ្យបានឆាប់រហ័ស»។  

លោក Casey Barnett ​ប្រធានសភាពណិជ្ជកម្មអាមរិកប្រចាំកម្ពុជា មានប្រសាសន៍ថា ៖ លោក ត្រាំ បានប្រកាសដំឡើងពន្ធ៤៩% លើទំនិញកម្ពុជា ដែលនឹងចូលជាធរមានចាប់ពីម៉ោង ១២.០០ព្រឹក ថ្ងៃទី០៩ មេសា ឆ្នាំ២០២៥ ហើយប្រសិនបើមិនដោះស្រាយទេ វាអាចប៉ះពាល់ដល់សេដ្ឋកិច្ចបង្កើតឱ្យមានវិបត្តិយ៉ាងជ្រៅ បាត់បង់ការងាររាប់សែននាក់ បាត់បង់មូលធនលំហូរចេញយ៉ាងឆាប់រហ័ស។

លោកបានបញ្ជាក់ថា ៖

«នៅឆ្នាំ២០២៤ កម្ពុជាបាននាំចេញទៅសហរដ្ឋអាមេរិកចំនួន ១២,៨ ពាន់លានដុល្លារ ប៉ុន្តែបាននាំចូលមកវិញត្រឹមតែ ៣០០ លានដុល្លារប៉ុណ្ណោះ។ សហរដ្ឋអាមេរិកបានស្នើសុំការកាត់បន្ថយពន្ធលើការនាំចេញរបស់សហរដ្ឋអាមេរិក ដូចជាការសម្របសម្រួលការផ្តល់អាជ្ញាប័ណ្ណអាជីវកម្មរបស់សហរដ្ឋអាមេរិកដូចជា Starlink និងកិច្ចសហប្រតិបត្តិការសម្រាប់សន្តិសុខជាតិ»។

ករណីនេះ លោក Casey Barnett ​បានជំរុញដល់រដ្ឋាភិបាលកម្ពុជា ត្រូវដោះស្រាយជាបន្ទាន់ និងដោយឆ្លាតវ័យ តាមរយៈយន្តការទម្លាក់ពន្ធនាំចូលទំនិញពីអាមេរិក ដោយហេតុថា កម្ពុជានាំចូលទំនិញពីអាមេរិកត្រឹមតែ៣០០លានដុល្លារប៉ុណ្ណោះ ដូច្នេះវាមិនខាតច្រើនទេ បើសិនរដ្ឋាភិបាលកម្ពុជា​លើកលែងពន្ធរាល់ទំនិញនាំចូលពីអាមេរិក ហើយកម្ពុជានាំចេញទៅអាមេរិកវិញដល់ ១២,៨ពាន់លានដុល្លារ ហើយមិនជាប់ពន្ធខ្ពស់ នោះជាការចំណេញរបស់កម្ពុជា។

ឆ្លើយតបទៅនឹងអ្នកជំនាញសេដ្ឋកិច្ចខាងលើ លោក មាស សុខសេនសាន ក្រុមការងារជំនាញសេដ្ឋកិច្ចនៃក្រសួងសេដ្ឋកិច្ច និងហិរញ្ញវត្ថុ បានប្រសាសន៍ថា ករណីនេះក្រសួងកំពុងពិភាក្សាយ៉ាងម៉ត់ចត់ និងវាយតម្លៃយ៉ាងល្អិតល្អន់ ក្នុងការដែលសហរដ្ឋអាមេរិកដាក់វិធានការថ្មីនេះ។ ក្រុមការងារនឹងពិនិត្យ ដើម្បីមានវិធានការជាក់លាក់សម្រាប់រកដំណោះស្រាយ ធ្វើយ៉ាងណាធានាបាននូវភាពល្អប្រសើរនៃសេដ្ឋកិច្ចកម្ពុជា បន្តនិរន្តរភាព មានភាពប្រកួតប្រជែងសំដៅការរក្សា និងផ្តល់ការងាដល់ពលរដ្ឋកម្ពុជា៕ វិន ឈុនហ៊ាត