ភ្នំពេញ ៖ ចំពោះទស្សនវិស័យសម្រាប់ឆ្នាំ២០២៣នេះ សេដ្ឋកិច្ចកម្ពុជាត្រូវបានរំពឹងថានឹងបន្តកើនឡើងក្នុងរង្វង់ ៥,៥% ហើយអត្រាអតិផរណាត្រូវបានព្យាករថានឹងថយចុះមកក្នុងរង្វង់ ២% វិញ ដោយសារថ្លៃប្រេងឥន្ធនៈត្រូវបានព្យាករថានឹងថមថយ ក្នុងស្ថានភាពដែលសេដ្ឋកិច្ចពិភពលោកមានកំណើនយឺតជាងឆ្នាំមុន និងភាពប្រសើរឡើងនៃខ្សែច្រវាក់ផ្គត់ផ្គង់សកល។ នេះបើយោងរបាយការណ៍ប្រចាំឆមាសទី១ របស់ធនាគារធនាគារជាតិនៃកម្ពុជា។

ធនាគារជាតិននៃកម្ពុជា បានឱ្យដឹងថា យ៉ាងណាមិញ សេដ្ឋកិច្ចតំបន់ និងពិភពលោកនៅបន្តប្រឈមនឹងភាពមិនប្រាកដប្រជាខ្ពស់ ដូច្នេះសេដ្ឋកិច្ចកម្ពុជាក៏ប្រឈមនឹងហានិភ័យចម្បងៗមួយចំនួន រួមមាន៖

១/-ការកើនឡើងនៃភាពតានតឹងភូមិសាស្ត្រនយោបាយ ទន្ទឹមនឹងការអូសបន្លាយនៃសង្គ្រាមរុស្ស៊ី-អ៊ុយក្រែន ដែលអាចទាញកំណើនសេដ្ឋកិច្ចនៅក្នុងប្រទេសដៃគូពាណិជ្ជកម្មសំខាន់ៗរបស់កម្ពុជាឱ្យថយចុះ និងប៉ះពាល់ដល់ការនាំចេញ លំហូរវិនិយោគមកកម្ពុជា និងវិស័យទេសចរណ៍, ២/-ការថយចុះអត្រាអតិផរណានៅប្រទេសអភិវឌ្ឍន៍យឺតជាងការរំពឹងទុកអាច នាំទៅដល់ការបន្តដំឡើងអត្រាការប្រាក់គោលដែលបង្កជាសម្ពាធមកលើអត្រាការប្រាក់នៅកម្ពុជា ជាពិសេសក្នុងបរិការណ៍ដែលសេដ្ឋកិច្ចកម្ពុជាមានកម្រិតដុល្លារូបនីយកម្មខ្ពស់, ៣/-ការឡើងថ្លៃប្រាក់ដុល្លារអាមេរិកអាចបណ្ដាលឱ្យមានឥទ្ធិពលមកលើស្ថិរភាពអត្រាប្ដូរប្រាក់រៀល ព្រមទាំងប៉ះពាល់ដល់ភាពប្រកួតប្រជែងលើការនាំចេញនិងការចំណាយរបស់ទេសចរអន្តរជាតិ, ៤/-ការអូសបន្លាយនៃការឆ្លងជំងឺកូវីដ-១៩ នៅលើពិភពលោក អាចនាំឱ្យកើតមានវីរុសកូវីដបំប្លែងខ្លួនថ្មី ដែលមានលក្ខណៈ ឆ្លងរាលដាលខ្លាំងឡើងវិញ, ៥/-ការប្រែប្រួលអាកាសធាតុអាចនាំឱ្យប៉ះពាល់ដល់ផលិតកម្មកសិកម្ម និងបង្កជាសម្ពាធទៅលើថ្លៃក្រុមម្ហូបអាហារ, ៦/-ការកើនឡើងនៃឧក្រិដ្ឋកម្មសាយប័រ ដែលអាចធ្វើឱ្យរអាក់រអួលដល់ដំណើរការប្រព័ន្ធទូទាត់និងសេដ្ឋកិច្ចទាំងមូល និង ៧/-ការកើនឡើងសម្ពាធបំណុលក្រុមគ្រួសារ និងក្រុមហ៊ុន-សហគ្រាស ប្រសិនបើសេដ្ឋកិច្ចកើនឡើងយឺតជាងការរំពឹងទុក ដែលអាចនាំទៅដល់ការធ្លាក់ចុះតម្រូវការប្រើប្រាស់ការវិនិយោគ និងគុណភាពឥណទានជាដើម។

ក្នុងស្ថានភាពនេះ ធនាគារជាតិនៃកម្ពុជានឹងបន្តអនុវត្តនយោបាយរូបិយវត្ថុ និងវិធានការម៉ាក្រូ និងមីក្រូប្រុងប្រយ័ត្ន ប្រកបដោយស្មារតីបុរេសកម្ម និងបត់បែនទៅតាមការវិវត្តនៃសេដ្ឋកិច្ច ក្នុងគោលដៅរក្សាស្ថិរភាពថ្លៃ និងស្ថិរភាពហិរញ្ញវត្ថុ និងគាំទ្រដល់ការអភិវឌ្ឍសេដ្ឋកិច្ចជាតិប្រកបដោយចីរភាព។ ស្របតាមការងើបឡើងសន្សឹមៗនៃសេដ្ឋកិច្ច យុទ្ធសាស្ត្រចាកចេញពីវិបត្តិនឹងត្រូវបន្តធ្វើឡើងជាលំដាប់ ដើម្បីពង្រឹងឡើងវិញនូវទ្រនាប់គោលនយោបាយ សម្រាប់ឆ្លើយតបការប៉ះទង្គិចដែលអាចកើតមានជាយថាហេតុនាពេលអនាគត។ សេវាហិរញ្ញវត្ថុ និងប្រព័ន្ធទូទាត់នឹងត្រូវបន្តធ្វើទំនើបកម្ម ទន្ទឹមនឹងការលើកកម្ពស់ចំណេះដឹងផ្នែកហិរញ្ញវត្ថុនិងឌីជីថលដល់ប្រជាពលរដ្ឋ។

ទន្ទឹមនេះ ធនាគារជាតិនៃកម្ពុជា បាន និងកំពុងសហការជាមួយដៃគូអភិវឌ្ឍន៍ ក្នុងការរៀបចំយន្តការគាំទ្រដើម្បីជំរុញដល់ការផ្តល់ហិរញ្ញប្បទានបៃតង និងប្រកបដោយចីរភាព ដោយក្នុងនោះរួមមានការបង្កើតផែនទីចង្អុលផ្លូវ និងវត្តិករសាស្ត្រនៃហិរញ្ញវត្ថុបៃតង សម្រាប់វិស័យធនាគារ ការគ្រប់គ្រងហានិភ័យបរិស្ថាននិងអភិបាលកិច្ច និងការកសាងសមត្ថភាពនៃភាគីពាក់ព័ន្ធជាដើម។ កិច្ចសហប្រតិបត្តិការជាតិ និងអន្តរជាតិទាំងក្នុងក្របខ័ណ្ឌទ្វេភាគី និងពហុភាគី ជាពិសេសក្នុងក្របខ័ណ្ឌអាស៊ាន និងអាស៊ាន+៣ នឹងត្រូវបន្តពង្រឹង ដើម្បីលើកកម្ពស់សហប្រតិបត្តិការ សមាហរណកម្ម និងសំណាញ់សុវត្ថិភាពហិរញ្ញវត្ថុតំបន់ ដែលនឹងរមចំណែកបង្កើនភាពធន់នៃសេដ្ឋកិច្ចទល់នឹងវិបតិ្ត។

ស្រដៀងទៅនឹងការព្យាកររបស់ធនាគារជាតិនៃកម្ពុជា ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា អត្រាអតិផរណានៅកម្ពុជា ត្រូវបានរំពឹងថានឹងត្រឡប់ទៅរកនិន្នាការធម្មតាវិញ ក្នុងអត្រា ២,៥% ដូចគ្នាសម្រាប់ឆ្នាំ២០២៣ និងឆ្នាំ២០២៤ ដោយសារការរំពឹងទុកការវិលទៅរកប្រក្រតីភាពវិញនៃថ្លៃប្រេងអន្តរជាតិ និងថ្លៃទំនិញផ្សេងៗទៀត។

ការព្យាករនេះត្រូវបានធ្វើឡើង ក្នុងរបាយការណ៍ស្តីពី ក្របខ័ណ្ឌ​គោលនយោបាយ​ម៉ាក្រូ​សេដ្ឋកិច្ច និង​គោលនយោបាយ​ហិរញ្ញវត្ថុ​សាធារណៈ សម្រាប់​ការរៀបចំ​សេចក្តី​ព្រាងច្បាប់​ស្តី​ពី​ហិរញ្ញវត្ថុ​សម្រាប់​ការគ្រប់គ្រង​ឆ្នាំ ២០២៤ របស់ក្រសួងសេដ្ឋកិច្ច និងហិរញ្ញវត្ថុ។

របាយការណ៍បានឱ្យដឹងទៀតថា អត្រាប្តូរប្រាក់ត្រូវបានរំពឹងទុកនឹងស្ថិតក្នុងកម្រិតអាចគ្រប់គ្រងបាន ក្នុងអត្រាជាមធ្យមប្រចាំឆ្នាំប្រមាណ ៤ ០៦៥ រៀលក្នុងមួយដុល្លារអាមេរិក ក្នុងឆ្នាំ២០២៣ និងឆ្នាំ២០២៤ គាំទ្រដោយអន្តរាគមន៍របស់ធនាគារជាតិនៃកម្ពុជា ក្នុងការរក្សាស្ថិរភាពថ្លៃ និងទំនុកចិត្តពីសាធារណជនលើការប្រើប្រាស់រៀល។

ស្ថិតក្នុងបរិការណ៍ដែលកាន់តែមានភាពមិនប្រាកដប្រជាខ្ពស់ និងការវិវត្តលឿនជាងការរំពឹងទុកនូវនិន្នាការសកល និងតំបន់ រាជរដ្ឋាភិបាលបាន និងកំពុងបន្តដាក់ចេញឱ្យអនុវត្តនូវគោលនបាយហិរញ្ញវត្ថុសាធារណៈ គោលនយោបាយរូបិយវត្ថុ និងគោលនយោបាយជារចនាសម្ព័ន្ធប្រកបដោយភាពប្រទាក់ក្រឡាគ្នា ព្រមទាំងរៀបចំយន្តការច្បាស់លាស់សម្រាប់បន្តជំរុញការអនុវត្តគោលនយោបាយទាំងនេះ ឱ្យកាន់តែមានប្រសិទ្ធភាពនិងស័ក្តិសិទ្ធភាពខ្ពស់ សំដៅបន្តរក្សាលំនឹង និងជំរុញកំណើនសេដ្ឋកិច្ចប្រកបដោយចីរភាព និងបរិយាបន្ន។

ជាមួយគ្នានេះ រាជរដ្ឋាភិបាលនឹងបន្តជំរុញការស្តារ និងពង្រឹងចន្ទល់កំណើនសេដ្ឋកិច្ចឱ្យរស់រវើក និងត្រឡប់ទៅកំណើនសក្តានុពល ចាប់យកឱ្យបាននូវកាលានុវត្តភាពថ្មីៗ ដែលកំពុងលេចឡើង និងកសាងភាពធន់សង្គម-សេដ្ឋកិច្ច ឱ្យកាន់តែរឹងមាំ និងមានភាពឆ្លើយតបខ្ពស់ទៅនឹងវិបត្តិដែលអាចកើតមាន៕